Хальмг Таңһч болн Луганск Улсин Республикин Антрацитовск район хоорнд батлгдсн нөкцлтин медлд Хальмгин эмчнрин баг һурвн дәкҗ тиигәрәр одад, бәәрн әмтнә эрүл-менд шинҗлсн билә. Эн керг-үүлдврмүдин ашт цаглань олн зүсн гем илдкҗ авад, кергтә эмнлһ давулад, зәрм улст месллһн чигн кегдв. Тер мет мана эмчнр олн зүсн төрәр сүв-селвгән өгч, дамшлтарн хувалцна. Т.Хахлынован нертә медицинск колледж болхла Антрацит балһсна медицинск коллледжлә иньгллтин залһлда батрулҗ, хамцу үүлдврин зура батлсн бәәнә. Шидр Антрацитовск районас мана таңһчур эмчнр ирәд, Хальмгин эмнлһсин үүлдврлә таньлдв, бәәрнколледжд одад оютнр өдгә цага эв-арһс олзлҗ, гүн медрл хоршаҗахинь үзв.

Урҗ өдр Әрәсәд эврә сән дурар үүлддг улсин Өдр темдглгдв. Хальмг Таңһчин Толһач Хаска Бату талдан улст дөңгән күргхәр зүткдг седвәртә, шунлтта улсиг сән өдрин байрла йөрәһәд, эднә үүлдвр олнд туста болна гиҗ өөдәнәр үнлв.

Урҗ өдр Әрәсәд эврә сән дурар үүлддг улсин Өдр темдглгдв. Хальмг Таңһчин Толһач Хаска Бату талдан улст дөңгән күргхәр зүткдг седвәртә, шунлтта улсиг сән өдрин байрла йөрәһәд, эднә үүлдвр олнд туста болна гиҗ өөдәнәр үнлв.

Эн өдрмүдт Хальмг Таңһчин Толһач Хаска Бату Әрәсән Федерацин делегацин ханьд Саудовск Аравия нутгт одв. Шидр таңһчин Толһач принц Мишааль бин Мохаммед бин Сауд бин Абдель Азиз Аль Саудла харһв.

Урҗ өдр Әрәсән Президент Владимир Путин орн-нутгин делгрлтин болн келн-улсин төсвсин Хүүвин сүүр давулв. Тавн җилин эргцд келн-улсин төсвс Әрәсән делгрлтд туслад, кесг сай күүнд, тер тоод Хальмг Таңһчд туслв.

Җил болһн бар сарин 9-д мана орн-нутгт Төрскнә Баатрмудын Өдр темдглнә. Эн өдриг 2007 җиләс авн Әрәсән Президентин зәрлгәс иштә темдглдг болсмн. Сән өдрлә Советин Союзин болн Әрәсән Баатрмудыг, Әрүн Георгийин болн Туурмҗин орденмүдәр ачлгдсн улсин ач-тус хәрүлҗ, эднә залу-зөрмгин тускар дорас өсч йовдг баһ үйд медүлхин төлә олн зүсн керг-үүлдвр бүрдәгднә. Авъяст тохрсар, эн өдр Кремльд залд зөрмгән үзүлсн баатрмудла харһлт болна, Әрәсән залврин, Федерацин Хүүвин болн Орн-нутгин Хүүвин гешүд, олна бүрдәцсин, сойлын, номин болн үүдәлтин элчнр терүнд орлцна.

Әрәсән Президент Владимир Путинә шиидврәр зарлгдсн өрк-бүлин җил төгсч йовна. Җилин эргцд мана орн-нутгт, тер тоод Хальмг Таңһчд, терүнд нерәдгдсн кесг керг-үүлдвр болв. Бар сарин чилгчәр Москва балһснд өрк-бүлин җил төгслһнд нерәдгдсн байрин керг-үүлдвр болхмн. Мана таңһчд чигн ашлгч нәр бас болхмн гиҗ зуралгдҗана.

Зулын байрин өмн насан утдулдг авъяс хальмгудт бәәнә. Бурхн Багшин Алтн сүмд җил болһн нас утдуллһна мөргүлмүд болна. Эн җил Зулын байр Хальмгт бар сарин 25-д темдглгдхмн. Тогтсн авъясар нас утдуллһна мөргүлмүд амрлһна өдрмүдт болхмн.

Шидр Хар Һазра района депутатнрин Хургин дарани биш 32-ч сүүр болв. Терүнд цаг-болзгнь төгсснә учрар Виталий Крылов Хар Һазра района муниципальн бүрдәцин толһачин үүләсн сулдхгдв. Депутатнр Хальмгин Баатр Болдра Валерийиг района толһачин үүлд цаг зуур батлх шиидвр авв. Урднь, бар сарин 2-т, Болдра Валерий Хальмг Таңһчин Улсин Хуралын депутатын үүлән уурулҗахин туст эрлһән орулсмн.

Әәдрхнә музейд одахн соньн йовдл болв, хальмг улсин шар шаҗна сойлын презентац болв. Әрәсән номин академин 300 җилин өөнлә ирлцүлҗ эн төсв күцәгдҗәнә.