[b][b] Шидр Элстд Сити-чесст шатрин бәәшңгин талвңд Остап Бендерин көшә байрин бәәдлд секгдв. Урднь Анацкийин нертә проспектд бәәсн бумб хуучрад эвдгдснә ашт Хальмг Таңһчин Толһач Хаска Батун седвәрәр терүг күрл олзлад шинәс цутхх шиидвр авгдсн билә. Билгтә дүрсләч Николай Жуков шин көшә кесмн. Бумб секлһнә керг-үүлдврт Элст балһсна һардврин толһач Лиҗикә Алдр, энүнә дарукс Довгопола Дмитрий болн Хаска Сергей, шатрин сурһулин һардач Утнасна Александр орлцв. [/b]

Хальмгт төрскн келнә өдр темдглсн цагла ончта йовдл учрв. Тод үзгиг үүдәсн щаҗна үүлдәч болн гегәрүләч Зая Пандитын әрүн тоот Сарпа селәнә хурлд авч иргдв. Энүнә тускар Көтчнрә района муниципальн бүрдәцин һардвр зәңглв.

Һаха сарин 9-д Хальмг Таңһчин залврин герт сурһуль-эрдмин болн номин министрин үүл дааҗадг Александр Ким өнчәр өссн баһчудт гер эс гиҗ патьр хулдҗ авх арһ өгчәдг итклин цаас бәрүлҗ өгв. Келхд, иим цаасиг Болдра Александр, Валетин Иван болн Сарңга Екатерина авв.
Өнчн арвтнриг 18 нас наслсна хөөн шаңһас гер-бүүрәр теткх зөвтә болна. Болв чеерүд ик болад эдн хөөннь итклин цаас эс гиҗ орн-нутгин сертификат олзлҗ патьр эс гиҗ гер хулдҗ авна. Тиим зөв баһчудт 23 наснас авн өггднә.

«Әрәсән келн-улс: негдлтд – мана күчн» гидг нертә хург Элстд болхмн. «Әрәсән келн-улсин ассамблейин» Хальмг региональн әңг эн керг-үүлвдриг бүрдәҗәнә. «Калмыкия» РИА-д эн төрт нерәдсн брифинг болв.

Одахн Ик Буурла района Көвүд селәнә дунд сурһульд тусад, тенд олн зүсн цецгүд урһҗахиг үзәд бахтв. Хойр давхр дунд сурһулин герт орҗ ирсн күн болһн энд олн зүсн цецгүд хорасиг кеерүлҗәхиг үзҗ өврнә. Дунд сурһулин һардач Бамбша Эрднин келсәр, багшнр, көдләчнр болн сурһульчнр цугтан тедниг суулһҗ, арднь орҗ хәләҗ тәвцән орулхар шунна.

Мана таңһчин хотл балһсн эн өдрмүдт 160 җилин өөнән темдглҗәнә. Элст балһснд ик-бичкн уга дурта болн эңкр болҗ, дуундан орулна, шүлгүдтән магтна. Альд йовв чигн бидн дурта балһсан тодлҗ, нааран хәрҗ ирхәр зүткнәвидн. Мана балһсн кемҗәһәрн бичкн болв чигн күн болһна зүркнд онц орм эзлҗ, чидл-омг өгдг һазр болна.

Хальмгт Энткгин һазрас гелңгүд ирв. Эдн Бурхн Багшин Алтн сүмд Авалокитешвара бурхна мандл тосххмн.

Хальмг Таңһчин, Моңһлын болн Әрәсән сойлын ачта көдләч, бичәч болн шүлгч Санҗин Николайин үүдәврмүдин хураңһу шидр барас һарв. «На крыльях жизни» гидг нертәһәр барлгдсн дегтрт бичәчин үүдәврмүд, статьяс, олн зүсн хургудт энүнә келсн үгмүд, номин халхар бичсн шинҗллтс орсмн. Цуг терүнлә зергднь энүнә үүдәлтин тускар бичсн статьяс чигн орсн бәәнә. Эн хураңһу таңһчин сойлын министерствин болн А. Амр Санана нертә Келн-улсин дегтрин саңгин хамцу дөңгәр барлгдсмн. Эн дегтрин презентац шидр Келн-улсин дегтрин саңгд болв.

«Баатрмуд 08» төсвд орлцачнр сурһулин көтлврин йовудт таңһчин күцәгч йосна бүрдәцсин элчнрлә, Б.Б.Городовиковин нертә Хальмг ик сурһулин номтнрла харһҗ, чинртә төрмүдәр ил күүндвр тогтаҗ, шин медрл хоршаҗ авчана. Сурһулин хөөн эдн таңһчин болн муниципальн бүрдәцст көдлҗ, төрскн һазр-уснаннь делгрлтд тәвцән орулхмн. Шидр Хальмг Таңһчин залврин Ахлач Босхмҗин Гилән цергә шишлң керг-үүлдврин ветеранмудт «Келн-улсин күслмүд болн келн-улсин төсвс» гидг төрәр илдкл кев.

Әрәсәд «Ө-шуһу модд хадһлый» гидг аһу ик чинртә керг-үүлдврин доладгч кем эклв. Хальмг Таңһчин Толһач Хаска Бату эн керг-үүлдвриг онц темдгләд, нег һазра улст модд суулһхин туст дуудвр кев.