Мы не можем представить сейчас свою жизнь без гаджетов - смартфонов, планшетов, айфонов, которые позволяют получать доступ к любой информации и развлечениям, социальным сетям.

Ниш нертә сербск балһснд ах-дү болсн балһсдын түрүн наадм өргмҗтә бәәдлд давв. Улсин хоорндк сойлын залһлда батллһнд нилчән күргх эн наадм орн-нутгуд нөкцҗ үүлдлһнә талвң болх гисн күслтәһәр кегдсн мөн.

Н. Пальмовин нертә Келн-улсин музей Санкт-Петербургд болсн аһу ик кемҗәтә һәәхүлд орлцв. «Константин и Владимир Маковские. Любовь земная и небесная» гиҗ тер ик төсв нерәдгднә.

Нижний Новгород балһснд дегтрин саңгудын соньн нег төсв экләд үүлдв. «Иньгллтин утх-зокъялын тагт» гиҗ тер төсв нерәдгднә. В. Жуковскийин нертә бичкдүдин дегтрин саң эн седвәр татсмн. Әрәсән улсин ниицлтин җилд эн соньн төсв нерәдгдҗәнә.

Тууҗд орсн Ялтинск хургт болсн Ливадийск бәәшңд «Модные Агоны» гидг нертәһәр өдгә цага хувцна ик кемҗәтә наадм-хәләвр шидр давв. Шин кев-янзта хувц кеҗ һарһдг эрдмчнр цуг орн-нутгас цуглрҗ ирв. Манҗин Аркадин нертә Хальмг филармоня медлд үүлддг хальмг хувцна театрин художественн һардач Татьяна Милованова чинртә эн керг-үүлдврт орлцв.

Мөчн сарин 12-т мана орн-нутгт хамгин чинртә байр – Әрәсән Өдр темдглнә. Һучн дөрвн җилдән эн сән Өдр орн-нутгт бәәдг олн келн-улсиг хамцулҗ, мана тугин, сүлдин болн частрин чинр олнд медүлҗ өөдлүлнә.

Хальмг Таңһчин һардвр Әрәсән кесг регионмудла экономикин делгрлтд туслх нөкцлтин бооцас батлҗана. Одахн Санкт-Петербург балһснд болсн экономикин нарт-делкән ик хургин йовудт Хальмгин залврин Ахлач Босхмҗин Гилән Тульск мүҗин губернаторин түрүн дарук – залврин Ахлач Михаил Пантелеевла харһад, экономикин, зуульчллһна, спортын, сурһуль-эрдмин болн талдан халхсар нөкцлтхәр күүндсн билә.

Мөчн сарин 9-д Элстдү«Негдсн Әрәсә» партин Хальмг Таңһчин әңгин хург болв. Энүг нүр үгәр таңһчин Толһач, партин таңһчин әңгин сегләтр Хаска Бату секв. «Мана партин гешүд урдк кевәр таңһчин делгрлтин төлә цуцрлтан угаһар көдлҗ, әмтнә бәәдл-җирһл ясрулҗ, эврә зурасан теднә некврлә ирлцүлҗ үүлдх гиҗ Бату Сергеевич темдглв.

Хальмг Таңһчин Улсин Хуралын (Парламентин) депутат, «Делгрлтин күчн» җисәнә һардач Михаил Богатов дарани харһлт давулад, таңһчин экономик делгрүллһнә туст ямаран төрмүд эркн чинртә болҗахин тускар күүндв. Хальмг Таңһчин Олна палатын гешүд эн харһлтд орлцад, босхгдсн төрмүдәр ухан-тоолврарн хувалцҗ сүв-селвгән орулв. Келхд, күүндвр харһлтын эклцәс авн керг-төрин бәәдлд давулгдсинь темдглхмн.

Әрәсән Баатр, батальона һардачин дарук, ах лейтенант Очр-Һәрән Нарн цергә даалһвран күцәҗ йовад әмнәсн хаһцсна туск һашута зәңг таңһчин олн-әмтиг үүмүләд, күн болһнд ик зовлң үүдәв. Хальмг Таңһчин Олна палатын седвәрәр Советин Союзин Баатр Басан Городовиковин бумбин өөр Нарн Алексеевичин зург тәвгдсн билә. Эн өдрмүдт таңһчин әмтн нааран ирәд, цецгүд тәвәд, зул өргәд, Әрәсән Баатрин санл тевчҗәнә. Эн күнд цагла таңһчин улс Әрәсән Баатрин өрк-бүлиг дөңнҗ, зовлңгинь хувалцҗана.