Диилвр бәрхәр зүтксн төлә

25-02-2021, 13:00 | Таңһчин зәңгс » Сурєуль-эрдм

Одахн Пермь балһснд «Әрәсән сән гисн сурһмҗлач» гидг марһан болв. Терүнд мана орн-нутгин 74 субъектин элчнр байн дамшлтарн хувалцҗ, дорас өсч йовх бичкдүдт чик сурһмҗ болн гүн медрл өглһнә халхар олзлҗах эв-арһсин тускар медүлв. Хальмг Таңһчас Цугәрәсән марһанд Целинн района Троицкое селәнә «Алтн түлкүр» бичкдүдин садын сурһмҗлач Андратован Елена орлцв. Шидр бидн Елена Валерьевнала күүндәд, марһана тускар тодлврарн хувалцхиг сурвидн.
Елена Валерьевна сурһмҗлач болҗ «Алтн түлкүр» гидг бичкдүдин садт йисн җилдән көдлҗәнә. Хальмг ик сурһуль төгсәснә хөөн Троицкое селәнә 1-ч тойгта сурһульд һурвн җилдән эклц классин багшар көдлсмн. Тегәд сурһуль-эрдмин халхар арв һар җилдән көдләд, эн мергҗлтән өөдлүлв. Бичкдүдт ямр нег төр яһҗ зааҗ өгхин, соньн керг-үүлдвр бүрдәхин, күүкд-көвүдин билг-эрдм делгрүлхин халхар эн дамшлт хоршаҗ авв. Давсн җилд эн района сурһмҗлачнр дунд болсн марһанд диилвр бәрв. Хөөннь таңһчин марһанд орлцад бас күцәмҗ бәрсмн. Пандемий экләд эн марһа давуллһнд харшлтан күргсн бийнь Андратован Елена сән белдвр үзүлҗ, таңһчин сән гисн сурһмҗлачин нер зүүсмн.
- Эн җил Цугәрәсән марһан Пермь балһснд болв. Харм төрхд, бидн марһанд невчк дутад ирвидн. Теңгрин бәәдләс иштә мана самолет нисҗ чадлго хойр хонгтан Аһш балһснд бәәввидн. Тегәд марһан секгдснә байрт орлцсн угавидн. Марһана түрүн девсңд әрә күцҗ ирн бий терүнд орлцх кергтә болв. Марһанд орлцачнриг баг-багар хував, би 1-ч багд тусв. Нанла хамдан Бурятин, Ставропольск крайин, Камчаткин болн талдан регионмудын элчнр нег багд тусв, бидн хоорндан таньлдад, сән үр-иньгүд болвидн. Марһан өөдән кемҗәнд бүрдәгдв, цуһар хоорндан дамшлтарн хувалцҗ, ирсн һазриннь тускар келҗ өгв. Мадна төлә Пермь балһсар экскурсь бүрдәгдв, мастер-класс болв. Хойрдгч девсң «Күцәмҗин конструктор» гидг бичкдүдин садт болв. Келхд, энтн өдгә цага ке-сәәхн шин бәәрнд бәәршлнә, бичкдүдин билг-эрдм делгрүллһнә, гүн медрл зааҗ өглһнә төлә цуг кергсл бәәнә. Энд бичкдүдин кел өргҗүллһнә занять болв, күүкд-көвүд сән медрл үзүлв, тегәд кичәл йир соньнар давв, – гиҗ Елена Валерьевна келв.
Хойр девсң төгсснә дару финалд һарх 15 орлцач шүүҗ авгдв. Хальмг Таңһчин элч Елена Андратоваг «Диилвр бәрхәр зүтксн төләдән» гидг шишлң номинацд темдглв. Келхд, эн номинац эн җил түрүн болҗ зарлгдв. Эн марһанд орлцхин төлә хаалһдан кесг түрү-зүдү үзв чигн Пермьд күрәд, тенд сән кичәл үзүлсн төләдән Елена Валерьевна ачлгдсмн.
- Эн марһанд би мана бичкдүдин садын һардачин дарук Ольга Владимировна Пинаевала хамдан одсн биләв. Ах үүрм нанд дөң-тусан күргҗ, марһана йовудт бүлән үгәрн урмд өгв. Ольга Владимировна занять давуллһнд дөңгән күргҗ, ямаран наадд бичкдүдлә давулхиг зааҗ өгв. Хамдан көдлҗәх үүрмүдм эн марһанд белдвр кесн болн Пермьд бәәсн цагт бас дөңнҗ байрм хувалцв. Мана бичкдүдин садын һардач Лидия Михайловна Бовальдиновад онц ханлтан өргхәр седләв. Олна дөңгәр мана бүрдәцин болн района бәәтхә, бүкл таңһчиннь нер харсвидн, – гиҗ Елена Валерьевна темдглв.
Троицкое селәнә «Алтн түлкүр» бичкдүдин сад сән гисн сурһмҗлачнрин марһанд җил болһн ик күцәмҗ бәрдгин тускар онц келх кергтә. Района болн таңһчин марһаст эн бүрдәцин элчнр җил болһн дииләчнрин тоод орна. Үлгүрнь, давсн җилд сурһмҗлач Анна Сюкеева таңһчин марһанд бас 1-ч орм эзлсн билә. Андратован Еленад эн марһанд орлцснь ик дамшлт болв. Орн-нутгин булң болһнас ирсн сурһмҗлачнрла таньлдҗ, теднә көдлмшин тускар соньмсҗ, сән гисн эв-арһсиг тодлҗ авв. Елена Валерьевна дәкәд чигн ик күцәмҗ бәрх гиҗ сангдна.
Елена Валерьевна бийнь Сарпан района Аршан Зелмн селәнд өсәд боссмн. Эднә өрк-бүл таңһчин сурһуль-эрдмин халхд ик тәвцән орулҗ йовх улс болна. Экнь Валентина Михайловна Санжиева селәнә сурһульд һуч һар җилдән багшлв. Наталья эгчнь Элст балһсна 18-ч тойгта сурһульд эсвин багшар көдлҗәнә, Евгения дү күүкнь Баһ Дөрвдә гимназьд сурһульчнрт бас эсв зааҗана. Елена Валерьевна дурта эрдмәрн арв һар җилдән көдлҗәнә, эн бичкдүдин зүрк авлҗ, эднд чик сурһмҗ өгхин төлә эрк биш «алтн түлкүр» олҗ авч чадх.

ДАВАН Наталья

Видео