Хальмг Таңһч болн Луганск Улсин Республикин Антрацитовск район хоорнд батлгдсн нөкцлт батрад, олн халхар делгрәд йовна. Мана таңһчин эмчнр Антрацитовск района әмтнә эрүл-менд харлһна көдлмш күцәҗәнә, жилищн-коммунальн эдл-ахун көдләчнр гермүдин ясвр кеҗ сән таал тогтаҗана, арһлачнр эврәннь эдл-уушан тенд хулдҗана. Хальмг Таңһчин социальн делгрлтин, күч-көлснә болн көдлмшәр тетклһнә министерств болн Антрацитовск әмтнә социальн теткврин хамцу төв (КЦСОН) бас нөкцлтән делгрүлҗ хамцу үүлдҗәнә.

Хальмг Таңһчин Толһач Хаска Бату Санкт-Петербургд давҗадг экономическ нарт-делкән хургин йовудт оютнрин дунд спорт делгрүлҗәдг төләднь «Стилобат» компаньд дииләчин мөрә бәрүлҗ өгв.

Хальмг Таңһч цаарандан делгрхин төлә цуг арһ-чидлән олзлх зөвтә. Шидр Санкт-Петербург балһснд экономическ нарт-делкән XXVII хург эклв. Әрәсәд экономикиг делгрүллһнә туст эннь һол талвңгнь болна.

Эндр мана орн-нутгт социальн көдләчин сән Өдр темдглҗәнә. Эн халхд көдлдг улс медәтнрт, җирһлин күнд таалд туссн, көдлмш хәәҗәдг әмтнд, олн үртә болн баһ тетквртә өрк-бүлмүдт дөң-тусан күргҗ, эднә төрмүд хаһлна. Сүл цагт цергә шишлң керг-үүлдврт орлцачнр болн эднә өрк-бүлмүд бас социальн теткврин болн харслтын онц зөвин туст дөң авна. Урҗ өдр Хальмг Таңһчин залврин сүүрин бәәрнд социальн көдләчин сән Өдрт нерәдгдсн байрин хург болв. Терүнд социальн халхар олн җилдән көдлҗ йовх улсин ач-тус темдглҗ, өөдән ачлвр бәрүлҗ өгв.

Эн долан хонгт Хальмг Таңһчин Улсин Хуралын (Парламентин) 8-ч дарани биш сессь болв. Хальмг Таңһчд ах федеральн инспектор Александр Беляев, Хальмг Таңһчин Толһачин һардврин һардачин дарук Тарбан Савар, Хальмг Таңһчин залврин Ахлачин дарукс, Улсин Хуралд таңһчин Толһачин элч Манҗин Араш, зөв-йосна, зарһин, бүртклһнә болн олна бүрдәцсин элчнр сессин көдлмшт орлцв. Сүүриг таңһчин Улсин Хуралын Ахлач Артем Михайлов һардҗ давулв.

Шидр Хальмг Таңһчин Улсин Хуралын (Парламентин) Ахлач Артем Михайлов «Сән кергин цаг» гидг эврә сән дурар үүлддг улсин җисәнә ахлач Шаран Лейлад Әрәсән харслтын заллтын Келн-улсин төвин һардач Станислав Гаджимагомедовин Ханлтын бичг бәрүлҗ өгв.

«Калмыкия» РИА-н барин төвд дарани брифинг болв. Б.Б. Городовиковин нертә Хальмг ик сурһулин ул деер эн җилин һаха сарин 1-әс авн цергә-сурһулин төв экләд көдлхмн, офицермүдиг энд белдхмн. Эн керг ямаран кевәр күцәгдхин тускар хальмг вузин һардач, биологийин номин доктор Салан Бадм, шин төвин һардач, полковник Дмитрий Марков болн түүнә дарук майор Абушинә Элвг келҗ өгв. Келхд, Дмитрий Анатольевич Марков Кавказд болн Сирийин Арабск Республикд болсн цергә үүлдврт болн Украинд болҗадг цергә шишлң керг-үүлдврт орлцад, Залу –зөргин орденәр ачлгдад, ик дамшлт хоршасн офицер болҗана.

Тадн амр биш, зуг буйнч ,олнд кергтә көдлмш күцәҗәнәт, тадн күнд- күчр таалд бәәдг уга-яду улст дөң-тусан күргнәт.Ик дамшлтта, эврә кергән сәәнәр меддг, өр-өвч седклтә улс сайяд күүнд, тер тоод һанцарн бәәдг, гемтә- шалтгта медәтнр-көгшдт, нөкд болнат, гиҗ орн-нутгин толһач социальн көдләчин сән Өдрт нерәдсн хургт келснь тодлгдна. Дигтә эднә үүлдврлә лавтаһар ирлцҗәдг төв үгмүд болҗана, гиҗ эн кемд сангдв.

Арвн негн җилин туршарт Элст балһсна приставмудын шишлң әңгд Һучна Александр көдлҗ йовна. Бичкнәсн авн хальмг авъяс-заңшал медҗ өсәд, аав-ээҗнь чик сурһмҗ энүнд өгв. Юмнас әәлго, худл келлго, күүнә юм авлго, үлү үзлго, седклән тәвҗ көдлх кергтә, гиҗ аавнь энүнд келдмн.

Хальмг Таңһчд ик күндтә багш, өөдән цолта лам хөн сарин 31-д ирв. Хальмгин шаҗн лам Тензин Чойдакин болн Хальмгин төв хурлын үрврәр ирсн Кунделинг Бурхн Багшин Алтн сүмд гүн номин цәәлһвр өгв. Таңһчин райодар чигн күндтә багш йовв.