Сүл җилмүдт «Эрүл-менд харлһн» гидг келн-улсин төсвин медлд таңһчин селәдт шин эмнлһс тосхгдҗ, кергсләр теткгдҗ, әмтнә төлә сән таал тогтагдҗана. «Земск эмч/фельдшер» гидг шаңһа көтлвр батлгдсна ашт эрүл-менд харлһна көдләчнр селән һазрт көдлхәр ирҗәнә. Дәкәд селәнә эмнлһст көдлҗәдг эрүл-менд харлһна көдләчнриг урмдулҗ дөңнхин төлә немр демин мөңг өгдг болв. Цуг эн эв-арһс селәнә улс сән чинртә эмнлһ авч, төрскн һазртан торад бәәхд туслҗана.

Хальмг урн үгин делгрлтин төрт оньган тусхахла, Хальмг улсин бичәч Бадмин Алексейин тускар келлго бәәҗ болшго. Цагин йовудт, шорад даргдлго умшачнрин оньгт бәәдг үүдәврмүдиг үүдәсн түүрвәчин 100 җилин өөн эн җил күцҗәнә. Хальмг урн үгин девшлтд, сойлын делгрлтд Алексей Балдуевич орулсн тәвцнь баһ биш. Бичәч болн сойлын, олна үүлдәч болад, Бадмин Алексей күцәсн тоотынь энүнә күндтә нернь йир сәәнәр медүлҗәнә. Алексей Балдуевич - Хальмг улсин бичәч, О.И. Городовиковин нертә Хальмг АССР-ин шаңһа мөрән лауреат , Әрәсән бичәчнрин Ниицәнә гешүн, Әрәсән Федерацин сойлын ачта көдләч, Төрскән харсгч Алдр дәәнә ветеран, Хальмг Таңһчин ачта иргн, Баһ Дөрвдә района күндтә күн мөн.

Бичкдүдин наадд тәвдг театрмудын наадм бүрдәх шиидвр Басңга Баатрин нертә Келн-улсин театр кесг җил хооран шиидсмн. Тер шиидврән күцәһәд, Хальмг театр ода дөрвдгч кемдән «Кеедә» гидг наадмд талдан һазрин театрмуд дуудҗ, театральн ик байр бүрдәҗәнә. Бичкдүдиг театрла баһ настаһаснь авн таньлдулсн деерән эн наадм улс хоорндк залһлдаг батлҗ, театрин дөңгәр үүдәгч нөкцл батлҗ, Әрәсән театральн үүлдәчнр дунд ик тааслт олҗана.

Һаха сарин 16-д Троицкое селәнә хурлд Энткгин һазрас гелңгүд ирҗәнә. «Оргьен Саннгаг Чолинг» гидг нер зүүдг эн хурлд шаҗна халхар һазадын орнас гиичнр ирхмн.

85 җил хооран Халхин Һолд ик дәәлдән болсмн. Тенд моңһл теегт японя әәрм болн советск-моңһл церг хоорнд дәәнә үүлдвр болсмн. Советск болн моңһл цергчнр тер дәәлдәнд японя цергиг хамц цоксн диилвриг тетклһнд Хальмг цергчнр орлцсн учрар Халхин Һол деер болсн дәәлдәнә туск илдкл белдгдҗәсн цагла дәкн нег ончта йовдл учрв.

Хальмгин Толһач Хаска Бату «Негдсн Әрәсә» партин Деед Советин Бюрон болн Президиумин селвлцәнд орлцв.

Ирх долан хонгт, һаха сарин 20-д, Элст балһснд «Бадм цецгин марһан» нертә нарт-делкән чинртә спортын наадм болхмн. Эн җилд наадм оңданар давулгдхмн, көтлврин йовудт кикбоксингәр – долан, боксар болхла дөрвн марһан болх.

Һаха сарин 2-т Элстд, таңһчин залврин конференц- залд колледжмүдт сурһульд орсн оютнрла харһлт болв. Сүүрин йовудт баһчудыг сурһуль-эрдмин болн номин министр Әңгрә Булһн, Хальмг ик сурһулин һардач Салан Бадм болн таңһчин тооһин делгрлтин министр Этән Алексей сурһулин шин җил эклснлә йөрәҗ эднд күцәмҗ дурдв.

Хальмг Таңһчин «Бамб цецг» ансамбль Моңһлд болсн нүүдл улсин нарт-делкән наадмд орлцв. Эн ик нәр-нааднд хальмг ансамбль хойрдад орлцҗана. Эн җилә наадмд Азин, Европин, Өмн үзгин Африкин 12 орн-нутгин коллективс ирҗ, билг-эрдмән үзүлв.

Көтчнрә районд тосхгдҗадг сойлын болн амрлһна төвд Хальмг мотоклубин нерн деерәс һардач Лиҗин Николай синтезатор белглв.
Сойлын шин герт кергтә белг орҗ ирв, гиҗ сойлын көдләчнр байрлв. Энд болх олн зүсн керг-үүлдвриг дахулҗ көгҗминь күңкнүлх синтезатор мел кергтә бәәсмн.
«Степное братство» гидг мотоклуб 2017 җилд эклҗ үүлдлә. Тер цагас авн терүг Лиҗин Николай һардҗана.