Элстин медәтнрин болн гемтә-шалтгта улсин гер-интернатд дөчн һар җилдән көдлҗәдг медицинск эгч Улана Ирина эрдмдән итклтә, өөдән мергҗлттә болн байн дамшлтта көдләч мөн. 1983 җиләс авн Ирина Улюмджиевна эн социальн бүрдәцд үнн-чик седклтәһәр көдлҗ, өнчн медәтнрт килмҗән тусхаҗ, цаһан седклән нерәдҗ, бүлән үгәрн эдгәҗ түшг болна. Эн җил Улана Иринад «Әрәсән әмтнә социальн харслтын ачта көдләч» гидг шаңһа ачлврар ачлҗ, күч-көлсинь темдглв.

Эн җилин һаха сард Хальмгин хотл Элст балһснд шар шаҗна нарт-делкән III-ч хург болхмн. Бурхн Багшин номд шүтдг әмтн бәәдг орн-нутгудын элчнр цуглрҗ ирҗ өдгә цагин бәәдлд эвин болн делгрлтин таал тогталһнд, улс хоорндк залһлдаг батллһнд, эвин кергт хамцу үүлдлһнә төрмүдәр тохнята күүндвр кехмн. Эн ик чинртә керг-үүлдврт таңһчд ик белдвр кегдҗәнә.

Моһа сарин 28-д Мьянмад һазр чичрәд, зеткртә йовдлын ашт олн-әмтн әмнәсн хаһцв, кесгнь күнд шав авв. Мьянмад кесг тосхлтс нурад унв, тенд бачм бәәдл болн долан хонгтан келн-улсин һашудлһна өдрмүд зарлгдсн бәәнә. Хальмг Таңһчин Толһач Хаска Бату нег һазра улсин болн эврәннь нерн деерәс Мьянман улсин зовлңгинь хувалцҗ, шавтсн улст шулуһар эдгхиг дурдв. Шидр Бату Сергеевичин даалһврар дөрвн хальмг эмч зеткрин ашт шав авсн улст дөңгән күргхәр тиигәрән һарч йовв. Таңһчин бичкдүдин медицинск төвин ах эмч Дорҗин Александр, П.Жемчуевин нертә таңһчин эмнлһнә хирург болн травматолог эмчнр Болдра Олег, Цевгә Николай болн Цевгә Хоңһр эн багин ханьд орв.

Татарстана хотл Хазн балһснд моһа сарин чилгчәр делкән урн-билгин сойлын (МХК) төрәр сурһульчнрин Цугәрәсән марһан болв. Хальмг Таңһчиг энд Элстин 17-ч тойгта сурһулин 10-ч классин сурһульч Орһан Наяна элчлв. Йилһән сәәнәр сурдг күүкн сән күцәмҗ бәрҗ, кергтә дамшлт хоршав.

Татарстана хотл Хазн балһснд моһа сарин чилгчәр делкән урн-билгин сойлын (МХК) төрәр сурһульчнрин Цугәрәсән марһан болв. Хальмг Таңһчиг энд Элстин 17-ч тойгта сурһулин 10-ч классин сурһульч Орһан Наяна элчлв. Йилһән сәәнәр сурдг күүкн сән күцәмҗ бәрҗ, кергтә дамшлт хоршав.

Җил болһн «Хальмг үнн» газет бичүлҗ авсн умшачнр дунд урмдулгч лотерей болна. Урднь зәңглсәр, моһа сарин 27-д дарани лотерей болв. Терүнә йовудт найн белг шүүгдв. Эн җил темдглгдх Алдр Диилврин 80 җилин өөнлә ирлцүләд, тедү то белг батлгдсн болдг.

«Гео Мед» завод цергә даалһвр күцәҗ йовх нег һазра улсин төлә түрүн дөң күрглһнд керглгддг кегдлмүд йилһҗ өгәд, «За наших 08» гидг саңд буйнч седклин дөңгән күргв.

Шидр Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан һардврт «Төрскән харсачнр» гидг шаңһа саңгин үүлдврин төрмүдәр бәәдг ведомствс хоорндк комиссин дарани сүүр болв. Терүнд цергә шишлң керг-үүлдврт орлцачнр болн теднә өрк-бүлмүдин гешүд ик болн дунд шишлң сурһулин бүрдәцст сурһуль сурлһна төр хәләгдв.

«Ах үйин улс» гидг келн-улсин төсвин медлд күцәгдҗәдг керг-үүлдврмүдин тускар шидр болсн селвлцәнд өргн күүндвр болв. Хальмг Таңһчин залврин Ахлачин дарукин-таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан һардврт болсн харһлтд ах үйин улсин эрүл-менд батруллһна болн медәтнр ут нас наслҗ чик авг-бәрцәр бәәлһнә төрмүд хәләгдв.

Таңһчд зуульчллһн делгрлт авчах кемд мана һазрин ке-сәәхн тоотыг үзүлҗ, тууҗин болн сойлын тускар келҗ өгх улс кергтә болҗахнь медгдҗәнә. Таңһчин Төв хурлд болсн шүүврин хөөн һучн долан экскурсовод итклин цаас авад, белн бәәхән медүлв.