Хальмг Таңһчин Улсин Хуралын (Парламентин) Ахлач Артем Михайлов болн депутат Кокан Михаил Моңһлас ирсн гиичнрлә харһв. Ах-дүүнрин орн-нутгас ирсн делегацин ханьд Алтн Һасна орденәр ачлгдсн, «Тод номын гэрэл» олна ниицәнә һардач Баатаржав Бат Амгалан, Алтн Һасн орденәр ачлгдсн Моңһл орн-нутгин болн Тыва Республикин ачта артист Самандын Җавхлан, Барун Моңһлын тавн әәмгин зуульчллһна багин һардач Җалав Батсух Цэвээн Оюна авальтаһан, «Манай Могол Мандана» олна бүрдәцин менеджер Жамьянжав Тугс-Эрдэнэ орв. Күндтә гиичнр мана таңһчур «Моңһлын үүрмүдин ниицән» олна негдлтин үрврәр ирв.

Көтчнрә гимназьд иргчдән Төрскән харсачнрин зергләнд орҗ цергт мордҗах көвүдин төлә байрин керг-үүлдвр болв. Эн өдр районас нәәмн көвүн цергт мордв. Эдниг Көтчнрә района толһачин негдгч дарук Давинә Очр, Целинн болн Көтчнрә райодын цергә комиссар Бован Эрднь, Хальмг Таңһчин Улсин Хуралын (Парламентин) депутат Мацга Татьяна болн социальн зүүцүләч Һооҗура Александра йөрәһәд, сәәнәр цергләд, эк-эцкиннь нериг өөдән бәрхиг дурдв.

Шидр Төрскән харсгч Алдр дәәнә ветеран Иван Митрофанович Гончаров 95 насна өөнән темдглв. Медәт Троицкое селәнд бәәнә. Әрәсән Президент Владимир Путин илгәсн йөрәлин бичгиг Хальмг Таңһчин социальн делгрлтин, күч-көлснә болн көдлмшәр тетклһнә министрин дарук Һәрән Ольга ветеранд бәрүлҗ өгәд, бат эрүл-менд болн хөв-кишг дурдв. Целинн района муниципальн бүрдәцин һарвдр ветераниг бас йөрәһәд, белг бәрүлҗ өгв.

Өнчн-өвү, гемтә-шалтгта, җирһлин күнд таалд туссн улст, бичкдүдт болн медәтнрт цаһан седкләсн демән күргдг, килмҗән тусхаҗ эднә төрмүдт орлцдг әмтнд тернь эрк биш ик буйн болх гиҗ тоолгдна. Мана таңһчд өнчн медәтнрин болн эрмдгтә улсин гер-интернатд бәәдг улст дөңгән күргдг әмтн баһ биш. Эдн ямр нег керг-үүлдвр давулхд дем күргнә, әмтәхн хот-хол, хувц чигн авч ирнә. Баһ Дөрвдә өнчн медәтнрин болн эрмдгтә улсин гер-интернатд дөңгән күргдг улс бас бәәнә. Теднә негнь Цевгә Антонина болна.

Элстд Хальмг ик сурһулин ул деер Әрәсән Өмн үзгин мал эмнлһнә Х нарт-делкән хург давв.

Әрәсән хотл балһснд «Московская неделя моды» гидг өдгә цага хувцна туст һарчах шин тоотд нерәдсн керг-үүлдвр күцәгднә. Эн җил сәәхн эн керг-үүлдвр хулһн сарин 4-әс авн 9 күртл «Манеж» нертә Төв һәәхүлд болв. Әрәсән 41 балһснас 200 дизайнер эврәннь уйҗ белдсн хувцан энд үзүлв. Хальмг Таңһчас модельер Елена Хасикова белдсн хувцн энд үзүлгдв.

Шидр Улан Әәрмин 3-ч Белорусск фронтын цергүд Германя Ширвиндт балһс сулдхсна 80 җилин өөн болв. Хальмг Таңһчин Толһач Хаска Бату эн өдр мана орн-нутгин тууҗд ик чинр зүүҗәхиг темдгләд, Төрскнә тууҗд алтн үзгәр бичгдсн Баатрмудын санл тевчнәвидн гив.

Одахн Элстд Хальмг ик сурһулин номин дегтрин саңд Китд Улсин Республик бүрдснә 75 җилин өөнд нерәдсн арвн хонгин ашиг дигллһнә керг-үүлдвр болв. «75 җилдән хамдан: Китдин сойлын болн тууҗин зөөрлә таньлдҗ зуулльчлһн» гиҗ эн нерәдгдлә. Арвн хонгт шунмһаһар орлцсн оютнриг болн сурһульчнриг энд ачлв. Конфуцийин нертә күрәлңгин болн һазадын орна келнә, сойлын хоорндк зәңгллһнә болн регионоведеня тиңкмин бүрдәсн марһасин ашнь бас энүнә йовудт диглгдв.

Шидр Хальмг Таңһчин Толһач Хаска Бату олна малын үвлзлһнд белдвр келһнә төрәр селвлцә давулв. Терүнд таңһчин залврин Ахлачин дарук–таңһчин йиртмҗин көрңгин болн йиртмҗ харлһна министрин үүл дааҗадг Җамбина Очр, Хальмг Таңһчин Улсин Хуралын (Парламентин) Ахлачин дарук Бадмин Вячеслав, Әрәсән МЧС-ин таңһчд үүлддг заллтын һардач Мальтина Мергн, таңһчин селәнә эдл-ахун министрин үүл дааҗадг Һаван Тимур орлцад, тогтсн бәәдлин тускар ухан-тоолврарн хувалцҗ, селәнә эдл-ахун көдләчнрт дөң күрглһнә туст кегдҗәх көдлмшин тускар тооцаһан өгв.

Шидр Хальмг Таңһчин Толһач Хаска Бату олна малын үвлзлһнд белдвр келһнә төрәр селвлцә давулв. Терүнд таңһчин залврин Ахлачин дарук–таңһчин йиртмҗин көрңгин болн йиртмҗ харлһна министрин үүл дааҗадг Җамбина Очр, Хальмг Таңһчин Улсин Хуралын (Парламентин) Ахлачин дарук Бадмин Вячеслав, Әрәсән МЧС-ин таңһчд үүлддг заллтын һардач Мальтина Мергн, таңһчин селәнә эдл-ахун министрин үүл дааҗадг Һаван Тимур орлцад, тогтсн бәәдлин тускар ухан-тоолврарн хувалцҗ, селәнә эдл-ахун көдләчнрт дөң күрглһнә туст кегдҗәх көдлмшин тускар тооцаһан өгв.