А.М.Амр-Санана нертә Келн-улсин дегтрин саңд тогтсн авъясар «Библио сө-2025» нертә Цугәрәсән керг-үүлдвр болв. Алдр Диилврин 80 җилин өөнд нерәдсн эн керг арвн дөрвдгч кемдән давулгдв.

Хальмгин Толһач Хаска Бату «Сбер» ПАО-н ахлач Герман Грефла харһв. Энүнә йовудт мөңгәр теткҗ күцәгдҗәдг төсвсин тускар күүндвр болв. Тер мет зуульчллһна, эрүл-менд харлһна, сурһуль-эрдмин халхар нөкцлтхәр күүндв.

Хальмг Таңһчин Толһач Хаска Бату Әрәсән залврин ахлачин дарук Дмитрий Чернышенкола харһҗ күүндв. Терүнә йовудт номин, сурһуль-эрдмин, зуульчллһна болн спортын төрмүд босхгдв.

Эн җилин хамгин чинртә йовдл мана таңһчд өргмҗтәһәр темдглгдв. Хөн сарин 9-д Элстин төвд Алдр Диилврин 80 җилин өөнд нерәдсн керг-үүлдвриг хәләхәр өрүн эртәс авн олн-әмтн цуглрв.

Хөн сарин 7-д Элстд радион болн залһлдана көдләчнрин сән Өдрлә ирлцүлҗ байрин хург болв. Хальмгин залврин ахлач Босхмҗин Гилән, энүнә дарук, то-дигин делгрлтин министр Этән Алексей, залһлдана көдләчнрин профсоюзин таңһчин бүрдәцин ахлач Цагада Василий, ирлцңгү бүрдәцсин ветеранмуд болн мергҗлтнр терүнд орлцв.

Алдр Диилврин 80 җилин ончта өөн угтҗ Элстд Баатрмудын Аллейд Советин Союзин Баатр Делгә Эрднин медаляр түрүн болҗ ачллһна байрин керг-үүлдвр болв. Терүнд Хальмг Таңһчин Толһач Хаска Бату, таңһчд ах федеральн инспектор Александр Беляев, Хальмг Таңһчин Улсин Хуралын (Парламентин) Ахлач Артем Михайлов, таңһчин медәтнрин Хүүвин гешүн Яшкула Константин, Советин Союзин Баатр Делгә Эрднин ач күүкн Делгә Евдокия, зөв-йос харлһна бүрдәцсин болн баһчудын олна ниицәсин элчнр орлцв.

Аһш балһснд дәәнә цагт әмнәсн хаһцсн дәәчнрин талвңд зун һар җил хооран суулһсн уласн урһҗана. Эн моднд Төрскән харсгч Алдр дәәнә цагт Сталинградск ик бәрлдәнә йовудт харшлт учрсн бийнь 1943 җилд цецгәрәд, мана улсиг диилгдшгон темдг болсмн. Аһшин региональн ботаническ садын номтнр тер алдр уласна модд урһаҗ авад, «Диилврин уласн» гидг керг-үүлдврин йовудт орн-нутгин кесг һазрар терүг тархав. Шидр эн уласна модн мана таңһчд суулһгдв.

А. Амр-Санана нертә Келн-улсин дегтрин саңд Элстин хулд-гүүлгәнә-экономическ колледжин оютнр СВО-д орлцач Манҗин Пүрвәлә (зургт) харһв.

Сән авъяст тохрсар, хөн сарин 12-т медицинск эгчин нарт-делкән Өдр темдглнә. Эдн эмчин түрүн нөкднр болҗ, эмнлһнә керг-үүлдврмүд күцәҗ, гемтә улст тәрлһ кенә болн нань чигн дөң күргнә. Эднә көдлмш ик дааврта болна, тегәд эн эрдм шүүҗ авсн күн хамгин түрүнд цаһан седклтә, әмтнлә тевчңгү, тесвртә, килмҗтә болх зөвтә.

Хөн сарин 2-т Ик Буурла района Приманыч селән 60 җилин өөнән темдглв. Өрүн эртәс авн селәнә улс, кесг гиичнр байрин керг-үүлдврт орлцхар адһв. Байрин керг-үүлдврмүд мөрнә урлдаһар эклв, тегәд селәнә захд болсн марһанд ик-бичкн уга цуглрв. Урлданд орлцхар Октябрьск, Яшкулин райодын элчнр мөрдән бас авч ирснь темдгтә болв.