Цугәрәсән марһанд диилвр бәрв

23-10-2024, 12:19 | Таңһчин зәңгс » Сурєуль-эрдм

Элстин классикин гимназин 11- ч классин сурһульч Дурдуса Данара (зургт) «Туужин тускар тодрхаһар» гидг сойлын болн гегән –герлин Цугәрәсән ик нертә марһанд диилвр бәрв.

– Түрүләд онлайн таалд мана гимназин 11-ч классмудын сурһульчнр марһанд орлцҗ амр биш олн зүсн даалһвриг күцәлә, эдн цугтан тууҗар соньмсна, тегәд хойр классин сурһульчнр марһанд орлцхар седхләнь, теднә седвәринь дөнңүв. Түрүн девсңд мана сурһульчнр он-лайн көдлмшин өрәлинь күцәх зөвтә бәәсмн, дәкәд эдн хойрдгч девсңгин даалһвринь күцәв, бас 70-ас авн 90 процент күртл даалһвр кев, теднәс зуг тавн күүг шүүҗ авад, Москваһур ашлгч девсңд йовулв.Таңһчин кесг сурһульмудын элчнр тер марһанд орлцҗала, зуг тиим ик күцәмҗ бәрҗ чадсн уга, тегәд мана гимназин арвтнриг шүүҗ авв, – гиҗ тууҗин болн обществознаня багш Мацга Светлана келҗ өгв.
Светлана Алексеевнан цәәлһсәр, таңһчин сурһуль-эрдмин министерствин закврар кесг сурһульмуд марһанд орлцв. Түүнә йовудт 10-ч классин медрл олзлгдҗала, 1914 җиләс авн 1945 җилин хөөн чигн учрсн цагин йовуд хәләгдҗәсмн, тер кемиг, тер тоод Төрскән харсгч Алдр дәәнә тууҗиг чигн, сурһульчнр йилһән сәәнәр медх зөвтә бәәсмн.
Түрүн девсңд эдн 25 минутын эргцд 40 сурврт хәрү өгх зөвтә бәәсмн. Хойрдгч әңгд эдн бас ирлцңгү кемҗәтә көдлмш күцәв, зуг сурврмуднь нәрдәд бәәлә. Марһана хойр девсңгиг эдн дааҗ һарв. Кесг региона хамгин түрүнд Өмн үзгин болн Ар үзгин Кавказин федеральн округудын сурһульчнриг, бүрдәһәчнр шүүҗ авв, дәкәд эдн талдан мүҗсин сурһульчнрин медрлинь сөрв гиҗ эн багш цәәлһв.
Дәкәд регион болһнас йилһән сән 5 сурһульч йилһҗ авгдв. «Туужин тускар тодрхаһар» гидг төсв 15-ас авн 18 күртл наста арвтнрт тууҗин тускар гүн медрл өгх күсл тәвҗәнә. Хальмг Таңһчас зуг классикин гимназин сурһульчнр ашлгч девсңд һарв. Москваһур йовх багин ханьд арвн негдгч классин арвтнр орв, тер тоод Һашуна Айса, Сильнән Һәрә, Дурдуса Данара, Елисей Курдюков болн Мөңкән Чиңһс, эднә көдлмшиг Светлана Алексеевна һардсмн.
Хулһн сарин 12-т Хальмг Таңһчин, Ингушетин, Ар үзгин Осетин-Аланя, Кабардино-Балкарин болн Карачаево-Черкесин болн Сарпулин крайин уйн наста элчнр Москвад Поклонная уулд бәәдг Диилврин музейд одв, эннь көтлврин һоллгч талвң болв.
Энд бәәлһнә йовудт арвтнр олн зүсн наадн-квестд орлцҗ, «Олн улсин күцәсн баатр үүлдвр» гидг һәәхүлиг тодрхаһар шинҗлв, ашлгч даалһвран 2 частан күцәв. Элстин классикин гимназин сурһульч Дурдуса Данара хамгин сәәнәр тер төсвин даалһвриг күцәсн болҗ һарв. Тиим кевәр жюрин шиидврәр Данара Цугәрәсән марһана дииләч болҗ йилһгдв. Тер мет талдан региона хойр элч бас хойрдгч болн һурвдгч ормс эзлв. Наадк арвтнр бас дипломсар ачлгдла.
Тиим кевәр эднә багш Мацга Светлана күүкдиг тууҗар йоста кевәр соньмсулҗ чадв. Марһан сойлын болн гегән-герлин төсвин кемҗәнд давулгдв.
Марһана чилгчәр Дурдуса Данара тоолврарн хувалцв: «Нанд цугнь таасгдв. Музейд бәәсн соньн хамг тоотыг һәәхвидн, туста медрл хоршаҗ ашлвр келәвидн, даалһврин амр биш сурврмудт хәрү өгхин төлә тер медрл маднд туста болв. Талдан регионмудас ирсн орлцачнрла таньлдҗ, тоолврарн хувалцвидн. Тиим ик кемҗәтә керг-үүлдврт урднь орлцад уга биләв, эннь мартгдшго йовдл болҗ тодлгдх.
Данараг болн хамдан сурдг үүрмүдинь ик күцәмҗлә йөрәҗәнәвидн, талдан чигн ик марһаст орлцҗ, таңһчин нер дуудулҗ йовтха!
ТҮРВӘН Һуна

Видео