Эн җилин һаха сарин 1-әс авн 2025 җилин түрүн өрәлд барт бичгдлһнә дааврта кем эклв. Эн саамд мана седкүлчнр таңһчин селәд- поселкудар йовҗ,эврә умшачнрла харһдг мөн. Шидр иим нег харһлт Лагань балһснд болснь бас эврә учрта гих кергтә,юңгад гихлә минь эн районд хамгин олар хальмг газетән бичүлҗ умшдг болна. Тегәд кесн ачиг хәрүлдг гидгәр,Көк теңгсин көвәд бәәдг «Хальмг үннә»итклтә үүрмүдтән ханлтан өргҗ,бүлән үгмүд келснь басл зөвтә болв.

Хальмг Таңһчин Улсин Хуралын (Парламентин) депутатнр Луганск Улсин Республикин Антрацитовск района әмтнд дөң күргҗ, мана хойр регион хоорнд батлгдсн нөкцлт делгрүллһнд ик оньг өгнә. Одахн депутатнр бәәрн әмтнә төлә дулан хувц, хот-хол болн өдр-бүрин йовудт керглгдх нань чигн эд-тавр илгәв.

Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина таңһчин залврин медлд үүлддг санитарн-противоэпидемическ комиссин сүүр давулв. Терүнд моом гемәс саглуллһна немр керг-үүлдврмүд күцәлһнә болн уудг усар тетклһнә төрмүд хәләгдв.

Элстд Хальмг ик сурһулин ул деер «Сүлҗәнә дорд үзгин төриг шинҗллһн» гидг нертә VII нарт делкән хург болв.

Төрскән харсгч Алдр дән гүргүдән орсн кемд хальмг улсиг олна хортнд тоолад, цааҗла харһулад, төрскн һазраснь хол Сиврүр тусмн. Залу улс дәәлдҗ йовсн цагт гертнь көгшд, күүкд улс болн бичкдүд улдсмн. Эднә өөрхн улсиг цааҗла харһулсна тускар дәәлдҗ йовсн салдсмуд медсн уга. 1944 җилин үвлин чилгчәр-хаврин эклцәр хальмг салдсмудыг фронтас буулһад, келн-улсин онц әңг бүрдәгдҗәнә гиҗ мекләд, Широковск ГЭС-ин тосхлтд йовулсмн. Эннь хальмг улсиг цааҗла харһуллһна хойрдгч девсңгнь болсмн.

Хулһн сард соньн олн йовдлмуд учрҗана. Теднә тоод Хальмг Таңһчд Моңһлын нертә артист, билгтә дууч Самандын Жавхлан Элстд гиичлҗ ирснь темдгтә болв. Моңһлын нертә дуучин орлцата иньгллтин концерт Элстд болв. «Алтн намр» гиҗ нерәдгдсн тер концертд моңһл дуучла нег тәәз деер Хальмгин дуучнр бас орлцв.

Хальмг Таңһчин Толһач Хаска Бату ах-дүүһин Моңһл орн-нутгас ирсн делегацла харһв. Моңһлын болн Тыван ачта артист Самандын Җавхлан, «Тод номын гэрэл» олна бүрдәцин һардач Баатарҗав
Бат-Амгалан болн «БОЖСС» компанин һардач, «ОТ-Тур» зуульчллһна компаня һардачин дарук Цэвээн Оюна, «Мана Моңһл мандана» олна бүрдәцин һардачин дарук Төгс-Эрдэнэ харһлтд орлцв.

Шидр Москва балһснд Кремлевск Бәәшңд «Җилин сән гисн өрк-бүл» Әрәсән марһанд дииләчнриг ачллһна байрин хург болв. Мана орн-нутгин олн үртә, селән һазрт бәәдг, өвкнриннь авъяс хадһлдг, баахн болн тәвн һар җилдән хамдан бәәдг сән гисн өрк-бүлмүд тавн багар ачлгдв. Эдн эврәннь бәәдл-җирһлин болн күцәмҗин тускар олнд медүлҗ, хоорндан бат залһлда батрулҗ, орн-нутгин хотл балһснд сергмҗтәһәр амрад ирв. Эн җил марһанд 11 миңһн өрк-бүл орлцв, теднәснь 388 өрк региональн девсңд ончрад, ашлгч дөрлдәнд орлцх зөв авсмн. Марһана ашар 88 өрк-бүл «Җилин сән гисн өрк-бүл» Әрәсән марһана дииләчнр болв. Хальмг Таңһчас Олег Владимирович болн Цаган Анджаевна Цереновихн «Авъяс хадһлдг өрк-бүл» гидг багд диилвр бәрв.

Хальмг Таңһч болн Луганск Улсин Республикин Антрацитовск район хоорнд батлгдсн нөкцлтин медлд социальн бүрдәцс бат залһлда бәрҗ, иньгллтин хәрлцә делгрүлҗәнә. Мана таңһчин болн Антрацитын әмтнә социальн теткврин хамцу төвмүд ниитәһәр үүлдҗ, җирһлин күнд таалд туссн улст дөңгән күрглһнә туст дамшлтарн хувалцҗана. Давсн долан хонгт Антрацитас эрмдгтә бичкдүд таңһчд ирәд, гемтә-шалтгта бичкдүдин реабилитацин төвд эмнлһ авчана.

1943 җилин бар сарин 28-д хальмг гер болһна үүдәр буута салдсмуд хундгар цоксн кемәс авн найн негн җил болн гиҗәнә. Тиигхд мана аавнр-ээҗнрин, ахнр-эгчнрин, нилхдин кесг миңһәд улс киитн Сиврин һазрт мөсн-цасар даргдад үлдв. Бүкл өрк-бүләрн киитн, түлән уга гермүдт әмтн көлдәд үкчәснә туск герч бас бәәнә.
Тууврин һашута эврә тууҗан нанд Элстин бәәрн күн Чумда Валентина келҗ өгв. Эцкнь Лиҗин Увш дәәнә өмн Далвңга әәмгә «Чимбә» гидг сәәхн нертә хальмг хотнд бәәсмн (ода тернь Әәдрхнә мүҗ мөн).