Сүл җилмүдт мана таңһчд селәнә эдл-ахун халхин делгрлтд, нег үлү мал өсклһнд онц оньг өггдҗәнә. Эн төр даңгин Хальмгин һардврин бүртклһнд бәәнә. Урҗ өдр Яшкулин районд Хальмг Таңһчд мал өсклһнә болн малын хот кеҗ һарһлһна делгрлтин төрәр селвлцән болв. Таңһчин Толһач Хаска Бату, Улсин Хуралын (Парламентин) Ахлач Артем Михайлов, залврин Ахлачин дарукин үүл дааҗадг Җамбинә Очр, селәнә эдл-ахун министрин үүл дааҗадг Гаван Тимур, Улсин Хуралын (Парламентин) депутатнр, таңһчин райодын муниципальн бүрдәцсин толһачнр, селәнә эдл-ахун арһлачнр болн номтнр терүнд орлцв. Темдглхәс, Әрәсән селәнә эдл-ахун Министерствин тохма мал өсклһнә Департаментин һардач Мирослава Скрынникова болн «Ар Кавказин аграрн номин төв» ФГБУ-н әңгин хөд болн ямад өсклһнә номин-шинҗллһнә күрәлңгин һардач Александр Суров чинртә харһлтд бас орлцсинь заах кергтә.

Шидр «Негдсн Әрәсә» партин Хальмг Таңһчар үүлддг региональн әңгин хург болв. Терүнд партин КРО-н политическ хүүвин болн Президиумин гешүдиг суңһҗ авлһна, Москва балсһнд болх партин XXII чуулһнд мана таңһчас орлцх элчнриг шүүҗ авлһна төрмүд хәләгдв.

Экин сән өдрлә Амр-Санана нертә Келн-улсин дегтрин саңд Әрәсән күүкд улсин ниицәнә Хальмг Таңһчд үүлддг региональн әңгин седвәрәр байрин керг-үүлдвр болв. Терүнд «Өрк-бүлин авъясмуд: үйнрин залһлдан» гидг таңһчин марһанд дииләчнриг ачлв. Олна бүрдәцин гешүд ирсн гиичнрән хальмг авъясар тосад, цәәһәр, шикр-балтаһар тоов.

Эндр олимпиадмудт сурһульчнрин медрлинь гүүдүллһнд, нег үлү эсвәр, физикәр, химийәр, биологийәр сәәнәр белдлһнд һол оньг өггдҗәнә. Мана таңһчин сурһульчнр бас йиртмҗ шинҗллһнә болн гуманитарн кичәләр шунлттаһар Цугәрәсән олимпиадт орлцна. Одахн болхла муниципальн кемҗәнд олимпиадмуд болв. Ирх җилин эклцәр таңһчин болн Цугәрәсән олимпиадын ашлгч девсң бүрдәгдхмн.

Хальмг улсин тууҗд Сиврүр күчәр туугдснь һашута цаг болҗана. Бүкл арвн һурвн җилд хальмг әмтн йосн бишәр гемщәгдҗ, тууврин генәртә цагиг тесч һарсн болдг. Н. Пальмовин нертә Келн-улсин музей тер тууврин цагт нерәдсн керг-үүлдврмүдән эклв.

Шидр зуульчллһна халхар Цугәрәсән наадм - марһан давв. «Әрәсән өврмҗ» гидг нертәһәр болсн соньн ик марһанд зуульчллһна халхар кесг соньн тоот үзүлгдв. Терүнд орлцхар миңһн һар эрлһн орҗ ирсн билә. Терүнәс зуг 300-нь шүүҗ авгдсмн. Әрәсән цуг регионмудин элчнр һәәхүлд эврә кегдлән үзүлв. Теднәснь 50 дииләч йилһгдв.

Урҗ өдр Элстд СВО-н йовудт өшәтнәс бәрҗ авсн зер-зевин болн цергә көлгнә һәәхүл төгсв.

Шидр Элстәс Москваһур һарч йовсн автобус Тамбовск мүҗд гиигн машинлә цокгдад, зеткрлә харһв. Терүнә ашт гиигн машинә залач болн өөрнь суусн күн әмнәсн хаһцв. Автобуст бәәсн зурһан күн шавтад, Тамбов балһсна Архиепископ Лукан нертә эмнлһнд орулгдв.

Одахн Элстд Хальмг ик сурһулин коллектив багшин өдрән өргнәр темдглв. Байрин хургт хальмг вузин багшин-профессорин ханиг таңһчин залврин Ахлач Босхмҗин Гилән йөрәв. «Бидн цааранднь хальмг вузин кесг салврин төсвиг дөңнҗ, нөкцлтән делгрүлҗәнәвидн. Тер мет селәнә эдл-ахун министерствин мөрәс эн халхар күцәҗәх номтнрин шинҗллтд, салврин делгрлтд нилчән күргәд бәәхнь лавта.

Җил болһн бар сарин 1 күртл мана иргнмүд олн зүсн алван шаңһд даңцах зөвтә болна. Эннь хамгин түрүнд өлг-эдин алвн болдгнь лавта. Зуг заагдсн цаг- болзгт өрән эс даңцасн улсин туст цааҗин керг бүтәгддгиг цугтан меднә биший.