Бийдән тааста эрдм шүүҗ авхар

23-07-2020, 12:16 | Таңһчин зәңгс » Сурєуль-эрдм

Авъяст тохрсн ЕГЭ шүүвр өгдг сурһульчнрин эрүл-менд тетклһнә керг-үүлдврт урдк кевәр һол оньган өгч бүрткхмн гиҗ әрәсән гегән-герлин министр Сергей Кравцов регионмудт дуудвр кев. Тиим селвлцәг министр регионмудын сурһуль-эрдмин органмудын һардачнрла кев, эн хургин йовудт ЕГЭ өглһнә кампаня ашиг диглҗ шүүвр авлһна пунктын көдлмшәр күүндвр кев.
Өдгә цагт ЕГЭ өглһнә цуг зокал дигтә-даратаһар күцәгдҗәнә, федеральн министерств эн туст тасрхан уга мониторинг болн бүртклһ күцәҗәнә. Тер мет сурһуль-эрдмин бәәрн органмуд тиим үүлдвр бас кеҗәнә.
«ЕГЭ өгдг пунктс кергтә кергсләр болн нань чигн тоотар теткгдсн бәәнә, олн күн дегц гемнсн йовдл уга, гиҗ министерствин көдләчнрин күцәсн мониторинг үзүлв», – гиҗ министр темдглв. Зуг халу дүрснәс көлтә шүүврт эс оруллһна йовдл учрсн бәәҗ. Тегәд бүртклһиг цааранднь кесн деерән улм чаңһах кергтә гиҗ министр регионмудт селвгән өгв. Удл уга дарани шүүвр болхмн, ноха сард цаглань шүүвр эс өгсн сурһульчнрин ЕГЭ өглһнә кем эклх. Тер цагт бас олн күн эн керг-үүлдврт орлцх.
Регионмудт сурһульчнр шүүврт орлцлһна диг-даран кегдсн бәәнә, кен ямаран цагла ирхинь гиһәд, тиим кевәр эдн олн күн нег ормд бичә цуглртха гиһәд саглҗав. ЕГЭ өгдг пунктд орлһна болн һарлһна диг-даран чигн йилһгдв.
Шүүвр өглһнә кемд көдлдг багшнриг шаңнлһна төрмүдт министр бас һол оньган өгв. Эднд урмдулгч шаңнлһн болн эн кемд көдлснә төлә даңцалһн бас өггдх зөвтә. Цуг регионмуд ЕГЭ-н төрәр селвг авхин төлә олна иткүлин телефон: + 7(495)104-68-38 бәәнә, энүгәр специалистнр олн сурврт хәрү өгәд бәәх.
Эн җил ЕГЭ 620 миңһ һар күн өгчәнә. Мөчн сарин 15-с авн ЕГЭ-д белдхин төлә гегән-герлин министерств регионмудын телеүзлд 2270 болн радиод 485 сурһулин көтлвр бүрдәв.
Тер мет 8 миңһн зәңгллһнә көтлвр көдлв, теднәс һоллгчнь «Моя школа online» болн «Российская электронная школа» көтлвр белдгдв.
Йирдән хальмг сурһулин сурһульчнр ЕГЭ-н шүүвриг сәәнәр өгнә. Орс келнә, эсвин, литературин, һазадын келнә болн нань чигн шүүвриг, яһад гихлә кесг сурһульчнр һол предметән сәәнәр өгхин төлә дигтә-даратаһар белдҗәсмн. Багшнрнь чигн эднд гүн медрл өгхин төлә олн җилдән шунҗасмн. Тегәд чигн хальмг сурһульмудын төгсәһәчнр хамгин нертә вузмудт орлһна үзмҗәр орн-нутгт нүүрт йовна.
Арвтнрас кесгнь Хальмг Ик сурһульд орна, яһад гихлә җил ирвәс энд сурһулин таал ясрад йовна. Ода Хальмг ИС региона түшгч вузин өөдән нер зүүнә, эндр 40 һар һазадын орна оютн сурна, тер тоод СНГ-н орн-нутгудас, Азийәс болн Африкәс.
Хальмг оютнр чигн ах курсмудт академическ сольлцана зокалар талдан орн-нутгин вузд орҗ сурна, тер тоод Китдин, Моңһлын, Москван болн Санкт-Петербургин вузмудт сурһульд одна, тенд магистратурт болн аспирантурт сурна. «Мана хальмг университетд сурхд йир таасмҗта, энд күн болһнд оньган өгнә, олимпиадт, талдан керг-үүлдврт орлцулна, тегәд чигн бидн эсвин вузмудын хоорндк олимпиадт дииләчнр боллавидн. Москван болн нань чигн балһсдын вузмудт тиим юмн уга, күн болһн эврә ухаһар бәәнә, болв оютнриг тасрхан угаһар урмдулад, уралан зөрүлх кергтә. Дамшлтта сурһмҗлачин оньг оньдин кергтә болна», – гиҗ Хальмг ИС оютнр келнә, тиигчкәд тиим олимпиадт һанцхн математикүд биш, талдан чигн кесг факультетын элчнр орна. Эдниг багшнр түрүн курсмудас авн эсвәр соньмсулна, теднә билг-эрдминь делгрүлнә. Тегәд арвтнр таңһчин һоллгч вузиг шүүҗ авхла, төрүц эндүршго. Зуг шүүврән сәәнәр өгх кергтә.

ТүРВәН Һуна

Видео