Санкт-Петербургд хальмг бичәч Шовуна Евгенийин шин дегтр шидр барас һарв. Эн җил түрүн үүдәврәрн умшачнрин оньг авлсн бичәч хойрдгч дегтрән барлв. Тернь «Четыре» гидг нертә дегтр һарһач барлсн «Шулма» гидг дегтр болҗана.

Элст балһсна негдгч тойгта билг-эрдмин сурһулин сурһульчнрт көгҗмин шин зевсгүд ик байр үүдәв. Келн-улсин төсвин кемҗәнд эн сурһуль көгҗмин зевсгүдәр теткгдв. Энүнлә хамдан сурһулин-методическ утх-зокъял чигн «Сойлын халхд кергтә тоотыг делгрүллһнә чинртә шин девсң тетклһн» гидг шаңһа көтлврәр тернь күцәгдҗәнә.

Городовиковск балһсна хазгудын кадетин бурдәцин сурһульчнр болн теднә эк-эцкнр, багшнр цергә керг-үүлдврт орлцҗадг Хальмг Таңһчин салдсмудт буйнч седклин дөңгән күргнә.

Бар сарин 3-д мана орн-нутгт нерн уга салдсин Өдр болна. Хальмг Таңһчин Толһач Хаска Бату эн өдрин чинриг темдглҗ, Төрскән харсч әмән өгсн салдсмудын санл мөңкрүллһнә көдлмш күцәҗәдг хәәврин багмудын үүлдвриг өөдәнәр үнлв.

Эн өдрмүдт Хальмг Таңһчин Толһач Хаска Бату Әрәсән Федерацин делегацин ханьд Саудовск Аравия орн-нутгт болсн ООН-а Конвенцин Халхсин Хургин 16-ч сессьт орлцв.

Эн җил мана таңһчд эврә дөңцл эдл-аху бәрдг өрк-бүлмүд дунд түрүн болҗ марһан зарлгдв. Терүнд орлцсн өрк-бүлмүд эдл-ахудан ямаран мал асрҗадгин, бичкдүд эк-эцкдән нөкд болҗ терүг асрдгин тускар келҗ өгв. Марһанд диилвр бәрхәр һучн шаху өрк-бүл орлцснь темдгтә болв. Олн-әмтн дууһан өгәд, дииләчнриг йилһҗ авв, тегәд Яшкулин района Молодежный селәнд бәәдг өнр-өсклң Пашаевихн сән гисн эдл-аху бәрдг өрк-бүл болв. Эдниг Дипломар болн 100 миңһн арслңга сертификатар ачлв.

Әрәсән Орн-нутгин Хүүвин депутат, «Негдсн Әрәсә» партин «Эрүл-менд иргч» гидг төсвин региональн зүүцүләч Башанкан Бадм җил болһн болдг «Залу-зөрмгин яршг» керг-үүлдврт орлцад, таңһчин эмнлһст удан цагтан эмнүлгдәҗәдг бичкдүдт наадһас өгүлв.

Хальмг Таңһчас СВО-д орлцҗ йовх цергчнриг СВОИРОДНЫЕ.РФ. гидг бүрдәцд орлцтха гиҗ үрвр кеҗәнә. «Төрскән харсачнр» гидг саң болн Әрәсән Күч-көлснә Герой Денис Проценко цугтад кергтә эн төсвиг эклв.

СВО-н зергләнд хальмг олн көвүд дәәлдҗ йовхинь цугтан меднә. Таңһчин селән болһнас көвүд тенд нерән һуталго церглҗ йовна. Нег һундлтань мана көвүдин зөргтә үүлдврин тускар хая әрәсән соңсхврмудт болн барин һарцст келгднә. Шидр «РенТВ» телеүзлд «Лотос» гидг дуудвртаһар фронтд зөргәрн нер һарсн цергчин тускар келгдв. Дорҗин Бадм толһалҗадг цергчнр хортна бүслврт тусв. Тиигчкәд хортна то дөрвн холванд ик бәәснь хөөннь медгдв.

Үкр сарин 29-30-д Элстд «Әрәсән келн-улс Төрскән яһҗ харссна тускар» гидг Цугәрәсән номин хург болв. Энүг РАН-а Хальмг номин төв болн Әрәсән цергә-тууҗин ниицән бүрдәв. Түрүн өдр болсн сүүриг номин төвин һардач Куукан Виктория һардҗ давулв.