Бурятин эмчнрт дөң-тусан күргв

22-07-2021, 17:00 | Таңһчин зәңгс » Зіњг

Хальмг Таңһчин эрүл-менд харлһна көдләчнр пандемий эклснәс авн ах-дү болдг Бурять Республикд хойр дәкҗ одад ирв. Давсн җилд хальмг эмчнрин болн дунд медицинск көдләчнрин баг түрүн болҗ тиигәрән одад, коронавирусн гемәс хөрлһнд дөң-тусан күргсмн. Сар хооран мана делегац дәкн Улан-Удэ балһснд одад, таңһчин бичкдүдин клиническ эмнлһнд (ДРКБ) көдлв.
Эмчнр реаниматологуд Үстин района эмнлһәс Бокуша Игорь болн Яшкулин района эмнлһәс Мантыша Александр, медицинск эгчнр Октябрьск районас Оксана Зубенко болн Үстин района эмнлһәс Һәрән Елена тиигәрән одв. Темдглхәс, Оксана Николаевна хойрдад Бурять орв. Таңһчин делегациг Бокуша Игорь һардҗ йовсмн. Эн өөдән мергҗлттә болн байн дамшлтта эмч болна, эрүл-менд харлһна халхд 34 җилдән көдлҗәнә, терүнәснь һучн җилдән Үстин района эмнлһнд үүлдҗәнә. Пандемий эклсн цагас авн Игорь Николаевич коронавирусн гемәс хөрлһнә кергт шунмһаһар орлцҗана, эн П.Жемчуевин нертә таңһчин эмнлһнә, Деед Яшкулин санаторн сурһулин, Сарпан болн Яшкулин райодын эмнлһсин улд үүлдсн госпитальмудт көдлв.
Делегацин ханьд орсн көдләч болһн инфекционн госпитальд көдлҗ хальдврта гемәс хөрлһнә халхд дамшлт хоршасмн. Гемтсн улст ямаран эмнлһ кехинь, эн гем ямр кевәр күүнә эрүл-мендд харшлтан күргдгиг эдн сәәнәр меднә. Бурятьд ирсн дару эдниг таңһчин бичкдүдин клиническ эмнлһнә улд үүлдсн госпитальд йовулв. Сара хонгтан Хальмгин эрүл-менд харлһна көдләчнр Бурятин үүрмүдтән дөңгән күргв.
– Хальмг Таңһчас ирсн мана үүрмүд таңһчин эмнлһнә көдләчнрт ик дөң болв. Нег үлү эн гем икәр түгәд, эпидемиологическ бәәдл нәрн болсн цагт эрүл-менд харлһна көдләчнр күртлго бәәв. Ахнр-дүүнр болдг хойр таңһчин эмчнр болн дунд медицинск көдләчнр хальдврта болн әәмшгтә гемиг зогсахин төлә арһ-чидлән негдүлҗ хамцу үүлдв. Бидн Хальмгин эрүл-менд харлһна көдләчнрт зүркни ханлтан өргҗәнәвидн, – гиҗ таңһчин бичкдүдин клиническ эмнлһнә көдләчнр темдглв.
Шидр Бурятин ДРКБ-н ах эмч Анатолий Дмитриев эмчнр Бокуша Игорьт болн Мантыша Александрт, дунд медицинск көдләчнр Оксана Зубенкод болн Һәрән Еленад Ханлтын бичгүд бәрүлҗ өгв.

БАТАН Наталья


Бурятин эмчнрт дөң-тусан күргв

Видео