Хальмг Таңһчин залврин барин цергллтин зәңглсәр, шидр Приютное селәнд поликлиник тосхлһна төрәр көдлмшч селвлцән болв. Терүг Хальмг Таңһчин залврин Ахлач Босхмҗин Гилән һардҗ давулв. «Эрүл-менд харлһн» гидг келн-улсин төсвин «Эрүл-менд харлһна түрүн дөң күрглһнә халх делгрүллһн» гидг региональн төсвин халхар Приютна района эмнлһнә медлд эн селәнд шин поликлиник тосхгдх зөвтә.

Хальмг Таңһчин эрүл-менд харлһна министерствин зәңглсәр, таңһчин эмнлһс гриппәс саглуллһна тәрлһ кех эмәр теткгдв. Бичкдүдт тәрлһ кехин төлә мана таңһчур «Ультрикс квадри» эм авч ирв, бөдүн улст «Совигрипп», «Флю-М» эмәр тәрлһ кехмн.

Күүнә җирһл ора болн җора гиҗ кезәнә келчксн юмн, нег хаалһар йовдго, нег зокалар бәәдго болҗана. Тер мет Элстин 2 - ч тойгта сурһулин эсвин багш Эльдшә Түрбән җирһл бас кесг райодла, кесг йовдлла залһлдата, орн-нутгт болҗасн ик сольврмуд бас үлмәһән күрглә.

Таңһчин әмтнә седвәрәр Бурхн Багшин Алтн сүмин талвңд ордг һол өргн үүдн ясгдҗана. Седклтә улсин дөңгәр цааранднь хурлын дөрвн өргн үүдн ясгдх гиҗ зуралгдҗана.

Хальмг Таңһчин сойлын болн оюни җирһлд ончта нег йовдл сән авъяс болҗ батрҗана. Тернь бурхн-шаҗна һурвн эрдньд нерәдсн көгҗмин белг. Таңһчд эн керг-үүлдвр зурһадгч кемдән кегдхмн. Һаха сарин 21-д Элстд Хальмгин көгҗмчнр, артистнр, дуучнр болн эврә сән дурар орлцх олн улс негдәд, көгҗмин дееҗән бурхн-шаҗнд нерәдхмн.

Сүл җилмүдт мана таңһчин райодт болн Элстд 47 сурһулин гер шинрүлгдв, тернь цуг сурһульмудын 30 процент тогтаҗана, талдан зәрм регионмудт тер үзмҗ зуг 5 процентд күрв. Ик Буурла района Орһахн селәнә дунд сурһульд бас эн җилин ноха сард бат ясвр төгсв. Энүнә йовудын тускар сурһулин һардач Олюша Татьяна келҗ өгв.

Давсн долан хонг таңһчин әмтиг үүмүлҗ шуугулсн зәңг һарла. Орн-нутгин кесг лавкст, тер дотр «Леруа Мерлен» гидг гипермаркетд, нүр-һаран уһадг хораст кергтә эд-тавр хулддг лавкд Бурхн Багшин толһа зургдсн болн бурхна нань чигн әрүн тоотла залһлдата зургта кегдлмүд хулдгдҗахинь әмтн үзәд, терүгинь бурушагч тоолвран бичәд, социальн сүлҗәнә дөңгәр тиим йовдлыг уурулхинь нексмн.

Хальмг Таңһч болн Малайзий номин болн сурһуль-эрдмин, сойлын, тер мет нань чигн халхар нөкцлтән эклҗәнә. Тер тоод Хальмг ик сурһуль болн Малайзийин Путра ик сурһуль хамцу үүлдврән өргҗүлхәр зуралҗана. Эдн орс келнә төв Малайзийд секлһнә, оютнрин академин сольлцаг өргҗүллһнә, номин хамцу төсв күцәлһнә тускар онлайн таалд күүндвр кев. Хамцу көдлмшин түрүн керг-үүлдвр тернь болв. – Тиим нөкцлтд одахн Владивосток балһснд төгссн Дорд үзгин экономикин чуулһн нилчән бас күргв, – гиҗ хальмг вузин һардач Салан Бадм келв.

Эн хаврар Элстд болсн ЮРПА-н хургин йовудт Хальмг Таңһчин Улсин Хуралын (Парламентин) Ахлач Артем Михайлов болн Луганск Улсин Республикин Антрацитовск муниципальн округин Хүүвин Ахлач Виктория Сошина нөкцлтин бооца батлсн билә. Терүнә медлд таңһчин Улсин Хуралын депутатнр Антрацитовск района әмтнд дөңгән күргҗ, буйнч секдлин кергүд давулҗ бәәрн улсин төрмүдт орлцна.

«Төрскән харсачнр» шаңһа саң «Медрл» Әрәсән ниицәнлә хамдан орн-нутгин субъектмүдт баһчудын төлә төрскнч керг-үүлдврмүд давулв. «Төрскнәннь төлә церглҗәнәв» нертә эн төсвин йовудт Әрәсән Баатрмуд, цергә седкүлчнр, дәәнә керг-үүлдврмүдин ветеранмуд болн СВО-д орлцачнр баһчудла харһв.