Земск багш Дорҗин Светлана

30-09-2020, 15:47 | Таңһчин зәңгс » Күн болн җирһл

Шидр Хальмг Таңһчин Толһач Хаска Бату «Земск багш» гидг көтлвр мана таңһчд сән йовудтаһар күцәгдснә тускар келсн билә. Эн җил эклсн эн көтлврәр таңһчин селәдин сурһульмудт 17 багш ода көдлҗәнә. Теднә негнь Баһ Дөрвдә района Плодовитенск дундын сурһулин эсвин багш Дорҗин Светлана. Светлана Борисовна сурһуль-эрдмин халхар хөрн тавн җилдән көдлҗ йовх байн дамшлтта болн өөдән мергҗлттә багш болна. Бидн энүнд җиңнүләд, шин көдлмшин ормднь үүрмүднь болн сурһульчнрнь яһҗ тоссна, сурһулин җилин түрүн сар яһҗ давсна тускар келҗ өгхинь сурвидн.
Хальмг Ик сурһуль төгсәснә хөөн баахн Светлана Яшкулин района Привольненск сурһульд күч-көлснә хаалһан эклсмн. Хөөннь эн Ик Буурла района Көвүд селәнә сурһульд багшлв. Тенд көдлҗәсн цагтан Светлана Борисовна «Земск багш» гидг көтлврт орлцхар шиидәд, документсан комиссьт орулв. Темдглхәс, эн җил эн көтлврин марһанд орлцхар кесг күн документсән орулсн билә, болв зәрмснь терүнә некврлә ирлцсн уга.
Светлана Борисовнан келсәр, авальнь Баһ Дөрвдә района Зурһан селәнд өсәд-боссн күн болна. Тегәд Городовиковск, Октябрьск, Лаганя, Яшкулин болн Баһ Дөрвдә райодас альдаран йовхинь шүүҗ авх кергтә болхла эдн авалиннь төрсн һазрт одхар шиидв. Көвүнь гертә-малта, дотр-дундын кергүдин халхд көдлҗәнә, күүкнь оютн болна, Хальмг Ик сурһульд сурчана. Тегәд эдн авальтаһан Баһ Дөрвдә района Плодовитое селәнүр нүүв. Селәнә муниципальн бүрдәц ирсн багшт гер йилһҗ өгв, эдн тенд сән таал тогтаҗ ясвр кеҗәнә. Селәнә сурһульд 8 багш көдлнә, 33 сурһульч сурна. Хамдан көдлҗәх үүрмүднь Светлана Борисовнаг сәәнәр тосв, эдн энүнд дөң-тусан күргҗ, түрүн өдрәснь авн ямр нег төр хаһлхд орлцна. Дорҗин Светлана 5-ч классин багш болна, энүнә хәләврт тавн сурһульч бәәнә.
- Селәнә сурһульд җилин эргцд эсвин багш уга бәәсмн. Сурһульчнрин то ик биш, зәрм класст неҗәһәд сурһульч бәәнә, тегәд күн болһнла онц занять давулҗ гүн медрл өгхәр шунҗ көдлхв. Ирх җилд 9-ч классиг нег көвүн, 11-ч классиг нег күүкн төгсәхмн, түрүн өдрәс авн бидн шүүврт белдвр эклвидн. Шидр сурһульчнр ВПР-ин даалһврмуд күцәв. Җилдән багш уга бәәснь медгднә, болв бидн арднь орҗ сурһулян дасад, эрк биш сән күцәмҗ бәрхвидн. Эсвин кичәлд дурта, сән медрлтә күүкд-көвүд бәәнә, тегәд бидн олимпиадт белдхәр зуралҗанавидн. Көвүдә сурһульд багшлҗасн цагт сурһульчнрм муниципальн болн таңһчин олимпиадт орлцдг билә. Мини сурһульчнр дунд экономистнр, банкин көдләчнр, тоочнр бәәнә, тегәд энд сурчах күүкд-көвүд эсвд бас дуран өгч сәәнәр сурхин төлә арһ-чидлән болн седклән тәвҗ көдлхв,- гиҗ Светлана Борисовна келв.
«Земск багш» гидг көтлврәр Дорҗин Светлана тавн җилдән эн селәнд багшлх зөвтә. Күүкд күүнә келсәр, эдн авальтаһан нааран ирсндән хармсн уга. Эн селәнә бәәрн улс төрскн һазр-усндан эңкр, цаһан седклтә улс болна, тегәд эдниг цуһар сәәнәр тосв. Энд газ бәәнә, гер болһна өөр бурһугдсн усн йир әмтәхн, һазр чигн сән, тегәд герән ясад, хавртан сад-һаруд тәрәд, бичкн эдл-аху бәрх санан бәәнә гиҗ Светлана Борисовна келв. Эн бийнь цецгүд урһахдан дурта болна, тегәд герин һаза түрүн цецгүднь ода нүд байрлулна.

ДАВАН Сәәхлә

Видео