Өнчн болн эк-эцкнриннь тетквр уга үлдсн бичкдүдиг гер-бүүрәр теткхин төлә Элстд 12 патьр хулдҗ авгдхмн гиҗ зуралгдҗана. Хальмг Таңһчин тосхлтын, көлгн-күчнә болн хаалһин эдл-ахун министерств терүнә төлә марһа зарлсн бәәнә.

Намртан болх шар шаҗна нарт-делкән ик хургт болн Элстин 160 җилин өөнд ик белдвр кегдҗәнә. Балһсна уульнцс болн хаалһс ясгдад, сән кец-таал тогтагдҗана. Шидр «Родина» сойлын төвин болн Манҗин Аркадин нертә филармоня өмн бәәдг талвңгудын ясвриг Элстин һардврин болн балһсна Хургин элчнр бүрткҗ хәләв.

Одахн Элстд таңһчин сурһуль-эрдмин болн номин министерствин коллегийин дарани сүүр болв. Энд 2024-2025 сурһулин җилин, ЕГЭ-н болн ОГЭ-н шүүврин урдаснь кесн аш диглгдв. Тер мет СПО-н бүрдәцсин ул деер үүдәгдсн мастерскойсин үүлдврин тускар күүндвр болв, эдн колледжмүдин сурһульчнрин мергҗлтиг өөдлүллһнд болн сурһулян төгсәсн арвтнрт эрдмән шүүҗ авлһнд дөң болна.

Үстин района Харба селәнд өсәд-боссн Манҗин Зинаида эрүл-менд харлһна халхар хөрн тавн җилдән көдләд, гемин уршгар ачта амрлһнд һарсмн. 1976 җилд медицинск училищ төгсәһәд, эн күч-көлснә хаалһан Полынный селәнд эклсн билә, хөөннь төрскн селәнә эмнлһнд көдлв. Эн саата күүкд улсин эрүл-менд харҗ, эднд цаһан төр болхд нөкд болдг билә, тегәд Зинаида Саранговнан дөңгәр һарсн бичкдүдиг тоолхд зөвәр күнд болх гиҗ сангдна. Сүл тавн җилин эргцд күүкд күн селәнд лавк секәд, арһлач болҗ үүлдҗәнә.

Сүл өдрмүдт таңһчд дегд халун өдрмүд зогсад олн-әмтиг зоваҗана. Метеорологическ төвин зәңглсәр, эн өдрмүдт аһарин кемҗән дундлад 30-33 градуст күрв, зәрм райодар болхла 40-41 градус халун болв. Тиим халунд һал шатад, хаалһст болхла хату девскр халад хүврснә ашт зеткртә йовдл учрдг әәмшг бәәнә.

Әрәсән Президент Владимир Путинә даалһсар электрокүч делгрүллһнә халхар шаңһа дөң авх регионмудын тоод Хальмг Таңһч орв.

Хальмг Таңһчд эн җиләс авн дәкәд нег сән өдр темдглдг болхмн. Одахн Хальмг Таңһчин Улсин Хуралын (Парламентин) депутатнр таңһчин күүкд улсин олна бүрдәцин седвәриг дөңнәд, олн үртә өрк-бүлин Өдр зарлв. Терүг һаха сарин һурвдгч нарн өдрлә темдглдг болхмн. Сүл цагт мана таңһчд олн үртә өрк-бүлмүдин то өсчәнә гиҗ сүүрт келгдв.

Давсн долан хонгт болсн Хальмг Таңһчин Улсин Хуралын (Парламентин) дарани сессьт Әрәсән Федерацин Хүүвин элч Байир Путеев 2024 җилд күцәсн көдлмшиннь тооцаһан өгв. Хальмг Таңһчин Толһач Хаска Батун седвәрәр таңһчин Улсин Хуралын депутатнр суңһачнрлаһан дару-дарунь харһад, ямаран төрмүд хаһлсна болн көдлмш күцәснә тускар тооцаһан өгнә. Тегәд Әрәсән Федерацин Хүүвд таңһчин зака үүдәгч бүрдәцин элч депутатнрин үлгүрәр бас тооцаһан өгхәр шиидв. Энүнә седвәриг депутатнр дөңнв.

Эн хаврин чилгчәр мана таңһчд «Җилин сән гисн өрк-бүл» гидг Цугәрәсән марһана девсң болсн билә. Өвкнриннь авъяс-заңшал хадһлдг өрк-бүлмүд дунд Мучеряевихнә өрк-бүл олна оньг авлв. Мучерән Цаһан Лари, Увш болн Очр көвүдтәһән эврән уйсн хальмг хувцтаһан тәәз деер һарснь үзмҗтә болв. Ууһн Лари көвүнь шидр әәрмәс бууҗ ирсмн, тегәд экнь көвүндән хальмг хувц болн махла белгллһнә авъяс үзүлҗ, үрндән цаһан хаалһ дурдсмн.

2025 җилин така сарин 6 өдр тууҗд орв. Бурхн Багшин номд шүтдг саяд улсин Оюни Көтлврч XIV Дала Ламин Гегәнә 90 җилин өөнд нерәдсн байрин ик керг-үүлдврмүд болсар тер өдр тодлгдхмн.