Хальмг Таңһчин Толһач Хаска Бату Рождество Христово байрла нег һазра улсан йөрәв.

Шин җилин амрлһна өдрмүдт тогтсн авъясар, Элстд «Ойрат-Арена» төвд «Хальмг Таңһчин Толһачин һацур» нертә нәр-наадн болв. Басңга Баатрин нертә Келн-улсин театрин артистнр байриг чадмгар давулв. «Киитн Аавиг харслһн» нертә наадын йовудт нәр болв.

Шин җилин байрин өмн өргнд Москвад бәәдг нег һазра мана баахн спортсмен Адьян Питкеев Элстд ирв. «Джунгар» мөснә бәәшңд дамшчадг көвүд-күүкдлә эн харһв.
Элстд даңгин ирәд, бичкдүдлә дамшлтарн хувалцх седклән эн медүлв.

Бар сарин чилгчәр таңһчин Толһач Хаска Бату Элстд эмнлһнд бәәдг СВО-д орлцачнрла харһв. Күүндврин йовудт цергчнр сән чинртә эмнлһ авчахан медүлв. Тедн шулун эдгәд, хәрү Төрскән харсхар зүткчәнә.
2024 җилд П.Жемчуевин нертә таңһчин эмнлһн өдгә цагин некврлә ирлцҗәдг кергсләр теткгдв. Тегәд ода нег һазра мана цергчнр гертән сән чинртә эмнлһ авч чадҗана.

Шин җилин байрин амрлһна өдрмүдт полицин көдләчнр өдр-сө уга көдләд, әәмшг уга бәәдл тогтав. Өдгә амр биш цагт полицин көдлмшинь өөдәнәр үнләд, эн җилин туула сарин 1-әс авн таңһчин ППС-ин көдләчнр сар болһн 10 миңһн арслң немр дем авхмн. Шидр Хальмгин Толһач Хаска Бату ирлцңгү зәрлг һарһв. Тодлхд, 2023 җиләс авн полицин әңгүдин дааврта көдләчнр сар болһн тавн миңһн арслң авдг болв, тер мет җилин йовудт ончрсн әңгин дааврта көдләч 50 миңһн арслңга демәр темдглгднә.

Урҗ өдр күч-көлснә шин җил эклв. Төрскн һазрин делгрлтин төлә цуһар седклән тәвҗ көдлхәр зүткчәнә.
Эн җил усна сурвлҗна тосхлтын, малын хот белдлһнә шин көтлвр күцәлһнә болн талдан чинртә төрмүд хаһлгдх зөвтә. Тер мет Хальмг Таңһчин делгрлтин шишлң көтлвр цаарандан күцәгдхмн.

Туула сарин 5-д Элст балһснд бәәдг Светлана Зулаевна Бамбышева 100 җилин ончта өөнән өргәр темдглҗ, олн ачнр-зеенрән, элгн-садан цуглулв. Хальмг Таңһчин Толһач Хаска Бату нәәрин күндтә гиич болад, ик ачта ээҗиг өөнләнь йөрәҗ, өнр-өсклң өрк-бүлин байринь хувалцв.

Буур җил һарад, ботхн җил орҗах цагиг таңһчин әмтн байрин бәәдлд темдглв. Бурхн Багшин Алтн сүмд Зулын өдриг байрин мөргүлд орлцҗ темдглхәр цуглрҗ ирсн әмтиг Хальмг Таңһчин Шаҗн Лам Гевш Тензин Чойдак үнн седкләсн йөрәв.

Әрәсән Президент Владимир Путин, орн-нутгин залврин ахлач Михаил Мишустин, Федерацин Хүүвин ахлач Валентина Матвиенко, орн- нутгин залврин гешүд гемтә-шалтгта, өнчрсн бичкдүдин седклин санаһинь шин җилин өмн өргнд күцәҗ, «Күслин һацур» гидг керг-үүлдврт орлцв.

Әрәсән регионмудла болн талдан орн-нутгудла таңһчин хәрлцә өргҗүллһнд таңһчин Толһач Хаска Бату эврәннь үүлдвртән ик оньган өгчәнә. Одахн Бату Сергеевич Союз Мьянма Республикд көдлмшин халхар одад ирв. Эн орн-нутгин һардврла болн энүнә регионмудын элчнрлә нөкцлт делгрүллһнә тускар күүндвр кев.