Хальмг ик сурһулин өөнин эң-зах уга нәр-наадн цальград өргҗәд йовҗ, улм ик то әмтиг, оютнриг, багшнриг орлцулҗ цааранднь болад бәәнә. Тернь үкр сарин 10-д Элстд Ойрат- арена спортын төвд йилһән сәәнәр сурдг оютнрт нерәдсн байрин хургас эклв. «Хальмг ик сурһулин нүүрләчнр – Хальмг Таңһчин иргч» гиҗ эн нерәдгдв. Цуг дацңгудын йилһән сәәнәр сурдг оютнр, теднә эк-эцкнр, һазадын орнас - Моңһлас, Казахстанас, Узбекистанас, хам-хоша бәәдг Әәдрхнәс, Ростовас, Аһшас, Бурятяс, Омскас, Томскас, Москваһас болн Санкт-Петербургас болн Әрәсән Номин академәс ирсн номтнр, күндтә нань чигн гиичнр цуглрв.

Шидр Әрәсән эрүл-менд харлһна министрин дарук Татьяна Семенован һардврт болсн селвлцәнд медицинск болн фармацеватическ дунд шишлң болн ик сурһуль төгсәсн баһчудыг көдлмшәр тетклһнә төрәр өргн күүндвр болв. Ниигмин сүлҗәнә эв-арһар болсн селвлцәнд орн-нутгин регионмуд орлцад, чинртә төрәр ухан-тоолврарн хувалцв. Хальмг Таңһчин эрүл-менд харлһна министр Саран Булат, Б.Городовиковин нертә Хальмг ик сурһулин һардач Салан Бадм, Т.Хахлынован нертә медицинск колледжин һардач Манҗин Кермн болн таңһчин эмнлһсин ах эмчнр селвлцәнд орлцв.

Хальмг Таңһчин Толһач Хаска Батун даалһврар Хальмг Таңһчин Улсин Хуралын (Парламентин) Ахлач Артем Михайлов күч-көлснә ветеран Гелий Кимд Өмн үзгин дуһргин «Келн-улсин бахмҗ - 2025» гидг олна мөрән лауреат болснлань йөрәв. Таңһчин делгрлтд ик тәвцән орулсн Гелий Ким Советин Союзин Баатр Б.Б.Городовиковин орденәр ачлгдсмн, Хальмг Таңһчин күндтә иргн болна. Одахн эн Әрәсән Өмн үзгин дуһргт «Келн-улсин болн сойлын негдлтстин күцәмҗтә нүүрләч» гидг марһанд диилвр бәрв.

Үкр сарин эклцәр Геленджик балһснд Әрәсән нүднә харань муурсн улсин ниицәнә (ВОС) нүүрләчнрин ик хург болв. Краснодарск крайин региональн әңгин седвәрәр бүрдәгдсн керг-үүлдвр президентск мөрән саңгин дөңгәр давулгдв. Терүнд Әрәсән Өмн үзгин болн Ар Кавказин федеральн округудын 19 региональн бүрдәцин 80 һар элч цуглрв. Хальмг Таңһчас ВОС-ин региональн әңгин ахлач Эрнцнә Людмила болн энүнә нөкд Оруса Лидия орлцв.

Өдгә цагт мана таңһчд олн үртә өрк-бүлмүдин то өсәд йовна. Тиим бүлмүдт өссн көвүд-күүкд нег-негән хәләҗ, дөңнҗ, хоорндан ниитәһәр бәәдг. Кезәнәс авн мана аавнр-ээҗнр арвн болн энүнәс үлү үр һарһад өскдг билә. Эндр болхла өвкнрин үлгүрәр баахн эк-эцкнр бас олн үртә болхар седҗәхнь бахмҗта.

Москвад үкр сарин 5-д Кремльд Әрәсән Президент Владимир Путин келн-улс хоорндк хәрлцәнә төрәр үүлдҗәдг Хүүвин гешүдлә харһв. Эн харһлтын йовудт «Межэтническ журналистикин Гильдин» президент Маргарита Лянге орн-нутгин Толһачд «Звук Евразии» гидг нертә винилов альбом бәрүлҗ өгв.

Улсин негдлтин өдрлә соньн нег керг-үүлдвр эклв. Мөр унҗ хаалһд һарч йовх седвәриг Дагестанд татсмн.

Сочи балһснд үкр сарин 10-д дарани нарт-делкән кинонаадм көдлмшән эклв. В. Меньшовин нер зүүҗәдг эн наадм 20-ч кемдән кегдҗәнә.

Хальмгт җил болһн сарин литәр хулһн сарин 22-т бурхн-шаҗна сән өдр темдглгднә. Бурхн Багшин гегән 33 бурхна таралңгин орнас бууҗ ирсн өдр олнд йир евәлтә болна.

Хальмг Таңһчин Толһач Хаска Бату канализацин цеврллһнә сурвлҗна тосхлтын йовудыг бүрткв. Эн чинртә төсв күцәгдәд, таңһчд коммунальн халхар экологин әәмшг уга бәәдл тогтагдхнь лавта.