Седвәртә күүкд улс

19-10-2020, 15:43 | Таңһчин зәңгс » Эндрк ґдрин тґрір

Эн җил Әрәсән күүкд улсин ниицән (СЖР) 30 җилин өөнән темдглҗәнә. Эн җилмүдин эргцд седвәртә, шунмһа болн билгтә күүкд улсин олна бүрдәц мана орн-нутгин олна-политическ бәәдл-җирһлд шунмһаһар орлцҗ, дорас өсч йовх баһчудт төрскнч сурһмҗ өглһнә, сойл, авъяс хадһллһна, өрк-бүлин чинр өөдлүллһнә керг-үүлдврмүд бүрдәсмн. Мана таңһчд эн ниицәнә региональн әңг арвн хойр җил хооран бүрдәгдсмн. Эндр терүнә ханьд 150 күн орна, ниицәг Кензән Киштә толһална. Давсн амрлһна нарта өдрлә Элст балһснд Әрәсән күүкд улсин ниицәнә өөнд нерәдгдсн марһана аш диглгдҗ, терүнд диилвр бәрсн улсиг йөрәв.
Хальмг Таңһчин Олна палатын ахлачин дарук, «Дари добро» гидг буйнч седклин саңгин ахлач Шамован Эльза күүкд улсин ниицәнә өөнлә йөрәһәд, региональн әңгин шунмһа орлцачнр Каарун Майяд болн Увшин Татьянад Ханлтын бичгүд бәрүлҗ өгв. Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан илгәсн йөрәлин бичгиг Чилән Елена олнд умшад, күүкд улс таңһчин социальн-экономическ төрмүдт шумһаһар орлцҗ, баһчудт төрскнч сурһмҗ өглһнә, дәәнд орлцачнрин санл мөңкрүллһнә халхд аһу ик көдлмш күцәҗәхиг темдглв. Региональн әңгин ахлач Кензән Киштәд социальн делгрлтин министерствин Ханлтын бичг бәрүлҗ өггдв.
Күүкд улсин ниицәнә региональн әңг таңһчин сурһуль-эрдмин бүрдәцст залу-зөрмгин кичәлмүд давулна, Афганистанд болн Чечняд әмнәсн хаһцсн мана нег һазра улсин санл мөңкрүллһнә төлә 4 фильм цокҗ авсмн, Төрскән харсгч Алдр дәәнд орлцсн ветеранмудын зөв харслһна көдлмш бас күцәҗәнә. Эн чинртә төрмүд хаһллһнд баһ-дүүвр насндан дәәнә һалд әмнәсн хаһцсн салдсмудын экнр орлцна, төрскнч седклтә улс ач-тусан күргнә. Тегәд байрин хургт номт Манҗин Николайд, Афганистанд болн Чечняд зөрмгән һарһад әмнәсн хаһцсн салдсмудын экнрин ниицәнә гешүд Коваленкон Надежда болн Очр-Һәрән Валентина Гризодубован Валентинан медаляр ачлгдв. Очр-Һәрән Валентина әмнәсн хаһцсн салдсмудын экнрин олна бүрдәц тогтаһад, күүкд улсин ниицәнлә хамдан 4 фильм цокҗ авсмн, таңһчин сурһульмудт зу һар кичәл давуллһнд орлцсмн.
Тер мет Әрәсән күүкд улсин ниицәнә 30 җилин өөнд нерәдәд, региональн әңгин шунмһа гешүд Аккайин Наталья, Каарун Майя өөнин медаляр ачлгдв. Ачлвр авсн күүкд улст СЖР-ин темдг болҗах шеемг альчур белглв. Эн җил Алдр Диилврин 75 җилин өөнд нерәдгдсн «Санлын дольган» гидг Цугәрәсән марһанд ончрсн бичкдүдиг болн оютнриг байрин хургт бас йөрәһәд, Күндллһнә һашгуд бәрүлҗ өгв. Эн марһанд диилвр бәрсн баһчуд дунд Сарпан района Салын Тугтн селәнә сурһулин 9-ч классин сурһульч Мучкан Александран белдсн көдлмшин тускар Киштән Ивановна онц келв. Эн күүкн дәәнд орлцач Обуш Эрднеевич Хаглышовин болн авальнь Нүүдлә Хулхачиевна Мишкееван тускар хәәврин көдлмш бичсмн. Обуш Эрднеевич дәәнд орлцсна туск документс уга болснас иштә ветерана нер зүүсн уга, авальнь чигн тылд көдлҗ йовсн бийнь бас иткл цаасн уга болна. Киштән Ивановна кесг сайтд зәңг хәәснә ашт О.Э.Хаглышов дәәнә цагт Курск бәрлдәнд орлцсна туск иткл цаас олҗ авв. Һундл төрхд, ветеран ода уга, болв Нүүдлә Хулхачиевна ода дәәнә орлцачин белвснә нер зүүҗ чадхмн. Киштән Ивановна энүнд бәрүлҗ өггдсн альчуриг ээҗд белглхәр шиидв. СЖР-ин региональн әңгин гешүн Бадакан Татьяна баһчудт эврәннь дегтрмүдән белглв.
Харһлт үр-иньгин таалд давв. Баһ наста дуучнр Босхмҗин Диана болн Учра Виктория еңсг сәәхн дууһарн седкл байсав.

ДООҖАН Наталья
А.Зундугинован цоксн зург