Элст балһсна хаалһст «Әәмшг уга балһсн» көтлврин йовудт видеобичлһнә шин кергсл углҗ тәвгдв. Элстин МВД-н заллтын көдләч Эрик Картеевин келсәр, эн кергсл эднд олзта-туста болх. Балһсна хаалһст өдрин эргцд зеткртә йовдл учрасн җолачнриг үзҗ, эднә тускар тер дарунь ГИБДД-д зәңглҗ болхмн. Немхәс, эн җилин хулһн сарас авн антирадарн комплекс экләд көдлхмн. Видеобичлһнә кергсл нурһлҗдан сөөһәр углҗ тәвгднә, юңгад гихлә эн цагт хаалһсар цөөкн машин йовна.

Таңһчин Толһач Хаска Бату Әрәсән экономическ делгрлтин министр Максим Решетниковла харһв. Харһлтын йовудт Хальмг Таңһчин делгрүллһнә көтлврт чиклвр оруллһна төрәр күүндв. Хаһлгдх төрмүдт оньган өгснд таңһчин Толһач Максим Геннадьевичд ханлтан өргв. Орулгдсн чиклвр цааранднь чигн сәәнәр көдлхд урмд өгнә, Хальмгт экономикин делгрлтин халхар көдлмшин шин ормс бүрдәгдхнь сән күцәмҗ болхмн, гиҗ Бату Сергеевич темдглв.

Селәнә ахлачин керг чилдмн биш. Эн олн үртә эцк кевтә эврәннь дааврт бәәдг улсин тускар ухалад, теднә төриг хаһлад, өдр-бүрин кергүдинь бүрдәһәд йовдмн.
Лаганя района Красинское селәнә ахлачар Татьяна Автушенко 2015-ч җиләс авн көдлҗәнә. Эн бәәрн күн, энд төрҗ босла.

Хальмгт йир халун болдгас көлтә мана таңһчд модд урһалһнд ик оньг өггднә. Балһсн-селән болһнд күүнә күчәр суулһгдсн паркс нүд байрлулҗ, эргндк бәәдлиг кеерүлнә. Үлгүрнь, урднь Элстд нег чигн модн уга бәәсмн. Ода хәләһит. Хая хур-чиг ордг регионд бәәсн бийнь хальмг хотл балһсн Өмн үзгин федеральн округд урһа моддарн ончрҗадг балһсдын тоод орна. Тернь учрта. Давсн зун җилин 50-ч җилмүдин хойрдгч өрәлд хальмг улс Сиврәс төрскнүрн нүүҗ ирхд таңһчд әмтн бәәдг гермүд тосхлһн болн модд урһалһн хамгин эркн көдлмшт тоолгдснь лавта. Тер цагт Элст балһснд болн райодт сар болһн миңһәд модн тәргдәд билә. Тиигхд Элст балһсна эргнд көк-модд экләд урһасмн. Хөөннь таңһчиг һардсн Б. Б. Городовиков эн көдлмшиг давулад сән йовудтаһар күцәлә.

Таңһчин социальн даатхлһна саңгин зәңглсәр, 2022-ч җиләс авн гемин учрар көдлҗ эс чадсиг ит күлҗәдг цаасн электронн эв-арһар экләд өггдхмн. Эмнлһнә бүрдәцд эн цаасиг авдган уурхмн, гиҗ таңһчин правительствин барин цергллт зәңглҗәнә.
Тиим цаас авхин төлә электронн тойгинь медҗ авх кергтә, энүг телефоһар эс гиҗ электронн поштар медҗ болхмн, шаңһа порталд бичүлгдсн әмтн болхла онц кевәр зәңг авхмн. Мөңгнә демнь кезә ирхнь бас шаңһа порталд медгдх.
Мана зәңгч

Элст балһсна җилищн-коммунальн эдл-ахун болн тосхлтын заллтын һардачин үүлиг цаг зуур дааҗадг Сергей Хактаевин һардврт селвлцән болв. Энүнд намрин болн үвлин цагт әмтн бәәдг олн давхр гермүдиг дулаһар тетклһнә төр хаһлгдв. Белдлһнә көдлмшин ик зунь күцәгдв, гиҗ Элст балһсна һардвр зәңглҗәнә. Балһснд бәәдг 27 котельнәс 17-нь белн бәәнә. Селвлцәнә йовудт заллтын компаньст дулаһар тетклһнә диг-дараг оньгтан авх кергтәһинь Сергей Хактаев дәкн нег тодлулв.

Ірісін орн-нутгин Хўўвд һаха сарин 17-19-д болх суњєврин йовудт хоорндан мейіркљідг партьсин дґрлдін улм чањєрад бііх гиљ шинҗләчнр тоолљана. Тернь партин көтлврмүдлә, ґґрхн иргчд хаһлгдх тґрмўдлі ирлцҗіні. Кен тедниг хамгин тўргнір болн олнд ик тустаєар хаєлхнь тернь иргч суњєврт сән ашта болхнь лавта.

Хальмг Таңһчин эрүл-менд харлһна көдләчнр пандемий эклснәс авн ах-дү болдг Бурять Республикд хойр дәкҗ одад ирв. Давсн җилд хальмг эмчнрин болн дунд медицинск көдләчнрин баг түрүн болҗ тиигәрән одад, коронавирусн гемәс хөрлһнд дөң-тусан күргсмн. Сар хооран мана делегац дәкн Улан-Удэ балһснд одад, таңһчин бичкдүдин клиническ эмнлһнд (ДРКБ) көдлв.

Шидр «Җилин сән гисн өрк-бүл» гидг Цугәрәсән марһанд Хальмг Таңһчин нерн деерәс орлцсн өнр-өсклң Анджаевихнә өрк-бүл «Селән һазрт бәәдг өрк-бүл» гидг номинацд диилвр бәрснә туск байрта зәңг ирв. Михаил болн Валентина Анджаевихн Көтчнрә района Ергенинский селәнд бәәнә, эдн дөрвн үрән асрҗана.

Давсн амрлһна өдрмүдт Калининградск мүҗин Краснознаменск балһснд Советск Союзин Герой, генерал-лейтенант Басан Бадьминович Городовиковд бумб секгдв. Давсн җилд эн балһснд төв талвңд олн-әмтнә генералын нерн зүүлһгдсн билә. Ода тер төвд бумб дүңгәҗ зогсҗана. Бумб секлһнә байрин керг-үүлдврт Хальмг Таңһчин делегац орлцв. Элст балһсна һардврин толһачин дарук Довгопола Дмитрий болн олна үүлдәч, нертә эмч Башанкан Бадм ончта керг-үүлдврт орлцҗ, таңһчин хотл балһсна «Мөңк һал» бумблвас атхм һазр күргв. Тер мет күндтә гиичнрин тоод бумб секлһнд Басан Бадьминовичин зе күүкнь Елена Николаевна Городовикова бас орлцв.