Әрәсән күчн – цуг мадна һарт

16-02-2021, 14:19 | Таңһчин зәңгс » Зіњг

Одахн Әрәсән Президент Владимир Путин олнд зәңгллһнә барин һарцсин ах редактормудла харһҗ күүндв. Орн-нутгин толһач олн-зүсн төрәр тоолвран медүлв.

Бурушагч үүлдврт әмтнә кесгнь тоолвр угаһар орлцҗахинь Путин заав. Өдгә цага бәәдл амр биш болҗахинь кен эс меднә. Иим бәәдлин учрнь олн. Кесгнь терүг медхәр седҗәхш. Юм таасдго тиим улсиг олзлдг чидлмүд йосна зөв угаһар бурушагч үүлдврт тедниг орлцулв. Бәәдл муурхла, йосн гемтә гиҗ нег хәрү өгнә. Болв бәәдлиг ясруллһар йосн кеҗәсн тоот диг-даратаһар ашан өгчәхинь үзҗәхш. Цуг терүгинь медҗ орн-нутгин һардвр күнд бәәдлиг гиигрүлхәр баһ биш көдлмш кеҗәнә. Орн-нутгин аграрн халхд күцәмҗ бәргдв. Нань чигн халхар уралан ишкдл кегдҗәнә.
Болв иим бәәдлиг болн энүгинь эс таасчах әмтнә үүмлһинь олзлад, тедниг бурушагч үүлдврт орлцулсинь темдглв. Яһад тиим болҗахинь күн цәәлһҗәхш. Ю хәәҗ цәәлһхмб? Эс таасчах улсиг тиигәд олзлхд эвтә болҗана. Зад татад, әмтиг йосна өмнәс босхад бәәдг чидлмүд тиигҗ үүлднә. Ямаран керг-үүлдвр күцәгдҗәхинь медүлхш. Керг-үүлдврин ашнь тер дарунь ирдгог медәд бәәҗ, тиим чидлмүд әмтиг үүмүлхәр седнә. Орн-нутгт тогтсн бәәдлиг эвдхәр тиигҗ әмтиг олзлна. Орн-нутгт чигн, һазадын орнд чигн Әрәсә чидл уга, күцәмҗ уга нутг болтха гисн тоолврта чидлмүд бәәнә. Коронавирус гемәс мадн һарч чадшго гиҗ тоолҗасн улс бәәнә. Чадвидн. Түргәр түгдг гемиг зогсаҗ болх һурвн вакцин ахр цагин дотр үүдәҗ һарһад, мана номтнр-биологуд уралан ик ишкдл кев. Эннь бас таасгдҗахш. Эрүл-менд харлһна системан дарунь оңдарулҗ, гемиг зогсаҗ чадшго гиҗ, кесгнь иткмҗтә бәәсмн. Болв талдан орн-нутгудас түрүлҗ мана эмчнр болн эн халхин көдләчнр чидлән хамцулҗ, түргн кевәр әәмшгтә гемиг зогсахар шунад, зөвәр күцәмҗ бәрв. Хамгин түрүнд, әмтнә җирһл харсҗ авгдв. Эн һол ик диилвр. Болв, эн күцәмҗ дурго болдгинь уурулҗахш.
Әәмшг уга бәәдл тетклһнә тускар келхлә, дәәнд олзлх шин селм кеҗәхин тускар зәңглхд маһдлҗасн, мадниг шалһҗасн улс ода альд бәәнә?! Ода эн төрәр делкән кемҗәнд болдг күүндврмүд Әрәсән орлцлһн уга кегдхш.
Маднд кех тоотнь ода чигн олн. Болв бидн хәрү цухршговидн, темдглсән күцәх иткмҗтә үүлдҗәхин тускар Президент иткүлв. Талдан олн келн-әмтнәс йилһрхләрн Әрәсән олн-әмтн көгшрҗәх келн-әмтн биш. Әрәсән әмтн уралан делгрҗ йовх одачн баһ наста келн-әмтн болҗана. Мана генетическ уң-тохм күчтә. Тер күчн Әрәсән олн келн-улсин өөрхн залһлдан, зууһад җилмүдин туршарт ни-негн өрк-бүләр бәәлһн болҗана. Пассионарностин туск номин тоолврт иткҗәхән Президент тиигҗ медүлв.
Төрскнч седклин туск тоолврнь әмтнә оньг эзлхнь маһд уга. Эврә һазр-усндан дурта боллһн йирини седкл болҗана. Өдгә цагт тогтҗах бәәдл үүмх, эн төрт оньган өгх, чик шиидвр авх тоолвр орулҗахин тускар Президент келв. Эврәннь тууҗан меддго, аав-ээҗән күндлдго, ах үйин улсиг тевчдго йовдлын ашнь йир әәмшгтә болхмн.
Президент Японьла бәрҗәх хәрлцәнә, Донбассин тускар, һазадын орна ик монопольс экономикд му нилчән күргдгин тускар, нань чигн чинртә төрмүдәр Владимир Путин Әрәсән СМИ-н ах редактормудла күүндв. «Дөрвдгч йосн» гиҗ тоолгддг барин көдләчнрин даавр ямаран ик болҗахнь эн харһлт медүлв.

ХӨӨЧИН Галина

Видео