Басңга Баатрин нертә Келн-улсин драмин театр белдҗ тәвсн «Горе от ума» гидг наадн «Золотая маска» гидг Әрәсән келн-улсин театрин мөрән төлә марһана түрүн шүүвриг давҗ һарв. 2023-2024 җилин марһана йовудт «Соискатель» гидг нерәдлһ авв. Марһана шүүврин девсңгүд цааранднь давҗана. Ода шинҗллтин хүүвин гешүд наадыг хәләснә дару шүүврин йовуд йилһхмн.

Җил болһн һаха сарин 5-д Хальмг Таңһчд хальмг үндсни бичлтин өдр темдглднә. Эн җил эн байрта йовдл шаҗна, йосна гүн номта үүлдәч Зая Пандита төрснә 425 җилин өөнлә ирлцүлҗ күцәгдҗәнә. Хальмгин бичлтин «тод бичгин» ончта өөнлә өөрд-моңһл бичлтин болн урн бүтәлин нарт-делкән V һәәхүл секгдв.

Давсн басң өдрәс авн нарн өдр күртл мана орн-нутгт, тер дотр мана таңһчд, суңһвр болв. Хальмг Таңһчин улс региона толһачиг болн Элст балһсна Хургин депутатнриг суңһв. Һаха сарин 6-д өрүн 8 часла цуг орн-нутгт суңһврин әңгүд секгдв. Мана таңһчд ут тоодан 227 суңһврин әңг көдлв.

Таңһчин суңһврин комиссин зәңглсәр, түрүңк өдрин үдин хөөн 17 һар процент суңһачнр Элстд болн райодар дууһан өгв, бүклдән болхла таңһчин суңһачнрин то 200 һар миңһн күн болна.

Ноха сарин 30-д, Хальмг ик сурһульд Эфиопия орн-нутгин Аддис Абеба хотл балһсна Хансенә күрәлңгин нертә номт, үүлдврәрн темдгтә Елена Хайлу хальмг вузин элчнрлә болсн харһлтд көдлмшиннь болн хальмг номтнрла кеҗәх нөкцлтин тускар келҗ өгв.

Урҗ өдр Хальмг Таңһчин Толһач Хаска Бату, «Негдсн Әрәсә» партин күцәгч Төв комитетин һардач Александр Сидякин болн Элст балһсна һардврин толһачин үүлиг дааҗадг Лиҗикә Алдр Элстин Б.Б.Городовиковин нертә уульнцд кегдҗәдг ясвриг бүрткҗ хәләв. Тодлхас, нидн «Бичкн балһсдт болн тууҗлгч селәдт сән таал тогталһн» нертә Цугәрәсән марһана ашар талдан төсвсин дунд эн объект шүүҗ авгдсн билә.

Шидр таңһчин дотр-дундын кергүдин министерствин медлд бәәдг әңгүдт шин көлг һарһҗ өгв. Керг-үүлдврин эклцәр Хальмгин дотр-дундын кергүдин министр, полицин полковник Дмитрий Григорьев ноха сарин 27-д хальмг милиц бүрдснәс авн темдглгдсн 104 җилин өөнлә йөрәҗ, ведомствин ончрсн көдләчнриг И.Д.Путилинә нертә медаляр, Әрәсән МВД-н Күндллһнә һашгудар, Ханлтын бичгүдәр болн талдан темдгүдәр ачлв.

Шидр малын эмчин сән өдрт нерәдсн байрин хургт Хальмгин залврин дарук, йиртмҗин көрңгин болн эргндк бәәдл харлһна министр Җамбинә Очр, таңһчин селәнә эдл-ахун министр Гаван Тимур, Хальмг Таңһчин ветеринарн заллтын һардач Санҗин Виктор болн ирлцңгү бүрдәцсин көдләчнр орлцҗ йөрәв.

Сурһулин шин җил эклсн түрүн өдртнь Ростовск мүҗин Азовск района сурһульмудт байрин керг-үүлдврмүдин йовудт нег һазра мана баатр Павел Гирдиковин санлынь тевчв. Дәәнә цагт мел тер һазрт дәәлдҗ йовсн нег һазра мана залу зөрмгәрн ончрад әмнәсн хаһцв.

Әәдрхнә Кремлин өөр А. Цебековин нертә шаңһа хор «Русалка» гидг опериг үзүлв. «Каспийские сезоны» гидг классическ билг-эрдмин наадмин кемҗәнд эн керг-үүлдвр күцәгдв.