Ода вузмудт 2025 җилин абитуриентнриг орулҗ авлһна керг-үүлдвр төгсҗ йовна. Эднәс ик зунь ямаран ик сурһульд орхан йилһәд авчкла, тиим болв чигн ноха сарин 29 күртл вузан сольх талдан шиидвр батлх арһ өггдҗәнә. Тиим кевәр абитуриентнрин зөв өргҗүлгдҗәнә, болв һоллгчдан цуг баһчудыг бюджетин болн бооцана (мөңгән өгәд) әңгд орулҗ авлһн төгсв, тер тоод Хальмг ик сурһульд тиим керг-үүлдвр күцәгдсн бәәнә. Таңһчин кесг райодын арвтнр хальмг вузиг шүүҗ авла. Тер тоод Хар Һазра района Комсомольский селәнә гимназин сурһульчнр бас йовна.

Одахн Москвад Әрәсән залврин Ахлачин дарук Дмитрий Чернышенко болн гегән-герлин министр Сергей Кравцов РФ-н субъектсин министрмүдлә селвлцә кев. Түүнд Хальмг Таңһчин сурһуль-эрдмин болн номин министрин үүл дааҗадг Александр Ким орлцв. Энд 2024/2025 сурһулин җилин ашнь диглгдв болн 2025/2026 сурһулин җилд күцәх һоллгч төрмүд йилһгдв. Төрскән харсачин җилин кесг седвәриг болн керг-үүлдвриг күцәлһнд шунлттаһар орлцснднь Дмитрий Чернышенко багшнрт ханлтан өргв. Тер мет Төрскән харсгч Алдр дәәнә ветеранмудын болн СВО-д орлцачнрин ик ач-тусинь заав.

Элст балһснд һаха сарин хөрн дөрвнәс авн хөрн зурһан күртл байрин ик нәр болхмн. Олн миңһн улст байр үүдәх ик нәәрт Хальмг Таңһчд Моңһлын, Бурятин, Туван, КНР-н Шинҗән-Уйһур автономн районас билгтнр ирҗәнә. Моңһл келтнрин билгтнр цуглрҗ ирх байр «Миңһн байр» гидг нертәһәр болхмн. Ах-дү келн-улсин иньгллтин нәәрин өмн «Калмыкия» таңһчин зәңгллһнә агентствд харһлт болв. Терүнд Хальмг Таңһчин билг-эрдмин ачта үүлдәч, «Бамб цецг» ансамблин һардач Катан Савр, «Җаңһр» наадһасин шаңһа театрин ах режиссер Сарңга Алексей, Хальмг Таңһчин ачта артистк Босхмҗин Диана, «Бамб цецг» ансамблин балетмейстер Бамбрга Владимир, «Миңһн байр» наадмин күцәгч һардач Манҗин Вячеслав орлцв.

Хальмг Таңһчд чинртә нег йовдл учрв. Ноха сарин 15-д Н. Пальмовин нертә Келн-улсин музейд «Хальмг хувцн» гидг һәәхүл байрин бәәдлд секгдв. Әрәсән этнографическ музейәс авч иргдсн хальмгудын хувц-хунр әмтнә оньгт тусхагдв. Хойр зун җил хооран хальмг улс өмсч йовсн хувцн, олзлҗ йовсн өлг-эд, толһад өмсдг махлас, һосн-башмг, олн зүсн кеерүл тер һәәхүлд үзүлгдҗәнә. Өвәрц эн һәәхүл һурвн сардан көдлхмн.

Эн өдрмүдт Хальмг Таңһчин Толһач Хаска Бату Энткг орн-нутгт йовв. Тодлхас, одахн Энткгин залврин элчнр Элстд ирәд, шар шаҗна нарт-делкән Чуулһ угтад, ирлцңгү кесг төрмүдин тускар күүндсн билә.

Урҗ өдр Элст балһсна төв талвңд «КТК–Р» акционерн бүрдәц «Таңһчин баһчудын төв» бүрдәцд болн Е.Толкачевин нертә «Тюльпанчик» бииһин бичкдүдин ансамбльд өдгә цага шин автобусмуд белглв. Байрта керг-үүлдврт Хальмг Таңһчин залврин Ахлач Босхмҗин Гилән, КТК-н һардач Николай Горбань болн акционерн ниицәнә орн-нутгин залврла залһлда батруллһна төрәр һардачин дарук Михаил Гришанков орлцв.

Шидр Хальмг Таңһчин Улсин Хуралын (Парламентин) Ахлач Артем Михайлов таңһчд күүнә зөв харсдг элч Валерий Чубла харһҗ күүндв. Харһлтд 2024 җилд күүнә зөв харслһна туст күцәгдсн көдлмшин ашин, иргнмүдин зөв харсхин төлә зака тетклһнә төрмүд хәләгдв.

Хальмг Таңһчин Улсин Хуралын (Парламентин) депутатнр селәдин дунд сурһульмудт күцәгдҗәдг бат ясврин йовудыг бүрткҗ, тосхлтын көдлмш өөдән чинртәһәр күцәгдхиг шинҗлнә. Эн җил мана таңһчд «Сурһуль-эрдмин халх шинрүллһн» гидг шаңһа көтлврин йовудт 10 дунд сурһульд болн 2 бичкдүдин садт бат ясвр кегдҗәнә.

Күн болһн өркән өндәлһсн цагтан дурта иньгтәһән олн җилдән ниитә бәәһәд, ачнр-зеенрән босхад, хамдан көгшрхин тускар санна. Седклд туссн иньг итклтә түшг болхла, хойр күн нег-негнәннь авг-бәрц болн заң сәәнәр медҗ байр-зовлңган әдл хувалцдг болхла эдн эрк биш олн җилдән хөвтә җирһл эдлҗ бәәхнь маһд уга. Яшкулин района Хар Толһа селәнд бәәдг Николай Александрович болн Александра Ивановна Араевихн (зургт) шидр алтн хүрмән темдглв. Эдн тәвн җил хооран өрк-бүлән өндәлһәд, эн җилмүдин эргцд нег-негндән түшг болҗ, ниитә бәәнә.

Эн җил сурһулян төгсәсн арвтнр дунд ЕГЭ шүүвр өгсн кемлә 200 балл эс гиҗ тер тоод өөрхн балл хоршасн сурһульчнр баһ биш. Тедн дунд И. Г. Карпенкон нертә Приютна лицейин төгсәһәч Софья Полежко райондан түрүн болҗ 200 балл хоршасн болҗана. Хойр кичәләр-химийәр болн орс келәр цуг даалһвриг чикәр күцәһәд, күүкн тиим кевәр хойр зууна болн хамгин өөдән ашт күрв.