Шидр Дагестан Республикин Каспийск балһснд Анжи-Арена төвд һурвн өдртән тохма хөөдин болн ямадын Цугәрәсән XXV һәәхүл болв. Тенд орн-нутгин 12 регионас 60 һар нүүрлгч эдл-аху орлцв. Дөчн һар хөөнә болн ямана тохм тенд үзүлгдв.

Хөн сарин 23-д Әрәсән 89 регионд, тер тоод Хальмг Таңһчд болн һазадын 55 орнд ЕГЭ-н шүүвр өглһнә һоллгч кем эклх. ЕГЭ-н болн ОГЭ-н шүүврин цуг ашнь шаңһа зәңгллһнә диг-даранд орулгдх. Шүүвр өгдг бәәрнд сурһуль-эрдмин салврин мергҗлтнр, медицинск көдләчнр болн олна бүрткәчнр үүлдхмн. 2024 җиләс авн төгсәһәчнр дасчасн нег кичәлиг шинәс өгх зөв авв, тиим арһ эднд Әрәсән Президент Владимир Путинә даалһврар өггдв. Эн җил така сарин 3-д болн 4-д шинәс шүүврән өгч болхмн.

Шидр мана таңһчд «Деловая Россия» ниицәнә Хальмг региональн әңгин седвәрәр арһлачнрин төлә ик керг-үүлдвр давулгдв. Терүнд арһлачнр, шинҗләчнр болн таңһчин йосна бүрдәцсин элчнр харһад, олн зүсн төсвс делгрүллһнә төрәр күүндв. Харһлтыг бүрдәлһнд Хальмг Таңһчин экономикин болн хулд-гүүлгәнә министерств, «Мини керг» төв, Хальмг Таңһчин делгрлтин саң болн «Калмыкия» РИА дөңгән күргв.

Эн җил мана орн-нутгт Төрскән харсгч Алдр дәәнд Диилвр бәрснә 80 җилин өөн өргмҗтәһәр темдглгдсн болдг. Дәәнд орлцачнрин,күндтә ветеранмудын, тылд көдлҗ йовсн мана аавнр-ээҗнрин,экнр-эцкнрин залу- зөрмг, туурмҗта йовдлмудыг дәкнәс сергәҗ, нег үлү дорас өсч йовдг мана баһчудт тодлулсн чинртә кергүд күцәгдв, гиҗ сангдна. Эн ончта өөн угтҗ,таңһчин бүрдәцст, күч-көлсч коллективст санлын, төрскнч сурһмҗин халхар аһу ик көдлмш давулгдсинь бас үнлх кергтә. Зуг Хар Һазра района зарһин көдләчнр эн туст басл ончрв,эдн цагин эргцд зуульчлад, Алдр Диилврин өөнлә ирлцүлҗ,дәәнә цагт бичкн нег хальмг хотнд бәәсн баһ наста улсин тускар ахр кемҗәтә соньн фильм цокч авснь ода өвәрц йовдл болҗ үнлгдҗәнә эсий?..

Эн җилин үвләр Хальмг Таңһчин Толһач Хаска Батун седвәрәр таңһчин селәдәр «Эрүл-менд бәәтн!» гидг керг-үүлдвр күцәмҗтә кевәр бүрдәгдҗ давулгдв. Хол селәдт бәәдг улс эрүл-мендин бәәдлән шинҗлҗ, эмчнрт бийән үзүлҗ, олн зүсн гемиг эртәснь илдкҗ цаглань эмнлһ авхин төлә мергҗлтнр район болһнд одв. Элст балһсна поликлиникин Троицкое селәнд үүлддг 5-ч тойгта терапевтическ әңгд бас эн керг-үүлдвр давулгдсн билә.

Дәәнә җилмүдт «Әәдрхн - Кизләр» гидг төмр хаалһ тосхлһнд көдлсн ветеранмуд күндтә ачлврар темдглгдв. «Элст балһсна күндтә иргн» гидг өөдән нерн эднд зүүлһгдв. Диилвр тетклһнд ик чинр зүүсн төмр хаалһин тосхлтд орлцсн, ода Элстд бәәдг ветеранмуд тиим өөдән нер зүүв. Эн җил тиим күндтә ачлврар 24 күн темдглгдсн болдг. Элст балһсна Хургин депутатнр күндтә нер зүүлһхин туск шиидвриг моһа сард батлҗ авсн билә.

Алдр Диилврин туск санлыг мөңкрүллһнд цергә эрдм шүүҗ авсн баһчуд орлцҗахнь темдгтә. Әрәсән СКР-ин Хальмгт үүлдҗәдг мөшклһнә заллтын офицермүд иргч үйнрт нерәдҗ, цагин темдг болгч керг-үүлдвр күцәв.

9 мая в поселке Багмалан Сарпинского района прошел торжественный митинг, посвященный 80-летию Великой Победы. Этот день для местных жителей был важным еще и потому, что состоялось открытие памятника землякам – участникам Великой Отечественной войны.

Нарт-делкән шар шаҗна III хург угтад, Хальмг Таңһчд белдврин көдлмш кегдҗәнә. Олн келн-улсин оньгиг авлҗадг эн ик цуглранд белдәд, таңһчин Толһач йосна болн шаҗна халхин кесг үүлдәчнрлә харһлт кеҗәнә. Шидр Хальмг Таңһчин Толһач Хаска Бату Непал орн-нутгт йосна гиичллһнд одв.

Хальмгин Толһач Хаска Батун һардврт таңһчин делегац Непал орн-нутгт ирв. Европд мана таңһч шар шаҗна сойлын өвәрц төв болад, Әрәсән болн Азийин хоорнд нөкцлтиг батрулҗ йовна.