Эн өдрмүдт мана таңһчд бамб цецгин наадм эклсн бәәнә. Сара хонгтан таңһчд олн зүсн керг-үүлдвр болхмн, кесг гиичнр мана тал ирхмн. Эн наадмд орлцх улс бамб цецгиг һәәхч, әрүнәр хадһлхин төлә бүртклһнә керг-үүлдврмүд бүрдәгдсн бәәнә. Хальмг Таңһчин йиртмҗин көрңгин болн эргндк йиртмҗ харлһна министрин дарук Саңһҗин Олег, министерствин әңгүдин һардачнр Бован Виктор болн Олег Сидоров, «Хальмг Таңһчин онц кевәр хардг йиртмҗин һазрин дирекц» шаңһа бүрдәцин һардач Адьяна Александр, Хальмгин урһа модна эдл-ахун һардачин дарук Санҗин Делгр таңһчин олнд зәңгллһнә эв-арһсин көдләчнрт терүнә тускар келҗ өгв.

Одахн Элстд «Негдсн Әрәсә» партин олна дөңнлтин штабин талвңд Хальмг Таңһчин залврин седвәрәр олна бүрдәцсин болн зөв-йос харлһна органмудын элчнрин төгрг ширән сүүр болв. «Хальмг Таңһчд пробацин институтыг бүрдәлһнә болн делгрүллһнә кергт олна тогтацсин тәвциг өргҗүллһнә тускар» гидг төрәр өргн күүндвр болв.

Өлзәтин Полина (зургт) Элст балһсна 4-ч тойгта дунд сурһулин 6-ч класст сурна. Җил болһн сурһульд, балһснд, таңһчд давулгддг марһаст, олимпиадт эн шунмһаһар орлцад, нүүрлгч орм эзлнә.

Һучн негн җил хооран 1994 җилин мөрн сарин 5-д Хальмг Таңһчин «Теегин Йосна Бичг» (Конституц) батлгдла. Тернь мана таңһчин Һол закан болҗана.

Хаврин хамгин сәәхн цаг теегиг бамб цецгүдәр кеерүлв. Мөрн сарла таңһчд болдг сәәхн эн байрт орлцхар Хальмгт олн зуульчнр ирнә. Эн җил Бамб цецгин байр мөрн сарин 5-д эклҗәнә. Эн өдр таңһчд олн гиичнр ирҗәнә. Тедниг тосч авхдан цугнь белн. Байрин керг-үүлдврмүд бүкл сара хонгтан болад, терүнд хотл балһсна болн райодын әмтн цугтан орлцхмн.

Әрәсәд, тер тоод мана таңһчд җил болһн «Җилин сән гисн өрк-бүл» гидг марһа давуллһн сән авъяст тохрв. Таңһчд болсн девсңд диилвр бәрсн өрк-бүл хөөннь орн-нутгин марһанд орлцх зөв авна.

Хальмг Таңһчин болн Әрәсән ачта эмч Хоньна Валерий таңһчин эрүл-менд харлһна делгрлтд ик тәвцән орулсн, кесг баахн эмчнрин төлҗлтд туслсн төләдән сурһмҗлгч болҗ күндлгднә. Эн өдрмүдт Валерий Михайлович 75 насна ончта өөнән темдглв. Хамдан көдлҗәдг үүрмүднь, нег һазра улснь эмчиг йөрәв.

Элстин медәтнрин болн гемтә-шалтгта улсин гер-интернатд дөчн һар җилдән көдлҗәдг медицинск эгч Улана Ирина эрдмдән итклтә, өөдән мергҗлттә болн байн дамшлтта көдләч мөн. 1983 җиләс авн Ирина Улюмджиевна эн социальн бүрдәцд үнн-чик седклтәһәр көдлҗ, өнчн медәтнрт килмҗән тусхаҗ, цаһан седклән нерәдҗ, бүлән үгәрн эдгәҗ түшг болна. Эн җил Улана Иринад «Әрәсән әмтнә социальн харслтын ачта көдләч» гидг шаңһа ачлврар ачлҗ, күч-көлсинь темдглв.

Эн җилин һаха сард Хальмгин хотл Элст балһснд шар шаҗна нарт-делкән III-ч хург болхмн. Бурхн Багшин номд шүтдг әмтн бәәдг орн-нутгудын элчнр цуглрҗ ирҗ өдгә цагин бәәдлд эвин болн делгрлтин таал тогталһнд, улс хоорндк залһлдаг батллһнд, эвин кергт хамцу үүлдлһнә төрмүдәр тохнята күүндвр кехмн. Эн ик чинртә керг-үүлдврт таңһчд ик белдвр кегдҗәнә.

Моһа сарин 28-д Мьянмад һазр чичрәд, зеткртә йовдлын ашт олн-әмтн әмнәсн хаһцв, кесгнь күнд шав авв. Мьянмад кесг тосхлтс нурад унв, тенд бачм бәәдл болн долан хонгтан келн-улсин һашудлһна өдрмүд зарлгдсн бәәнә. Хальмг Таңһчин Толһач Хаска Бату нег һазра улсин болн эврәннь нерн деерәс Мьянман улсин зовлңгинь хувалцҗ, шавтсн улст шулуһар эдгхиг дурдв. Шидр Бату Сергеевичин даалһврар дөрвн хальмг эмч зеткрин ашт шав авсн улст дөңгән күргхәр тиигәрән һарч йовв. Таңһчин бичкдүдин медицинск төвин ах эмч Дорҗин Александр, П.Жемчуевин нертә таңһчин эмнлһнә хирург болн травматолог эмчнр Болдра Олег, Цевгә Николай болн Цевгә Хоңһр эн багин ханьд орв.