Залу күүнд зөрг – чимг

Вчера, 17:00 | Общество, Таңһчин зәңгс, Зіњг, Эдн Төрскән харсла

Бадмин Җаңһр төрскнч седклтә, чик авг-бәрцтә, өгсн үгдән итклтә йоста хальмг залу мөн. Дунд сурһулян төгсәснә хөөн эн әәрмд мордад, хойр җилдән орн-нутгиннь меҗә харҗ ик даавртаһар цергә кергән күцәсмн. Әәрмд хоршасн дамшлт энүнд дәкәд керглгдх гиҗ эн санҗасн уга, болв цергә шишлң керг-үүлдвр эклхлә эн түрүн зергләнд эврә сән дурар цергә бооца батлв. Тәвн нас һарсн күн баһчудла зерглҗ церглхд зөвәр күнд болх гиҗ кесг улс энүнд келҗ, сәәнәр ухалхиг сурв, болв залу күн шиидврән сольсн уга. Авальнь болн һурвн үрнь дотран зовсн бийнь энүнә шиидвриг дөңнснь ик урмд өгв.
- Залу күн өрк-бүлән, орн-нутган эрк биш харсх зөвтә. Мана аавнр, эцкнр җирһлиннь хаалһдан кесг түрү-зүдү дааҗ һарв, эдн төрскн һазр-усан харсҗ залу-зөрмгән үзүлсмн. Бидн эднә ач-тусар болн нилчәр эврәннь төрскн һазртан бәәнәвидн, сурһулян сурад, тааста эрдмәрн көдлнәвидн, күүкдән өскнәвидн. Тегәд Төрскән харсх цаг ирхлә бидн өвкнриннь нериг өөдән бәрҗ, бас зөргән үзүлҗ, дорас өсч йовх үйнрин сән иргчин тускар ухалх зөвтәвидн. Настав эс гиҗ талдан учр хәәҗ гертән суухла кен Төрскән харсхв? Келхд, нанла хамдан мини наста болн нанас ах улс чигн бәәнә. Баһчуд мадниг күндлҗ тевчнә, зәрм төрәр сүв-селвг сурна. Нанла хамдан олн келн-улсин элчнр церглҗәнә, бидн хоорндан ниитә бәәҗ, нег-негән дөңнҗ, даалһвран үнн кевәр күцәҗ йовнавидн, – гиҗ Җаңһр Львович келнә.
Цергә шишлң керг-үүлдврт 2022 җилин зунас авн орлцҗ йовх Бадмин Җаңһрла хамдан нег һазра улс дала билә. Эдн ээм-ээмән түшәд, бәрлдәнд орлцхларн нег-негән хәләҗ йовсмн. Хөөннь эдн салу-салу талдан әңгүдт церглдг болв, тегәд ода энүнлә хамдан хальмгуд уга. Дән болҗах цагла орс, хальмг, бурят, хасг гиҗ йилһл уга, цуһар эдн терүг сәәнәр медҗ, хоорндан ахнр-дүүнр кевтә ниитә бәәнә. Цергә иньгллт хамгин үнтә болна, гиҗ залу күн темдглнә. Бадмин Җаңһр залу-зөрмгән үзүлҗ, кесг бәрлдәнд орлцв. Цергә даалһвран үнн кевәр күцәсн төләдән эн «Төрскнәннь төлә ач-тус күргсн» болн «Зөрмгин төлә» гидг орденмүдин II девсңгин медальмүдәр ачлгдсмн.
Гертәсн хол бәәдг болв чигн Бадмин Җаңһрт өөрхн улсин дөң ик омг-чидл өгнә. Саглр Тюмяевна авальтаһан эдн һучн җилдән ни-негн бәәнә, һурвн үрнь өлзәтә сән үрд болҗ өсв. Светлана, Даяна болн Аюка эңкр экән дөңнҗ, эцкдән бас зовҗахан медүлхш, эрүл-менд хәрҗ ирхиг теңкән уга күләҗәнә. Отхн Аюка «Негдсн Әрәсән баһ наста гвардь» гидг баһчудын җисәнә шунмһа орлцач болна. Көвүн әәрмәс бууҗ ирәд, седвәртә баһчудла хамдан таңһчин олна бәәдл-җирһлд шунмһаһар орлцҗ, кесг керг-үүлдвр давуллһнд тәвцән орулҗана. Эдн цергә шишлң керг-үүлдврт орлцҗадг нег һазра улст дөңгән күргҗ буйнч седклин керг-үүлдврмүд давулна. Нидн Бадмаевихнә өрк-бүлд байрта йовдл учрв, ууһн Светлана күүкнь хәрд һарла. Намрар Алтана зе күүкн һарв. Җаңһр Львович аав болсн байрта зәңгиг соңсад, зе күүкән теврҗ үмсхәр эрк биш әмд хәрҗ ирхв гиҗ шиидв. Ода Бадмин Җаңһр гертән амрлһнд бәәнә, шарх-шаван эдгәҗ эмнлһ авчана. Хамгин түрүнд эн зе күүкән үзхәр адһв, һар деерән терүг авхлань зүркнь бульглад бәәв. Энүнә сән-сәәхн иргчин төлә аавнь шарх-шаван эдгәһәд, дәкнәс цергә даалһвран күцәхәр йовхмн.
ДООҖАН Наталья
ЗУРГТ: Бадмин Җаңһр Саглр авальтаһан болн Алтана зе күүктәһән

Видео