Узбекистана үүрмүдлә нөкцлт батрҗана

16-05-2024, 13:44 | Общество, Таңһчин зәңгс, Зіњг, Сурєуль-эрдм

Одахн Хальмг ик сурһулин мал эмнлһнә тиңкмин һардачин үүл дааһач Санл Маштыков болн ассистент Үлмҗ Эрдненов номин болн нөкцлтиг өргҗүллһнә халхар Узбекистанд одад ирв. Эднд мал өсклһнә «GreenVet» клиник (Ташкент балһсн) үрвр келә. Энд мал эмнлһнә болн месллһнә, өдгә цагин нань чигн салврар мастер-классмуд өггдв.
«Көдлмшин тускар келхлә бидн Самаркандын мал эмнлһнә медицинә, мал өсклһнә болн биотехнологийин ик сурһулин Ташкент балһснд бәәдг әңгин багшнрла болн оютнрла харһад, Хальмг ик сурһулин, мана тиңкмин болн клиникин тускар тодрхаһар келҗ өгләвидн. Би тиңкмин һардач болсн деерән манад күцәҗәдг төсвсин, оютнрин болн багшнрин кеҗәдг номин шинҗллтин, шин технологийин тускар келҗ өгләв.
Нанла хамдан одсн ассистент Үлмҗ Эрдненов мастер-класс үзүләд, олн зүсн месллһ кеһәд, дамшлтын хирургийд олзлдг өдгә цагин кесг тоотыг үзүлв. Тер месллһиг мана тиңкмин баһ наста номт Үлмҗ Геннадьевич Узбекистана хамгин сән «GreenVet» клиникд Ташкент балһснд келә. Эн мастер-класст мал эмнлһнә орн-нутгин цергллтин, кесг талдан клиникин эмчнр, Ташкентин әңгин багшнр болн оютнр орлцв. Диагностикин олн зүсн тоотыг Үлмҗ Геннадьевич тодрхаһар цәәлһҗ өгв.
Мадниг Узбекистанд йир сәәнәр тосв, келн-улсин шимтә узбек улсин хот-хоолар тооһад, мана келсн үгиг күцәһәд, лавкд мана йирдән хәләсн эд-тавриг хулдҗ авад, бәәлһнә болн көдлмшин цуг таал маднд тогтав. Тиигҗ долан хонгтан бидн туульд туссн мет бәәләвидн», – гиҗ Санл Маштыков тер йовлһна тускар келв.
Тер мет энд Хальмг ик сурһулиг 2023 җил төгсәсн мергҗлт Ирода Сабирова месллһ келһнд дөң болҗав. Ташкентин әңгд ода орс келтә оютнрин баг ик сурһульд авв. Болв энд орс кел сәәнәр меддг багшнр цөөкн, цуг сурһулин көдлмш узбек келәр күцәгднә. Тиим таалд хальмг вузин элчнрт эн багин оютнрт лекц умшх, дамшлтын семинар кех селвг өгв. Тиим кевәр ода Хальмг ик сурһулин мал эмнлһнә тиңкмин номтнр болн багшнр сүлҗәнә нөкцлтин халхар Ташкентин әңгин һардврла бооца батлхмн. Эн туст тиңкмин номтнр ик дамшлт хоршасн бәәнә, сүлҗәнә сурһулин систем тогталһна седвәрчнь тиңкмин һардач Санл Маштыков бәәсмн, кесг җил хооран ковид гем тарҗасн кемлә тиим кергиг эн күцәлә.
Тиим кевәр хальмг багшнр онлайн таалд узбек оютнрт лекц умшх, дәкәд таңһчин номтнр Ташкентд чигн одад, тенд цаг зуур кичәлән өгх. Болв түүнә өмн Әрәсән ик сурһулин министерств тиим нөкцлт күцәлһнә төлә эврәннь зөвән өгх зөвтә. Тиим көдлмш күцәх седкл хальмг, узбек номтнрин талас бәәнә. Холас дасхлһна технологиг Хальмг ик сурһульд өргнәр олзлҗана, эн туст ик дамшлт бәәнә.
Тер ул деер нөкцлтән хальмг болн узбек вузмудт өргҗүлҗ болҗана. Ташкентд болсн харһлтын йовудт Самаркандын вузин әңгин һардачин дарук Гайрат Акрамович Менглиев Хальмг ик сурһулин багшнрин болн терүг төгсәсн мергҗлтнрин гүн медрлинь болн сән белдвринь темдглв. Хальмг ик сурһулин мал эмнлһнә тиңкмин мергҗлтнр Узбекистана вузин оютнриг белдлһнә кергт орлцҗ чадхла ик туста болх гиҗ темдглв.
Тер мет Ташкентин «GreenVet» клиникд өдгә цагин нәрн кесг кергсл бәәнә, терүг олзлдгиг хальмг оютнр дасҗ авхла бас теднә дамшлтынь байҗуллһнд, медрлинь гүүдүллһнд ик туста болхмн билә. Тиигҗ оюнрин сольлцана эв-арһар эн клиникд Хальмг ик сурһулин баһчуд дамшлт автха гисн төрәр бас күүндвр болв. Аштнь хальмг оютнриг эн халхар белдлһнә бооцан бас батлгдв. Ирода Сабирова эднә белдвринь бүрткх.
Тер мет тиңкмин һардач Санл Маштыков Ташкентин хойр дунд сурһулин арвтнрла харһҗ Хальмг ик сурһулин тускар келҗ өгв. Эндр Узбекистана кесг баһчуд Элстд сурчана, удл уга малын эмчнр болхмн. Ода теднә ормиг Ташкентин баһчуд чигн эзләд бәәх. Эдн мөңгән өгәд бооцана ул деер сурх. Болв Узбекистанд Хальмг ик сурһульд өгдг медрлин чинринь өөдәнәр үнлнә, тегәд баһчудыг Хальмг Таңһчд йовулхар зүткнә.
Ташкентин нег школд англь келәр зәрм кичәлиг дасхна, тегәд энд сурдг баһчуд һазадын кел сәәнәр меднә. Эдниг Хальмг ик сурһульд авад, нарт-делкән төсвс күцәлһнд олзлхар тиңкмин һардач Санл Маштыков зуралҗана. Тер сурһулин нег сурһульч ода хальмг вузин малын эмчин дацңгин 2-ч курст сурчана, һазадын келнә медрлнь йир сән, гиҗ Санл Степанович онц темдглв. Ташкентд сурһульчнрла болсн харһлтын йовудт Хальмг ик сурһулин туск соньн фильм үзүлгдв.
Тиим кевәр хальмг номтнрин Узбекистанур йовлһн ик туста, нөкцлтиг өргҗүллһнд ик нилчән күргсн хол зурата керг болв. Хальмг ик сурһулин болн Узбекистана вузмудын нөкцлт мана таңһчин экономикин талдан салврин делгрлтиг түргдүллһнд тәвцән орулад бәәхнь лавта.

ТҮРВӘН Һуна
Узбекистана үүрмүдлә нөкцлт батрҗана

Видео