Өнр-өсклң Шуркаевихн диилв

06-06-2024, 15:05 | Общество, Таңһчин зәңгс, Зіњг

Эн җил Әрәсән Президент Владимир Путинә шиидврәр мана орн-нутгт өрк-бүлин Җил зарлгдсмн. Энүнд нерәдҗ Әрәсәд, тер тоод Хальмг Таңһчд өрк-бүлин чинр өөдлүллһнә, өнр-өсклң, ниитә болн билгтә улсин тускар олнд медүлхин төлә олн зүсн марһан, наадм байрин керг-үүлдврмүд болҗана. Шидр бичкдүдиг харслһна нарт-делкән Өдрт нерәдҗ «Өрк-бүлин өргмҗтә амрлһна өдрмүд» гидг төсвин медлд орн-нутгин регион болһнд олн зүсн керг-үүлдвр болв. Мана таңһчд эн өдр кесг концерт, марһан, наадм болв, терүнд өрк-бүлмүд орлцҗ, цаган сергмҗтәһәр давулв. Терүнә медлд Н.Пальмовин нертә Келн-улсин музейд «Җилин сән гисн өрк-бүл» гидг Әрәсән марһана региональн девсңгин ашлгч керг-үүлдвр болв.

Марһанд орлцачнриг Хальмг Таңһчин Улсин Хуралын (Парламентин) депутат Пүрбән Олег, «Җилин сән гисн өрк-бүл» гидг Әрәсән марһана дииләч Кектыша Саглр йөрәҗ, хөв-кишг дурдҗ, хамгин билгтәнь диилвр бәртхә гив. Эн марһан 2016 җиләс авн мана орн-нутгт давулгдҗана. Темдглхәс, мана таңһчин элчнр җил болһн Әрәсән марһанд дииләчнрин тоод орна.
Эн җил марһанд 28 өрк-бүл орлцҗ, билг-эрдмән үзүлҗ, өвкнрин заңшал, авъяс хадһлҗ йовхан, дорас өсч йовх бичкдүдт чик сурһмҗ өгчәхән, нег-негән дөңнҗ дуран хадһлҗ ниитә бәәхән олнд медүлв. Марһанд орлцачнр урднь өрк-бүлиннь күцәмҗин тускар медүлҗәдг видео белдҗ, жюрин гешүдин оньгт тусхасмн. Эдн «Авъяс хадһлдг өрк-бүл», «Алтн өрк-бүл», «Олн үртә өрк-бүл», «Селән һазрт бәәдг өрк-бүл» болн «Баахн өрк-бүл» гидг марһаст орлцв. Өрк-бүл болһн марһанд сән белдвр кеҗ, наад тәвҗ, дуулад-бииләд, бийснь үүдәсн шүлгүд умшв. Зәрм өрк-бүлмүд герин эзн угаһар орлцҗ, юңгад гихлә эднь цергә шишлң керг-үүлдврт орлцҗ йовна.
Элст балһсна, Көтчнрә, Лаганя, Городовиковск, Октябрьск, Баһ Дөрвдә, Хар Һазра, Целинн болн Яшкулин райодын элчнр таңһчин марһанд орлцҗ, эн җилин сән гисн өрк-бүлин нер зүүхин төлә зүткв. Тәвн җилдән хамдан бәәдг медәтнр, җил хооран өркән өндәлһсн баһчуд, тавн-зурһан үрән асрҗадг улс нег-негән дөңнҗ, арһ-чидлән негдүлҗ, диилвр бәрхин төлә билг-эрдмән һарһв. Өвкнриннь авъяс хадһлҗадг өрк-бүлмүд дунд Элстәс Олег болн Цаһан Цереновихн, тәвн җилдән хамдан бәәдг улс дунд Октябрьск районас Виктор болн Екатерина Шуркаевихн, Целинн районас олн үртә Виктор болн Екатерина Хулхачёвихн, Хар Һазра районас селәнд бәәдг Николай болн Айса Прокушевихн, баахн өрк-бүлмүд дунд Виктор болн Валентина Дрижеевихн диилвр бәрв. Эднд 50 миңһн арслңга мөрән сертификат бәрүлҗ өгв, марһанд орлцсн өрк-бүл болһн дипломар ачлгдв. Тер мет Виктор болн Екатерина Шуркаевихн таңһчин марһана дииләчнр болад, «Җилин сән гисн өрк-бүл» гидг нер зүүһәд,150 миңһн арслңга мөрән сертификатар ачлгдҗ, Цугәрәсән марһанд орлцх зөв авв.
Шуркаевихнә өнр-өсклң өрк-бүл Октябрьск района Хошуд селәнд бәәнә. Виктор Федорович болн Екатерина Дальтовна тәвн җилдән хамдан ни-негн бәәнә, эдн зурһан күүктә, 17 зеетә болн 1 зеенчртә. Марһанд эдн күүкд-күргдтәһән, зеенртәһән болн бичкн зеенчртәһән «Репка» гидг тууляр шогта, инәдтә наад тәвәд, олна зүрк авлв. Эдниг дөңнхәр нег һазра улс, элгн-садн ирәд, эдниг урмдулв. Медәтнр таңһчин марһанд диилвр бәрсндән күүкдтән болн зеенртән ханлт өргҗ, хамдан наад белдҗ, билг-эрдмән үзүлҗ улм ниитә болвидн гиҗ келв.

ДООҖАН Наталья
ЗУРГТ: «Җилин сән гисн өрк-бүл» гидг марһанд диилвр бәрсн өнр-өсклң Шуркаевихн

Видео