ӘМТиг эмәр теткнә

26-01-2021, 14:35 | Таңһчин зәңгс » Зіњг

«Эрүл-менд бә!» гидг аптекин һардач Һәрән Ольга бийән хөвтә күүнд тоолна. «Юңгад гихлә би наснаннь туршарт сән улсин дунд бәәнәв. Б. Б. Городовиковин нертә Троицкое селәнә гимназьд сурчахд маднд биологий дасхдг Г. Г. Санджиева мини дурта багш билә. Дарунь Тамара Хахлыновин нертә Хальмг медколледжд нанд җирһлин болн сурһулин медрл өгсн багшнр А. И. Шарапов, О. И. Шарапова болн Г. С. Кичик бәәсмн», – гиҗ Ольга Николаевна тодлна.

Келхд, Һәрән Ольга Хальмг медколледжиг йилһән сән гисн темдгәр төгсәһәд, Троицкое селәнә цутхлң больницд нилхдин халхар күч-көлсч намтран эклсмн. Хөөннь, 2004-ч җилин бар сарин 5-д, Ольга Һәрән Лиҗд мордад өркән өндәлһв. Дарунь шиңкән тогтсн өрк-бүл эк-эцкин үлмәд бәәшгоһар Ханты-Мансийск Автономн округд одад көдлхәр шиидсмн. Тенд баһ наста, сурһульта көдләчнрт байрлад, Сосновка поселкд патьр йилһҗ өгәд, көдлмшт авсмн. Герин эзн Лиҗ Приозерн района Чкаловск дундын школын хөөн Аһш балһсна нефтин болн газин техникум төгсәсмн. Тегәд көвүн Сиврин поселкд сурсн эрдмәрн Газпромин «Трансгазюгорск» компаньд машинистәр көдлв. Ольга болхла эмнлһнә пунктд медсестра болад көдлсмн. Һольшг, ээлтә заңта, өөдән мергҗлттә Ольга Николаевна Сосновка поселкд тоомсрта билә. Бәәсн чидлән, медрлән, цаган нөөлго көдлсн болдг. Тегәд чигн аптекин ахлач Вера Рылова пенсьтән һарчаһад эврәннь ормдан хальмг күүкиг батлсмн. Келхд, тиигхд Һәрән Ольга зуг 23-та билә. Удл уга баахн бер Тюмень балһсна медицинск академьд шүүврән өгәд, заочн халхар сурн аптекән һардсмн.
2010-ч җилд Гаряевихн хоршасн мөңгәрн Элстд патьр хулдҗ авла. Ольга Николаевна хальмг хотл балһснд «24 часа» гидг аптекд көдлв, Лиҗ болхла вахтын эв-арһар Юград цааранднь көдлв.
Хөөннь Ольга эврә кергән секхәр шиидв. Энүнә тускар авальтаһан ухан-тоолврарн хувалцв. Лиҗ Болдаевич гергнәннь шиидвринь дөңнв. Тегәд 2013-ч җилин мөчн сарин 12-т Лиҗ Ольга хойр арһлачнр болад ирлцңгү цаас авсмн. Эврә аптекән секнә гиснь йир җаңһрта керг бәәсмн. Үүлдврән эклхин төлә олн зүсн бүрдәцсәс зөв авх, бәәр, мергҗлттә көдләчнриг олҗ авх кергтә болна. Өдгә цагт «Эрүл-менд бә!» гидг аптек темдгтә. Энд шишлң сурһульта зурһан көдләч үүлдҗәнә. Тедн хоорндан ни-негн бәәнә, кергтә болхла үгәр чигн, кергәр чигн нег-негндән нөкд болна. Аптекин көдләчнр эврәннь һардачан күндлнә, яһад гихлә Һәрән Ольга үннч-седклтә, чик хәләцтә, дадмг арһлач мөн.
Келхд, эн аптек мана герин өөр бәәршлҗәнә, тегәд би бәәҗ-бәәҗәһәд тиигәрән одад кергтә эм хулдҗ авнав. Аптекин һардач Һәрән Ольга күн болһниг ээлтәһәр тосад, ирсн учринь медәд, кергтә эмин тускар тодрхаһар цәәлһәд, альк эм авхинь зааҗ өгнә.
Нидн аптек секгдснәс авн дигтә долан җил болв. Ольга Николаевнан келсәр, эн җилмүдин туршарт теднә коллективд Анҗан Евгения, Бадмин Деля, Хойна Сабира, Бутька Виктория, Пронина Лариса көдләд, баһ биш сән керг күцәсмн. Харм төрхд, ода тер күүкд улс олн-зүсн учрар аптекд көдлҗәхш. Болв тедн аптекин делгрлтд ямаран ик тәвцән орулсна тускар мартшгов, өдгә цагт нанла хамдан көдлҗәсн үүрмүдтән түрүн көдләчнрин тускар келҗ өгнәв гиҗ Һәрән Ольга цәәлһв. Өдгә цагт аптекд Бадм-Һәрән Ольга, Ользан Людмила, Катан Байрта болн нань чигн өөдән мергҗлттә күүкд көдлнә. Тедн Москва, Аһш, Сарпуль болн нань чигн балһсдт эмчин эрдм дассмн.
«Эрүл-менд бә!» аптек буйнч седклин халхар чигн мана таңһчд темдгтә, В. Д. Манджиеван нертә бичкдүдин Цутхлңд болн Көтчнрә района цутхлң больницд нилхдин үс өңгәр өгв, О. А. Шунгаеван нертә перинатальн Цутхлңд кир уһадг маши белглсмн, шиңкән төрсн нилхдин төлә хувц-хунр хулдҗ авсмн.
Һәрән Ольга эврәннь аваль Һәрән Лиҗлә хамдан эврә кергән секәд балһсна олн улст дөңгән күргснь маһд уга. Яһад гихлә теднә аптекин өөр-шидр бәәсн әмтнд һәәвһә юмн болв. Эм кергтә болхла тедн гертәсн һарад шулун болдгар кергтә юман хулдҗ авдг арһта болсмн. Ташр аптекд кен-негнләнь ээлтә баһчуд көдлнә, ода эврәннь өрк-бүлмүдән асрҗана. Орун мөңгнәсн арһлач алван таңһчин бюджетд илгәнә. Тегәд олнд тусан күргҗәх арһлачин керг цуг халхарн күцәмҗтә болтха!

ШААКУН Василий

Видео