Шидр Элстд Хальмг Таңһчин улсин җаңһрчин нер зүүсн Лиҗ-Һәрән Баатрин 60 җилин өөнд нерәдгдсн «Эрктнә нутгин дуд» нертә концерт болв. Терүнд Баатр Сангаджиевичин Баина күүкнь болн Хальмг Таңһчин ачта артист Шаран Дима орлцҗ, бас билг-эрдмәрн байрлулв.

Делкәд алдр Чиңһс хаана һарсн өдрлә Хальмг Таңһчд моңһл кинон Өдрмүд болв. Сойлын гегән-герлин чинртә эн төсв үкр сарин 20-әс авн 23 күртл болв. Ах-дү келн- әмтиг залһлдулҗадг эн төсв Хальмгт хойрдад күцәгдв. Хальмгин хәләһәчнр моңһл кинон үүлдәчнрин шин үүдәврмүдлә таньлдв.

Залу-зөргин үүлдврәрн туурсн, төрскән харслһнд әмән әрвлдго мөңкинд мартгдшго үлгүр болсн Хальмг мөрн цергә дивизин бүрдсн өдриг Хальмг Таңһчд шидр темдглв. Эндрк үйин баһчуд ах үйин баатрмудын санлыг күндлв.

Хальмг Таңһчин Толһач Хаска Бату йиртмҗин көрңгин болн эргндк бәәдл харлһна министрин үүлд Һооҗура Санлыг батлв.

Тууҗлгч чинртә йовдл Хальмгин җирһлд учрҗана. Мана һазра көвүн, күндтә Тензин Норзанг (гелң Мукөвүнә Санл) Бурхн Багшин гүн номин хамгин өөдән цол, гевш лхарамбан, ачта цол зүүҗәнә. Энткгин Дрепунг Гоманг хурлд эн ик чинртә шаҗна үүлдвр күцәгдҗәнә.

Шидр Ростов-на-Дону балһснд «Энтн мана өрк-бүлин авъяс» гидг Цугәрәсән марһана девсң болв. Терүнд Әрәсән Өмн үзгин болн Ар Кавказин дуһргудын, Донбассин болн Новороссин өрк-бүлмүд, ут тоодан 238 өркин 1234 элч цуглрв. Марһан үкр сарин 13-ас авн 16 күртл болв, өрк-бүлмүд олн зүсн даалһврмуд күцәсн деерән Ростов-на-Дону балһсна тууҗла таньлдҗ, цаган соньнар давулҗ, хоорндан үр-иньгин залһлда батлв. Марһана ашт 52 өрк-бүл Әрәсән марһанд орлцх зөв авв. ЮФО-н олн һазрас 22 өрк ончрад, дииләчнрин тоод орв. Тедн дунд Хальмг Таңһчин элчнр, өнр-өсклң Боктаевихнә өрк-бүл бәәхнь бахмҗта. Марһана ашлгч девсң Москва балһснд ирх җилин така сарин 8-д өрк-бүлин, дурна болн итклин Өдрлә болхмн.

Шидр Элстд мана таңһчд делкән юстиц бүрдснәс авн 25 җилин өөнд нерәдсн байрин хург болв. Хальмг Таңһчин Хуралын (Парламентин) ахлач Артем Михайлов, залврин ахлач Босхмҗин Гилән, энүнә дарук Өлзәтин Марина, ЮФО-д Әрәсән Президентин элч, ах инспектор Александр Беляев, цергллтин ветеранмуд, зарһсин көдләчнр, йосна элчнр болн талдан гиичнр терүнд орлцв.

Одахн орн-нутгин Президент Владимир Путинә зәрлгәс иштә Хальмгин суңһврин комиссин сегләтр Наталья Федорченко Әрәсән суңһврин халхин ачта көдләчин нер зүүв.

Хальмг Таңһчин әмтнә социальн теткврин хамцу төвин «Өрк-бүл» гидг әңгд сарин туршарт «Ангелочек на СВО» гидг керг-үүлдвр болв. Олн үртә, баһ тетквртә болн җирһлин күнд таалд туссн өрк-бүлмүд эн кергт орлцҗ, цергә даалһвран күцәҗ йовдг нег һазра улсиг дөңнҗ наадһас кев.

«Кадрмуд» гидг келн-улсин төсвин «Көдлмш олҗ авхд туслдг керг-үүлдврмүд» гидг көтлврин йовудт әмтн шин эрдм өңгәр сурч, шин көдлмш олҗ авч чадҗана. Ода мана таңһчд 353 иргн эн көтлврин йовудт шин эрдм дасчана, 13 күн сурһулян төгсәсн бәәнә.