Эн җилин хөн сард Хальмгт Энткгин сойлын Өдрмүд болх гиҗ урднь зәңглсн биләвидн. Сойлын өвәрц ик көтлврәрн эн Өдрмүд таңһчин әмтнд тодлгдх гиҗ күләгдҗәнә. Ода таңһчд Энткгин Деед консульствин көдләчнр ирсн бәәнә.
Хальмгин Шаҗн Лам гевш Тензин Чойдакла эн делегацин гешүд харһв.

Эн җилин намрар бичкдүдин үүдәлтин Бәәшң 35 җилин өөнән темдглхмн. Терүг угтҗ бүрдәцин улд үүлддг билг-эрдмин багмудын бичкдүд «Зуульчллһн» гидг концерт белдв.

«Ик гастрольмуд» гидг орн-нутгин төсвин кемҗәнд Хальмгт Бурятин наадһасин театр гастрольд ирв. Ах-дү республикәс ирсн театр Элстд «Җаңһр» наадһасин театрин тәәз деер нааддан үзүлҗәнә. «Ульгэр» нертә театр Бурятьд бәәтхә цуг Әрәсән кемҗәнд темдгтә үүдәгч коллектив болҗана. Байн тууҗта театр билг-эрдмәрн нер һарсмн. Театрин хамгин өөдән мөрәһәр дөрвн дәкҗ ачлгдсмн. Ода Хальмгин хәләһәчнр эднә нааддыг хәләҗәнә.

То-дигин төлә:
Дорҗин Денис эврә сән дурарн үүлддг зурач. Пүрвә Эрдниевин нер зүүдг Ик Бухса дундын сурһульд тууҗин болн обществоведеня багш болҗ көдлнә. Денис 1985 җилин мөрн сарин 23-д Ик Бухс селәнд төрсмн. Энд 2002 җилд дундын сурһуль төгсәсмн. Грековин нертә художествин училищин Хальмг филиалд нег җил сурсмн. Хальмг госуниверситетд ах сурһуль дассна хөөн әәрмд церглв. Хөөннь Денис Москвад көдлв.
2016 җилд төрскн селәндән хәрҗ ирв. Изо болн технологин багш болҗ төрскн сурһульдан көдлв. Өдгә цагт тууҗин багш болҗ көдлҗәнә.

Шидр Хальмг Таңһчин Толһач Хаска Батун һардврт «Медрл» Әрәсән ниицәнә таңһчд үүлддг әңгин бүртклһнә хүүвин сүүр болв. Олна ниицәнә Әрәсән Өмн үзгин регионмудт делгрлтин заллтын һардач Александр Шматько, Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлач Босхмҗин Гилән, таңһчин Толһачин һардврин ахлач Кирилл Попов, «Медрл» ниицәнә таңһчд үүлддг әңгин ахлач, Б.Б.Городовиковин нертә Хальмг ик сурһулин һардач Салан Бадм, бүртклһнә хүүвин гешүд эн сүүрт орлцв. Тер мет «Медрл» Әрәсән ниицәнә һардачин дарук Георгий Будный ниигмин сүлҗәнә эв-арһар залһлда бәрҗ, сүүрт хәләгдсн төрәр ухан-тоолврарн хувалцв.

Мана орн-нутгин әмтн ямр чигн әәмшгтә йовдлла, зеткрлә харһсн нег һазра улсан даңгин дөңнҗ нөкд болхар шунна. Цергә шишлң керг-үүлдвр эклснәс авн регион болһнд буйнч дөң цуглулдг әңгүд секгдсмн. Тенд цергчнрт керглгдҗәдг хамг юмн хураҗ илгәгднә.

Шидр Әрәсән күч-көлснә болн көдлмшәр тетклһнә цергллтин һардачин дарук Ян Талбацкий мана таңһчд ирәд, әмтиг көдлмшәр тетклһнә цергллтсиг шинрүллһнә керг-үүлдврин йовудыг бүрткв. Хальмг Таңһчин залврин Ахлач Босхмҗин Гилән күндтә гиичлә харһад, «Кадрмуд» келн-улсин төсвин йовудт күцәгдҗәдг керг-үүлдврмүдин тускар күүндв.

Нидн намрар Элстд бүрдәгдсн шар шаҗна нарт-делкән III ик хургт һучн һар орн-нутгин элчнр ирҗ орлцсн билә. Терүнә йовудт мана таңһчин һардвр кесг нутгла цаарандан нөкцлтхәр үгцсн мөн. Эн җилин хөн сард Элстд Энткг орн-нутгин сойлын Өдрмүд болхмн. Энүнә тускар шидр «Калмыкия» РИА-н барин төвд селкүлчнрлә болсн харһлтд келгдв.

Баһчуд дунд төрскн кел тархалһна керг ик чинр зүүҗәнә. Хальмг ик сурһульд болдг хальмг келнә Цугәрәсән олимпиад энүнд туслҗахнь лавта. Одахн, лу сарин чилгчәр, терүнә ашлгч девсңгнь болв.

Шидр нүднә харань муурсн улсин Әрәсән олна ниицәнә (ВОС) таңһчд үүлддг әңгин хург болв. Терүнд тавн җилин эргцд кесн көдлмшин аш диглгдәд, олна бүрдәцин ахлачиг суңһв, намртан Москва балһснд болх ВОС-ин ик хургт орлцх элчиг йилһҗ авв. Әрәсән Өмн үзгт ВОС-ин һардачин күцц зөвтә элч, нүднә харань муурсн улсин Краснодарск крайин ниицәнә ахлач Юрий Третьяк, Хальмг Таңһчин социальн делгрлтин, күч-көлснә болн көдлмшәр тетклһнә министрин дарук Һәрән Ольга, гемтә-шалтгта улсин таңһчин олна ниицәнә ахлач Валерий Решетников хургт орлцв.