Улсин тууҗ болн җирһл Ошлана Владимирин зургудт

13-05-2021, 14:49 | Таңһчин зәңгс » Сойл

Эн җилин мөрн сарин 29-д хальмг зурач Ошлана Владимир 60 җилин өөнән темдглх бәәсмн. Болв билгтә зокьялчин болн цаһан саната эн күүнә җирһл харм төрхд ахр бәәҗ. 2015 җилин лу сарин 10-д зурач зуурдар өңгрсмн.
Тер җил зурачин һәәхүл белдҗ секгдсн билә. Терүндән белдәд Владимир зөвәр байрта бәәсинь, кееһә хувцан өмсәд, герлтсн чирәтә музейд ирҗ, зургудан дәкн хәләһәд, дигләд, музейин көдләчнрлә һәәхүлд белдәд, шоглад, зәрм тоотынь тодлад, сән седклтә бәәсинь ода үүрмүднь болн өөрнь хамдан көдлҗ йовсн әмтн тодлна. Ода Н. Пальмовин нертә Келн-улсин музейд секгдсн һәәхүлнь зурачин һарсн өдрләнь ирлцв. Музейин директорин дарук Новомлина Ирина цуглрсн улсиг зурачин намтрла болн үүлдврин һол тоотлань таньлдулв. Зурачин үүлдвр олн зүсн халхта бәәсинь, зург болһнаснь седклин зальнь герлтҗ, хәләсн күүнә оньг авлдгинь таңһчин сойлын болн зуульчллһна министр Түрвән Саглр, Хальмгин зурачнрин Ниицәнә ахлач Дорҗин Виктор, музейин һардач Муучан Ирина келсн үгдән темдглв.
Ошлан Владимир Әәдрхнә муҗин Харабалинск района Заволжье селәнд төрсмн. Хошуда хурлас хол биш өссн көвүн хальмгудын баатр тууҗар даңгин соньмсдг бәәсинь зургудтнь үзҗ болхмн. Тууҗла эн залһлдаһинь Әрәсән ачта зурач Ботин Степан темдглв. Ошлан Владимир олн зүсн янзар зурдг бәәсинь һәәхүлд тәвгдсн 52 зург үзүлҗәнә. Төрскн һазрин өңг-бәәдлиг үүдәврмүдин йилһвр болҗах өңгтә ширднь шиңгрәд, ода мадна оньгиг авлҗана. Омг өгчәсн һазрин бәәдлиг болн әмтнә заң-авциг үзүлхләрн зурач седклин бүлән хәләцәрн зургудан дүүргсн болҗ маднд медгднә.
Иим өвәрц нәрн кевәр энүнә үүдәлт төрскн тееглә болн хальмг улсин тууҗла залһлдата болҗахинь һәәхүлд, үзнәч, байрлҗ һәәхнәч. Әмтнә оюни җирһл, бурхн-шаҗна төрмүд сүл цагт зурачин оньгинь эзлҗ йовсмн. Энүнә күүкн Баинан болн көвүн Баатрин келсәр, эднә өрк-бүлд кен-ахан күндлдг, ээҗин заавриг хамгин түрүнд һарһдг сәәхн авъяс бәәсмн. Өрк-бүлнь үүдәлтднь урмд өгч, җирһлин түшг бәәснь маһд уга.
Җаңһрч Шаран Дмитрий, «Байн тег» бииһин коллектив һәәхүл секлһнд орлцҗ, дууна болн бииһин эрдмәрн зурачин үүдәврмүд мана җирһлин салһгдшго нег хүвнь болҗахинь сәәхн эрдмәрн медүлв.
Тедү мет зурлһна эрдмнь җирһлднь һоллгч орм эзлҗәсмн. 1980-ч җилд Әәдрхнә художественн училищ төгсәсн цагас авн таңһчин сойлын җирһлд Ошлана Владимир шунҗ орлцҗ йовла. Таңһчин, регионмуд хоорндк, Әрәсән олн һәәхүл - марһаст энүнә үүдәврмүд эрк биш орман олҗ йовла. Архитектор, дизайнер болҗ үүлдәд, Москвад хурл тосхлһнд, Элстд Долан Хонгин күрдин талвң кеерүллһнд эн көдлсмн. Әрәсән зурачнрин Ниицәнә гешүн, ЮНЕСКО-н билг-эрдмин нарт-делкән ниицәнә гешүн Ошлана Владимирин һәәхүл Н. Пальмовин нертә Келн-улсин музейд хөн сарин 25 күртл көдлхмн. Хальмгин билгтә зурачин үүдәврмүдлә таньлдҗ, таңһчин тууҗин тускар, күүнә әмдрлин тускар ухалх цаг олтн.
Галина ХЕЙЧИЕВА

Видео