Шидр Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан даалһврар Луганск Улсин Республикин Антрацитовск медәтнрин болн гемтә-шалтгта улсин гер-интернатд дөң күрггдв. Ода эн бүрдәцд 220 күн бәәнә.

Одахн Хальмг ик сурһулин мал эмнлһнә тиңкмин һардачин үүл дааһач Санл Маштыков болн ассистент Үлмҗ Эрдненов номин болн нөкцлтиг өргҗүллһнә халхар Узбекистанд одад ирв. Эднд мал өсклһнә «GreenVet» клиник (Ташкент балһсн) үрвр келә. Энд мал эмнлһнә болн месллһнә, өдгә цагин нань чигн салврар мастер-классмуд өггдв.

Шидр Аһш балһснд «Әрәсән нерд» гидг бичкдүдин болн арвтнрин үүдәлтин нарт- делкән марһан-наадмин девсң болв. Эн марһан сойлын седвәр дөңнлһнә президентск саңгин дөңгәр давулгдна, жюриг нертә дууч Анита Цой һардна.

Төрскән харсгч Алдр дәәнд орлцсн күүкд улст нерәдсн керг-үүлдвр Н. Пальмовин нертә Келн-улсин музейд болв. Дәәнд орлцсн күүкд улсин тускар келҗ өгчәх харһлт санлын олн керг-үүлдврмүдин йовудт болснь темдгтә.

Иим нертә һәәхүл Элстд «Арт Эрдэни» гидг галерейд секгдв. Терүнд зурлһна эрдмд түрүн ишкдлән кеҗәдг зурач Дима Бараевин зургуд үзүлгдҗәнә.

Амр-Санана нертә Келн-улсин дегтрин саңд Чернобыльд болсн аюл уга келһнд орлцачнрт нерәдгдсн «Җирһлин төлә әмән әрвлсн уга» гидг шин дегтрин презентац болв. Темдглхәс, эн дегтрт Семипалатинск, Тоцкий, Новая Земля, «Маяк» гидг полигонд ядерн бомб олзллһиг шинҗлсн керг-үүлдврмүдт орлцачнрин тускар бас келгдҗәнә. Эн дегтрин түүрвәчнр Һучна Борис Галина хойр болна. Борис Букиевич таңһчин чернобыльцнрин олна ниицәг һардҗана. Үүрмүдиннь ач-тус хәрүлхин, эднә санл мөңкрүлхин төлә эн дегтр барас һарһх күсл тәвәд, 2019 җилд эдн көдлмшән эклсмн.

Диилврин өдриг угтад, «Жаңһр» Хальмг Таңһчин наадһасин театр шин наад белдҗәнә. Төрскән харслһнд ончрсн хальмг баатрмудын санлыг тевчәд, театрин коллектив үүдәгч үүлдврән шунмһадулҗана.

Хальмгин Толһач Хаска Бату таңһчин күндтә иргн, улсин эдл-ахун ачта көдләч Гелий Ким 90 нас зүүснләнь йөрәв. Ут тоодан 48 җилин туршарт төрскн таңһчиннь делгрлтин халхар эн көдлв. Басан Бадьминович Городовиковин һардврт таңһчан шинәс босхлһнд, тер мет урһциг усар тетклһнә сурвлҗ тосхлһнд, тутрһ урһалһнд болн талдан кергүдт ик тәвцән орулсн күн болна.

Шидр Элстд «2024 җилин Хальмг Таңһчин йилһән сән багш» гидг марһана ашнь диглгдв. Түрүләд багшнр эврә сурһулин, дәкәд района, аштнь таңһчин кемҗәнд дөрлдәд, эврә билг-эрдмән, дамшлтан, шин эв-арһс яһҗ олзлдган медүлв. Эднә кичәлмүдиг Аһшин, Сарпулин, Әәдрхнә, Дагестана багшнр болн номтнр, Әрәсән марһана дииләчнр үнлв. Эн җилин марһан академик Эрднин Пүрвән үүдәсн УДЕ-н эв-арһ делгрүллһнә төрәр болв.

Хальмг Таңһчин Улсин Хуралын (Парламентин) Ахлач Артем Михайлов Санкт-Петербург балһснд болсн Әрәсән зака үүдәчнрин Хүүвин сүүрт орлцв. Эн керг-үүлдвр Таврическ бәәшңд болв. Терүнд Әрәсән Президент Федеральн Хургт кесн Илгәврин медлд нилхд төрлһиг икдүллһнә, бичкдүдиг асрҗадг өрк-бүлмүдиг дөңнлһнә, «Селәдин делгрлт» гидг шаңһа көтлврин медлд селән һазрт сән таал тогталһна төрмүд хәләгдв.