Хальмг Таңһчин Келн-улсин оркестр дарани концерт сән эклхәр белдҗәнә. Хулһн сарин 24-д үүдәгч коллективин «Негдлтин көгҗм» гидг концерт болхмн эклҗәнә. Эн өдр көгҗмд дурта әмтн «Ойрат-Аренд» ирҗ, дурта дууһан соңсҗ, соньн көгҗмин дүүрәнд духуцхмн.

Шар шаҗна нарт-делкән хург 2025 җилин Һаха сард Хальмг Таңһчд болхмн. Ончта эн йовдлд белдвр эклҗәнә. Нарт-делкән һурвдгч хургиг Элст балһсн тосч авхмн.

Хальмг Таңһчд 110-ч онц Хальмг мөрн дивизин дәәчнрт бумб тәвхәр шиидсмн. Элст балһсна хургин медлд үүлддг сойлын-тууҗин зөөрин төриг хаһлдг комиссин дарани сүүр деер тер бумбин тускар күүндвр кегдҗ, бумбин цаг-зуурин зурц болн терүг босххин ормин тускар селвлцв. Бумбин зурциг Әрәсән ачта архитектор Шалан Сергей белдсмн. Баатрмудын аллейин өөр эргнд бумбиг тәвх кергтә гиҗ зуралгдҗана.

Хальмг АССР-ин сойлын ачта көдләч, СССР-ин болн Хальмгин бичәчнрин ниицәсин гешүн, нертә бичәч болн шүлгч Куукан Анатоль эн җилин така сарин 25-д 100 насна өөнән темдглх бәәсмн.

Шидр Ростов-на-Дону балһснд Әрәсән Өмн үзгин Парламентск Ассоциацин (ЮРПА) дарани хург болв. Хальмг Таңһчин Улсин Хуралын (Парламентин) Ахлач Артем Михайлов һардсн делегацин ханьд энүнә дарукс Бадмин Вячеслав, Нуура Николай, депутатнр Болдра Валерий, Җаңган Чимид, Никитинә Айс, Кокан Михаил, Саңһҗин Лаг, Цекрә Зулта болн Эрднин Гилән орв. Хойр өдрин эргцд Әрәсән Өмн үзгин регионмудын зака үүдәгч бүрдәцсин элчнр олн зүсн керг-үүлдвр, харһлтс давулҗ, чинртә төрмүдәр өргн күүндвр кев.

Давсн амрлһна өдрмүдт мана орн-нутгт селәнә эдл-ахун көдләчнрин Өдр болв. Хальмг Таңһчин Толһач Хаска Бату эн халхд көдлҗ, таңһчиннь болн орн-нутгиннь делгрлтд ик тәвцән орулҗ йовх көдләчнриг йөрәв.

Хальмг улс Әрәсән ханьд эврә сән дурар орсна 415 җилин өөнд нерәдәд, Москва балһснд Джангариад болв. Эн марһан тавдгч дәкҗ хотл балһснд давулгдҗана, терүнд орлцачнр бүс бәрлдҗ бөк бәрлдв, саадгар хав, цалм хайв, футбол, волейбол, армрестлинг, ширә деер нааддг теннис, шатр, шаһа наадад, хамгин чидлтәһинь болн эвтәһинь йилһҗ авв. Өрк-бүмүд дунд «Эцк, эк болн би – спортивн өрк-бүл» гидг марһан болв.

Шидр Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан һардврт социальн болн күч-көлснә хәрлцәнә һурвн халхин комиссин сүүр болв.

Хальмг Таңһчин Улсин Хуралын (Парламентин) Ахлачин даалһврар депутат Эльдән Виктор зарһин-медицинск шинҗллтин таңһчин бюрон 65 җилин өөнд нерәдгдсн байрин хургт орлцв. Таңһчин зака үүдәгч бүрдәцин болн эврәннь нерн деерәс СМЭ-н цергллтин көдләчнриг йөрәһәд, дааврта болн нәрн көдлмштнь күцәмҗ дурдв.

Хөрн тавн җил болад, эцкән үзв.
«Төрскн теегм, чамаһан үзхнь...…»
Эңкрлдгнь олн болв чигн эклә әдл болхш.