Сән таалд чинртә эмнлһ авх

17-08-2021, 15:35 | Таңһчин зәңгс » Зіњг

ПАСУГИНА Элистина, Манҗин Валентинан нертә таңһчин бичкдүдин медицинск төвин ах эмчин дарук:
- Балһсна бичкдүдин поликлиник эврә бәәрн уга билә. 70-ч җилмүдт поликлиникд зуг цөөкн кабинет бәәсмн, хөөннь бидн таңһчин бичкдүдин эмнлһнә медлд үүлддг болвидн. Тегәд шин сәәхн бәәр бичкдүдин төлә тосхснь ончта болн темдгтә йовдл болв. Энд 30 педиатрическ участк үүлдхмн, нааран көлгн-күчн йовдг болхмн, дәкәд поликлиник балһсна төвд бәәршлҗәхнь тааста болҗана. Урднь рентген кехин төлә 4-ч микрорайонд бәәдг эмнлһнд одх, нань талдан шинҗллтд орхин төлә филиалд одх кергтә бәәсмн. Ода болхла нег ормд педиатрическ участкуд, лабораторь, шишлң мергҗлтнр үүлдҗәнә, УЗИ болн нань чигн шинҗллт кедг кабинетмуд бәәнә. Гемтсн цагтан эмчд ирсн бичкдүд иим ке-сәәхн таалд тусад, дарунь эдгх гиҗ сангдна. Бичкдүдин төлә энд цуг таал тогтагдв, нааддг талвң чигн бәәнә, сарул хораст чеерүдән күләхд тааста болхмн. Келхд, шин поликлиник секгдҗәхиг соңсад, һурвн баахн эмч мана коллективин тоод орв.

ЧУЖАН Наталья, таңһчин бичкдүдин зөв харсдг күцц зөвтә элч, олн үртә эк:
- Бидн поликлиник секгдхиг теңкән уга күләҗәләвидн. Би тавн үртәв, тегәд бичкдүдт эмчнрин дөң кергтә болна. Эндр поликлиник секгдҗ, энд көдлҗәх эмчнр болн дунд медицинск көдләчнр шин бүүрән йөрәҗәнә. Бидн поликлиникин көдләчнрт ханлтан өргҗәнәвидн, эдн кергән сәәнәр меддг, өөдән мергҗлттә көдләчнр болна, түрүн сурврар дөңгән күргхдән белн бәәнә. Поликлиникд көдләчнрин болн бичкдүдин төлә сән таал тогтагдснь таасгдв. Энд гемтә-шалтгта бичкдүдин төлә цуг таал бәәхнь бас сән. Дәкәд нааран ирсн улс эврәннь көлгән үлдәхин төлә зогсал тосхгдснь чинртә. Поликлиникин һаза бичкдүд нааддг талвң бәәнә, тегәд эк-эцкнр күүкдтәһән чеерүдән күләҗ цаган сергмҗтәһәр давулҗ чадхмн.

ЖУЖАН Елена, поликлиникин 7-ч участкин медсестра:
- Би таңһчин эрүл-менд харлһна халхд 40 һар җилдән көдлҗәнәв, терүнәснь һучн тавн җилдән поликлиникд. 2005 җиләс авн би эмч Любовь Байраевна Оджаевала хамдан көдлҗәнәвидн, мана участкд 820 күүкн-көвүн бәәнә. Шин поликлиникд кабинет болһнд компьютер, сплит-систем бәәнә, тегәд көдлмшән чинртәһәр болн үнн-чик седклтәһәр күцәхин төлә цуг таал бәәнә. Энд цуг участкуд, лабораторь, физио-әңг үүлдхмн, тегәд нег ормд цугинь кеҗ болхмн. Мана поликлиникд хамдан көдлҗәх улс цуһар ниитә, нег-негән дөңнҗ көдлнә. Амрлһна өдрмүдт бидн нааран ирҗ цугинь хураҗ, көдлх орман белдсн биләвидн. Эндр өдрәс авн бидн шин поликлиникд үүлдврән эклҗәнәвидн, эннь маднд ик урмд өгчәнә.

ГОШЕНДАН Амулң, олн үртә эк:
- Би һурвн үртәв, авальтаһан хойр күүк болн нег көвү асрҗанавидн. Эндр мана хотл балһснд шин поликлиник секгдв. Бичкдүдин төлә өдгә цага болн ке-сәәхн бәәрн тосхгдснь ик байр үүдәв. Бидн күүкдтәһән байрин керг-үүлдврт орлцвидн, таңһчин бичкдүдин медицинск төвин һардвр маднд белг белглв. Келн-улсин театрин артистнр наад үзүлв, бичкдүдиг тооһад, сергмҗтә нәр бүрдәснь кесгтән тодлгдхнь лавта.

Видео