Шидр «Негдсн Әрәсәг» дөңнлһнә олна штабд Хальмг Таңһчин Толһач Хаска Батун һардвртаһар «төгрг ширән» сүүр давв. Улсин Хуралын (Парламентин) депутатнр, сурһуль-эрдмин, сойлын, эрүл-менд харлһна болн олна бүрдәцсин элчнр терүнд орлцв. Така сарин 5-д темдглгдх таңһчин Өдрин тускар күүндвр болв. Тер мет таңһчин социальн-экономическ делгрлтин туск төр бас хаһлгдв.

Хальмг Таңһчин селәнә эдл-ахун министерствин, «Россельхозцентр» ФГБУ-н мергҗлтнр Ик Буурла, Яшкулин болн Хар Һазра РМО-син элчнрлә хамдан хойр гектар аһу һазрт царцахаг уга келһнә туст ирлцңгү көдлмш давулв. Тер мет таңһчар 155 миңһн гектар аһу һазр шинҗлгдв. 4,17 миңһн гектар аһу һазрт хорта урһмл урһҗаснь илдкгдв. Урднь ирлцңгү көдлмш Үстин районд бас давулгдв.

Хөн сарин 18-д музеймүдин Нарт-делкән өдр темдглгднә. Улсин тууҗиг хадһлҗ, төрскнч седклтә баһчуд өсклһнд орлцҗадг, сойлын болн гегән-герлин ик көдлмш кеҗәдг музеймүдин көдләчнр эн өдриг байрин бәәдлд темдглнә. Улсин җирһлд ик чинр зүүҗәдг көдлмш күцәҗәх кесг сай әмтнә күч-көлсинь үнлх, йөрәлин үгмүд келҗ, күцәмҗ дурдх цаг иигәд ирнә.

Шидр болсн сүүрт селәнә эдл-ахун министр Гаван Тимур илдклән кев. Тимур Сергеевич АПК-н халхд регионд керглгдҗәдг кадрмудын бачм төрин тускар келв.

Нидн батлсн бооца күцәлһнә йовудт мана таңһчин бүрдәцс Луганск Улсин Республикин Антрацитовск района иргнмүдт дөңгән цаарандан күргҗәнә. Тер бүрдәцсин дунд Хальмг Таңһчин мал эмнлһнә Заллтыг заах кергтә. Эн көдлмшин тускар шидр болсн брифингин йовудт Заллтын һардач Санҗин Виктор келҗ өгв.

Мана таңһчд һазр дор бәәдг байн зөөр күццдән шинҗлгдәд уга. Өөрхн иргчдән хәәврин бурһудсн бәәр тосхҗ, нефтин болн газин орм олхар зуралгдҗана. Тер мет Доланск-Эрдниевск бәәрнд тиим көдлмш күцәгдв, ода болхла тенд олҗ авгдсн тоот шинҗлгдҗәнә.

Непал орн-нутгт Лумбини паркд Бурхн Багш һарсн һазрт бадм цецгин суврһн секгдв. Әрәсән шар шаҗнд шүтдг улс сексн түрүн суврһн болв.

«Әрәсә» гидг һәәхүл нидн үкр сарин 4-д секгдәд, орн-нутгин күцәмҗин тускар олнд медүлҗ, сойлын, сурһулин болн нань чигн соньн керг-үүлдвр бүрдәҗ давулҗана. Һәәхүлд Әрәсән 89 регион, федеральн ведомствс болн олна бүрдәцс орлцҗана, ут тоодан 12 сай күн нааран ирсн бәәнә. Эн җил Әрәсән Президент Владимир Путинә шиидврәс иштә мана орн-нутгт өрк-бүлин Җил зарлгдв. «Әрәсә» гидг һәәхүлд өрк-бүлин Җил секлһнә байрин керг-үүлдвр энд болснь орта болв. Өрк-бүлин Җилд нерәдгдсн керг-үүлдврмүд һәәхүлд цааранднь чигн болхмн.

Төрскән харсгч Алдр дәәнд Диилвр бәрснә 79 җилин өмн өргнд Хальмг ик сурһульд инженерин-технологин дацңгиг төгсәсн, гвардин баһ сержант Алтн Музаевин санлынь тевчҗ неринь мөңкрүллһнә самбр секгдв. Инженерин-технологин, талдан дацңгудын оютнр, багшнр, Хальмг ик сурһулин һардачнр эн керг-үүлдврт орлцв. Һучн нәәмтә дәәч орн-нутган харсч, цергә шишлң керг-үүлдврт орлцад, 2023 җилин һаха сарин 1-д күнд шавас көлтә Запорожск мүҗин һазрт әмнәсн хаһцла.

Эн җилин түрүн һурвн сарин эргцд мана таңһчин селәдт бәәдг 65 нас һарсн зун шаху медәтин эрүл-мендин бәәдлинь шинҗлв, 157 күүнд лабораторн шинҗллт келһнд дөң күргв, эмәр болн эмнлһнә кегдлмүдәр теткв. «Демографь» гидг келн-улсин төсвин медлд «Ах үйин улс» гидг региональн төсвин халхар эн керг-үүлдврмүд күцәгдв.