Шидр Хальмг Таңһчин Толһач Хаска Батун һардврт бат тосхлтын объектсин тосхлт, реконструкц, бат ясвр тетклһнә региональн штабин селвлцән болв. Терүнд таңһчин правительствин гешүд, райодын муниципальн бүрдәцсин толһачнр, тосхлтын болн дулаһар, шамар болн газар тетклһнә бүрдәцсин элчнр орлцв.

Давсн долан хонгин чилгчәр таңһчин Толһач Хаска Бату Әрәсән МЧС-ин Хальмг Таңһчар үүлддг заллтын көдләчнрлә хамдан модд суулһв. Эн керг-үүлдвр Әрәсән МЧС-ин региональн заллтын һардач Мальтина Мергнә седвәрәр бүрдәгдв.

Театрин нарт-делкән өдриг таңһчд Басңга Баатрин нертә Келн-улсин драматическ театр, драмин болн шог наадна орс театр, «Өөрднр» бииһин театр темдглнә. Режиссермуд, артистнр, зурачнр, наад белддг олн нань чигн мергҗлтнр болн көдләчнр эрдмин сән өдрән ик байртаһар тосна. Давсн цагин дотр тәвгдсн нааддан тодлад, артистнрин күцәмҗиг темдгләд, эн өдр кесгнь үүдәгч үүлдвриннь үнллһиг олна.

Моһа сарин 22-т Советск Союзин Герой, Әрәсән ачта цергә летчик, РФ-н дотр-дундын кергүдин министрин ах селвгч болн Хальмг Таңһчин Толһачин селвгч Очра Валерий 70 җилин ончта өөнән темдглв. Төрскн таңһчиннь делгрлтд ик тәвцән орулсн төләднь Хальмг Таңһчин Толһач Хаска Бату Валерий Николаевичд Хальмгин Геройин нер зүүлһәд, өөдән ачлвринь бәрүлҗ өгв. Маңһдур Элстд Очра Валерийин 70 җилин өөнд нерәдгдсн байрин керг-үүлдвр болхмн. Эн өдр угтҗ хальмг улсин шүлгч Нуура Владимир Очра Валерийин ончта өөнд нерәдәд шүлгән белглҗәнә.

Дөрвн Өөрдин тууҗиг XVII-ч зун җилин эклцәс авн XVIII-ч зун җилин дунд күртл шинҗлхлә, һазрин зургт Хальмг, Зүнһар, Көк-Нуурин һурвн Хаант улсиг (ханство) үзҗ болхмн. Өөрд-моңһлын тууҗиг сәәнәр меддго улс эн һурвн Хаант нутг оңдан улс гиҗ буруһар меддг болх. Болв наадк улс зүнһар, хальмг, көк-нуурихн һурвнд йилһән юунд бәәнә гиҗ бас тодрха медхш. Тегәд эн төриг мана статьяд хәләҗ үзий.

Таңһчин әмтнә социальн теткврин комплексн төвд «Гарденотерапия» гидг көтлвр күцәгдҗәнә. Терүнд орлцҗах медәтнр олн зүсн цецгүд урһаҗ, цаган тустаһар болн сергмҗтәһәр давулна. Эдн цецгүд урһалһна туст дамшлт хоршаҗ, хоорндан сүв-селвгәрн хувалцҗ, тааста кергәр соньмсна. Дәкәд эннь медәтә улсин эрүл-менд батруллһнд туслна гиҗ эн көтлвр күцәлһиг һардҗах комплексн төвин көдләч Галина Трухина келнә.

Удл уга эн җилин така сарин 26-д мана таңһчд Бурхн Багшт шүтдг әмтн ончта өөнән темдглхмн. Яһад гихлә минь тер өдрлә дигтә 30 җил хооран Дала Ламин гегән түрүн болҗ Хальмг Таңһчур баралхлҗ ирсн болдг. Эн йовдл таңһчин төлә ик гидг байрт хүврәд, хөөннь мана регионд шаҗн түргәр делгрснь маһд уга.

Мана таңһчд коронавирусн гемәр гемтсн түрүн күн илдкгдснәс авн дигтә җил болв. Тер цагас авн җилин туршарт таңһчин эрүл-менд харлһна көдләчнр эн хальдврта гемәр гемтсн улст дөңгән күргҗ, күнд-күчр таалд көдлҗәнә. Гемтә улсин то икдәд бәәхлә таңһчин эмнлһсин улд ут тоодан 6 госпиталь үүлддг болв. Сүл цагт эпидемиологическ бәәдл ясрҗахас иштә кесгнь үүлдврән зогсаһад, урдк кевәрн әмтнд медицинск дөң күрглһнә халхар көдлдг болв. Мана таңһчд 200 миңһн күүнә эрүл-менд шинҗлгдҗ, коронавирусн гем илдкҗ авхин төлә 170 миңһн ПЦР-шинҗллт кегдв. Пандемий эклсн цагас авн мана таңһчд ут тоодан 19859 күн эн хальдврта гемәр гемтв, теднәснь 18978 күн эдгв.

Шидр Хальмг Таңһчин правительствин Ахлачин негдгч дарук – финансин министр Шурһчин Очрин һардврт болсн селвлцәнд «Хальмг Таңһчин түрүн медицинск дөң күрглһнә халхиг ясруллһн» гидг региональн көтлврин медлд райодт олн дамшлтын эмчнрин офисмуд (ВОП) тосхлһна төр хәләгдв. Селвлцәнд таңһчин эрүл-менд харлһна, финансин, һазрин болн өлг-эдин хәрлцәнә министерствсин болн ФОМС-ин территориальн әңгин һардачнр орлцв.

Хальмгин Толһач Хаска Бату таңһчд шин көдлмшч ормс бүрдәлһн региона экономическ делгрлтин эркн чинртә төр болҗана гиҗ темдглв. Эн төр хаһлҗ, күч-көлснә рынкиг шин кадрмудар тетклһиг, предприять-бүрдәцслә, дунд шишлң болн деед сурһульмудла хамцу үүлдх кергтә гиҗ таңһчин Толһач правительствд даалһвр өгв. Тер мет баахн мергҗлтнриг белдхин төлә таңһчин даалһврар баһчудыг сурһульд йовуллһна төр хаһлх кергтәг даалһв.