2024 җилд таңһчин һардвр селәнә эдл-ахун мергҗлтнрлә хамдан мелиорац делгрүлхин болн малын хот кеҗ һарһхин туст шишлң көтлвр батлв. Терүг күцәлһнә йовудт 2030 җил күртл 17 миңһн гектар аһу һазр олзлад, малын хот кеҗ һарһлһиг икдүлҗ болхмн.

Шидр Хальмг Таңһчин Толһач Хаска Бату зун наста көгшә Манҗин Нинаг йөрәв.
Арвн зурһатадан Нина Горяевна экләд көдлв, тер цагт эцкнь болн ахнь фронтд дәәлдҗ йовсмн. Дәәнә цагиг болн Сиврин туувриг дааҗ һарад, дөрвн үрән өскәд, эндр йисн ач-зееһин болн нәәмн җич-зеенчин күцәмҗнь энүнә төлә бахмҗта болна.

Давсн долан хонгин чилгчәр Элстин политехникин колледжин 60 җилин ончта өөниг багшнр болн оютнр өргнәр темдглв.
Ода орн-нутгт хамгин түрүнд техникин халхар бат медрл өгх күсл тәвгдҗәнә, тиим даалһвриг орн-нутгин һардвр болн Әрәсән залвр өгчәнә. Яһад гихлә ода шин эв-арһсин, йоста биш ухалврин цаг ирҗ йовна. Тегәд техникин сурһуль-эрдмтә мергҗлтнр ода хамгин түрүнд керглгдҗәнә. Мана таңһчин залвр бас тиим неквр тәвҗәнә. Ода зәңгллһнә халхар көдлдг улс кергтә болҗана. Тер эрдмтә мергҗлтнриг Элстин политехникин колледжд дасхна, энд өдгә цагин лабораторьмуд болн компьютерин классмуд бәәнә, дамшлтта багшнр бат медрл өгнә.

Шидр Элстд 37 күн олн җилин туршарт эврә сән дурар цусан өгч, кесг күүнә әм аврсн төләдән «Әрәсән ачта донор» гидг нер зүүв. «Негдсн Әрәсә» партиг дөңнлһнә олна штабд болсн харһлтд ачта донормудыг ачлҗ, темдгинь бәрүлҗ өгв. Ачлвр авсн улс дунд УФСИН-ә, МЧС-ин, дотр-дундын кергүдин бүрдәцсин, эрүл-менд харлһна, сойлын көдләчнр, зарһин приставмуд болн таңһчин селәдин эгл улс билә.

Намр төгсхдән өөрдхлә Зулын байр өөрдҗ йовхин темдг болна. Бурхн Багшин Алтн сүмд Зулын өмн болдг мөргүлмүд эклҗәнә. Шин җил зөвтән орхин өмн насан утдулх әмтн терүнд орлцҗ чадҗана.

Сүл һурвн җилин эргцд шаңһа бүрдәцс кеҗ-күцәҗәдг керг-үүлдврмүдин тускар ниигмин сүлҗәнд зәңглҗ, иргнмүдлә бат залһлда бәрх йоста болҗана. Тегәд ода шаңһа болн бәәрн һазрт йос заллһна бүрдәцс ниигмин сүлҗәнд шишлң халхс секч, бәәрн улсиг соньмсулҗадг , бачм чинртә зәңгллһиг олнд күргҗ медүллһнә дааврта керг күцәҗәнә. Оңданар келхд, ирлцңгү кергин ашт кен-негнәннь төр сән таларн хаһлгдх зөвтә гисн неквр тәвгдҗәнә.

«Медрл» ниицән «Төрскән харсачнр» саңла хамдан цергә шишлң керг-үүлдврт орлцачнрин болн ветеранмудын төлә гегәрүлгч харһлтс бүрдәҗ, олн зүсн лекцс умшна. Хулһн сарин чилгчәр эннь экләд, 400 һар цергчиг хамцулв.

Җил болһн таңһчин селәнә эдл-ахун көдләчнр элвг урһц хураһад, олз-оруһан икдүлнә. Кесг җил дарандан мана фермермүд Өмн үзгин дуһргт, тер мет Әрәсәд ончрад йовна. Эн җил урһц хуралһна кем сән йовудтаһар давв, гиҗ келҗ болхмн.

Сәәхн намрин кемд Элст балһсна 16-ч тойгта «Бадм цецг» бичкдүдин сад 55 җилин ончта өөнән темдглв. Хальмг Таңһчин сурһуль-эрдмин болн номин министерств, Элст балһсна һардвр сурһуль-эрдмин бүрдәцин көдләчнриг, бичкдүдиг болн эк-эцкнриг йөрәхәр байрин керг-үүлдврт ирв. Өкәр бичкдүд күндтә гиичнрән тосад, билг-эрдмән үзүлв, сурһмҗлачнр кеҗ-күцәҗәдг көдлмшин күцәмҗин тускар олнд медүлв.

Хальмг Таңһчин Толһач Хаска Батун зәрлгәс иштә Буурла Ольга «Балһсна поликлиник» эмнлһнә бүрдәцин ах эмчд батлгдв. Ольга Евгеньевна эн эмнлһнд 2020 җиләс авн көдлҗәнә, дигтә коронавирусн гем түгҗәсн кемд эн шишлң багин ханьд әмтнд дөң күргсмн. Ахр цагин эргцд эмч кергән сәәнәр меддгән, цагин некврлә ирлцҗ үүлддгән, кергән даавртаһар күцәдгән медүлсмн, тегәд хамдан көдлҗәдг үүрмүднь бүрдәцин һардачин үүлд батлсн шиидвриг байртаһар тосв.