Әрәсән Президент Владимир Путинә шиидврәр зарлгдсн өрк-бүлин җил төгсч йовна. Җилин эргцд мана орн-нутгт, тер тоод Хальмг Таңһчд, терүнд нерәдгдсн кесг керг-үүлдвр болв. Бар сарин чилгчәр Москва балһснд өрк-бүлин җил төгслһнд нерәдгдсн байрин керг-үүлдвр болхмн. Мана таңһчд чигн ашлгч нәр бас болхмн гиҗ зуралгдҗана.

Зулын байрин өмн насан утдулдг авъяс хальмгудт бәәнә. Бурхн Багшин Алтн сүмд җил болһн нас утдуллһна мөргүлмүд болна. Эн җил Зулын байр Хальмгт бар сарин 25-д темдглгдхмн. Тогтсн авъясар нас утдуллһна мөргүлмүд амрлһна өдрмүдт болхмн.

Шидр Хар Һазра района депутатнрин Хургин дарани биш 32-ч сүүр болв. Терүнд цаг-болзгнь төгсснә учрар Виталий Крылов Хар Һазра района муниципальн бүрдәцин толһачин үүләсн сулдхгдв. Депутатнр Хальмгин Баатр Болдра Валерийиг района толһачин үүлд цаг зуур батлх шиидвр авв. Урднь, бар сарин 2-т, Болдра Валерий Хальмг Таңһчин Улсин Хуралын депутатын үүлән уурулҗахин туст эрлһән орулсмн.

Әәдрхнә музейд одахн соньн йовдл болв, хальмг улсин шар шаҗна сойлын презентац болв. Әрәсән номин академин 300 җилин өөнлә ирлцүлҗ эн төсв күцәгдҗәнә.

Санкт-Петербургд хальмг бичәч Шовуна Евгенийин шин дегтр шидр барас һарв. Эн җил түрүн үүдәврәрн умшачнрин оньг авлсн бичәч хойрдгч дегтрән барлв. Тернь «Четыре» гидг нертә дегтр һарһач барлсн «Шулма» гидг дегтр болҗана.

Элст балһсна негдгч тойгта билг-эрдмин сурһулин сурһульчнрт көгҗмин шин зевсгүд ик байр үүдәв. Келн-улсин төсвин кемҗәнд эн сурһуль көгҗмин зевсгүдәр теткгдв. Энүнлә хамдан сурһулин-методическ утх-зокъял чигн «Сойлын халхд кергтә тоотыг делгрүллһнә чинртә шин девсң тетклһн» гидг шаңһа көтлврәр тернь күцәгдҗәнә.

Городовиковск балһсна хазгудын кадетин бурдәцин сурһульчнр болн теднә эк-эцкнр, багшнр цергә керг-үүлдврт орлцҗадг Хальмг Таңһчин салдсмудт буйнч седклин дөңгән күргнә.

Бар сарин 3-д мана орн-нутгт нерн уга салдсин Өдр болна. Хальмг Таңһчин Толһач Хаска Бату эн өдрин чинриг темдглҗ, Төрскән харсч әмән өгсн салдсмудын санл мөңкрүллһнә көдлмш күцәҗәдг хәәврин багмудын үүлдвриг өөдәнәр үнлв.

Эн өдрмүдт Хальмг Таңһчин Толһач Хаска Бату Әрәсән Федерацин делегацин ханьд Саудовск Аравия орн-нутгт болсн ООН-а Конвенцин Халхсин Хургин 16-ч сессьт орлцв.

Эн җил мана таңһчд эврә дөңцл эдл-аху бәрдг өрк-бүлмүд дунд түрүн болҗ марһан зарлгдв. Терүнд орлцсн өрк-бүлмүд эдл-ахудан ямаран мал асрҗадгин, бичкдүд эк-эцкдән нөкд болҗ терүг асрдгин тускар келҗ өгв. Марһанд диилвр бәрхәр һучн шаху өрк-бүл орлцснь темдгтә болв. Олн-әмтн дууһан өгәд, дииләчнриг йилһҗ авв, тегәд Яшкулин района Молодежный селәнд бәәдг өнр-өсклң Пашаевихн сән гисн эдл-аху бәрдг өрк-бүл болв. Эдниг Дипломар болн 100 миңһн арслңга сертификатар ачлв.