Эндр делкәд чинвртә олн йовдл учрҗана. Өөрхн Дорд үзгт, СВО-н керг-үүлдврт нам аврлт уга дәәлдән учрҗана, түүнәс сагллһна, тиим йовдлыг ууруллһна керг-үүлдвриг Әрәсә болн Китд, талдан чигн орн-нутгуд цуцрлтан угаһар күцәҗәнә, США-ла болн талдан чигн орн-нутгудла кеҗәх күүндврин ашт тиим дән-даҗгта бәәдлиг ууруллһна үүлдвр өргҗәд йовна.

Эн өдрмүдт эрүл-менд харлһна халхар олн җилдән көдлсн эмч Дорҗин Борис (зургт) 70 насна өөнән темдглв. Эн Приозерн (ода Көтчнрә) района болн таңһчин шүднә эмнлһнд олн җилдән көдләд, ода ачта амрлһнд бәәнә. Ончта өөнин өмн Борис Санжижапович баһ цаган, хамдан сурч болн көдлҗ йовсн үүрмүдән тодлҗ, җирһлиннь хаалһднь сән улс харһснд байрлҗ, байр-зовлңгинь хувалцсн өөрхн улстан ханлтан өргҗәнә.

Элст балһсн 160 җилин байрин өөнд белдҗәнә, хотл балһсна микрорайодар болхла «Элстин асхд» гидг нәр кегдв. Балһсна әмтнә җирһлд батрсн нәр-наадн эн җил Элст балһсна 160 җилин өөнд болн Төрскән харсачин җилд нерәдгдлә.

Урҗ өдр Элстд Диилврин талвңд «КТР-Р» АО-н һардвр Ик Буурла болн Хар Һазра райодт шин көлг белглв. Хальмг Таңһчин Толһач Хаска Бату, «КТР-Р» АО-н һардач Николай Горбань, РМО-син элчнр болн сойлын көдләчнр керг-үүлдврт орлцв.

Шидр Хальмг Таңһчин Улсин Хуралын (Парламентин) дарани сессь болв. Таңһчд ах федеральн инспектор Александр Беляев, Әрәсән Федерацин элч Байир Путеев, Хальмг Таңһчин залврин Ахлач Босхмҗин Гилән, таңһчин Улсин Хуралд Хальмг Таңһчин Толһачин элч Манҗин Араш, зөв-йос харлһна, зарһин болн бүртклһнә бүрдәцсин, олна ниицәсин элчнр сүүрт орлцв. Депутатнр зуни амрлһндан һархин өмн 12 төр хәләһәд, таңһчин зәрм закадт сольвр орулв, олн үртә өрк-бүлин Өдр зарлв.

Җил болһн така сарин хойрдгч нарн өдрлә мана орн-нутгт заһсчин сән Өдр темдглнә. Эн өдрлә заһс аңнлһна халхар көдлдг улсиг йөрәнә. Сән Өдр угтҗ таңһчин селәнә эдл-ахун министерствин заһсна эдл-ахун үүлдврин ах мергҗлт Валерий Муджиков урдк җилин ашин болн эн җилин көдлмшин тускар келҗ өгв.

Нидн мана орн-нутгт өрк-бүлин җил зарлгдсн билә, тегәд терүнә йовудт Әрәсән Президент Владимир Путинә седвәрәр «Энтн мана өрк-бүлин» гидг марһан бүрдәгдсмн. Терүнд ут тоодан 600 миңһн күн орлцв. Хальмг Таңһчас терүнд Корниенкон өрк-бүл орлцад, ашлгч девсңд һарсмн. «Әрәсә – эв-арһсин орн-нутг» гидг марһан эн җил «Өрк-бүл» гидг келн-улсин төсвин нег әңгнь болв.

Ода сурһульмудт ОБЗР болн «Технология» кичәлмүд орулгдҗана, урднь чигн сурһульчнр ирлцңгү медрл авчасмн, болв ода эн кичәлмүдт орн-нутгин болн таңһчин һардвр улм ик оньган өгчәнә. Яһад гихлә тиим кичәлмүдт арвтнриг Төрскән харслһнд белднә, күч-көлснә сурһмҗ өгнә. Түүнә тускар Әрәсән гегән-герлин Министерствин селвлцәнд тодрха күүндвр болв, түүнә йовудт цуг регионмудын, тер тоод Хальмг Таңһчин залврин, сурһуль-эрдмин министерствин һардачнр болн дааврта көдләчнр орлцв.

Шидр Октябрьск района Хошуд селәнд бәәдг медәт Саңһҗ-Һәрән Петр 95 насна өөнән темдглв. Насн-җирһлиннь туршарт төрскн һазр-уснаннь делгрлтин төлә үнн кевәр көдлҗ, зурһан үрндән чик сурһмҗ өгсн аавиг ончта өөнләнь йөрәхәр района толһач Увшан Басң, таңһчин йиртмҗин көрңгин министрин үүл дааҗадг Һооҗура Санл, нег һазра улс болн элгн-саднь ирв.

Хальмг Таңһчин «Бамб цецг» дууна болн бииһин академическ ансамбль Дхарамсала балһснд Дала Ламин Гегәнә өөнд нерәдсн байрин концертд орлцв. Энткгин һазрт Дхарамсала төвдин бурхн-шаҗна оюни төв болҗана.