Сансн санань эрк биш күцтхә!

Хөн сарин 24-д таңһчин цуг сурһульмудт төгсәһәчнрин төлә сүл хоңх җиңнв.
Сурһулин җил төгсв. Ода 9-ч болн 11-ч классмудын арвтнр ОГЭ-н болн ЕГЭ-н шүүврән экләд өгчәнә. Тиим кевәр эдн эврә җирһлин хаалһан шүүҗ авад, дурта эрдмәрн цааранднь сурхмн.
Эн җил Хальмг Таңһчд 11 класс 1345 күн, 9-ч класс болхла 3260 арвт төгсәҗәнә. Тер тоод эднәс кесгнь онц кев-янзта хату цаас авч, «Сурһульдан онц күцәмҗ бәрснә төлә» гидг медаляр ачлгдхмн. Селәдин зәрм сурһульмудт 4-5 эс гиҗ түүнәс цөөкн арвт дунд сурһулян төгсәҗәнә, тиим болв чигн эднәс кесгнь бас медаль авхар шунҗана, зуг ЕГЭ-н шүүвриг сәәнәр өгх кергтә.
Элстин олн салврта гимназьд (ЭМГ-д) бас 84 төгсәһәчин төлә сүл хоңх җиңнв (зургт). Эдн гуманитарн, физикин болн эсвин, эмнлһнә болн социальн-экономикин шишлң классмуд төгсәв. Эднәс кесгнь бас онц янзта хату цаас авч, медаляр ачлгдад чигн бәәхмн, зуг эврәннь гүн медрлән эдн ЕГЭ-н шүүврт үзүлх зөвтә. Эдн олн зүсн ик сурһуль шүүҗ авсн бәәнә, оютнр болхар седҗәнә. Тер седклнь эрк биш күцх гиҗ лавтаһар келҗ болҗана.
Яһад гихлә ЭМГ-н төгсәһәчнр Әрәсән хамгин сән вузмудт сурна. Тер мет Германьд, Испаньд, Финляндьд, Китдт бас сурна.
- Һучн долан җилин туршарт мана гимназиг дөрвн миңһн күн төгсәв, тедн дунд 11 күн алтн медаляр, 48 күн цаһан мөңгн медаляр ачлгдла, онц кев-янзта хату цаасн 48 арвтд бәрүлҗ өггдлә, – гиҗ ЭМГ-н сурһмҗллһна төрәр үүлддг һардачин дарук Зоя Чокаева келҗ өгв.
2014 җилд ЭМГ Әрәсән йилһән сән 500 сурһулин тоод орла. Тер мет орн-нутгин йилһән сән техническ вузмудын төлә абитуриентнриг белдлһнә үзмҗәр 2021 җилин то-дигәр гимназь сән гисн таңһчин сурһульмудын негнь болв. Тиим кевәр техникин халхар гүн медрл өгч, багшнр таңһчд ик туста көдлмш күцәҗәнә, тиим неквр ода цуг сурһульмудт тәвгдҗәнә. Тегәд чигн ЭМГ-н сурһульчнр техническ вузмуд шүүҗ авна, физикин, эсвин кичәләр сән медрл үзүлнә.
«Тер ховр дамшлтарн ЭМГ-н багшнр цуг сурһульмудла хувалцҗ чадҗана, нертә вузмудла кесг җилин туршарт нөкцлтнә, сурһульчнран теднә некврлә таньлдулна, эднә даалһвриг күцәнә», – гиҗ гуманитарн салврин 11-ч классин багш, классин һардач Ирина Булукова мана күүндврт орлцҗ цәәлһв.
Тер мет талдан салврин, тер тоод экономикин халхин вузмудт чигн ЭМГ-н төгсәһәчнр орна, эн үзмҗәр ЮФО-н сән гисн сурһуль чигн болв. Тиим бат медрлиг гимназин сурһульчнрт багшнр өгнә.
- Мана төгсәһәчнр спортд чигн ончрна, ЮФО-н марһаст баскетболар, ширә деер нааддг теннисәр, призермүд болна, – гиҗ Әрәсән болн Хальмг Таңһчин ачта багш Геннадий Бадма-Гаряев немҗ келв.
Сүл хоңхин байрт төгсәһәчнриг багшнрнь, гимназин һардачнр, эк-эцкнрнь, нааран ирсн күндтә гиичнр йөрәҗ, күцәмҗ дурдв.
Элстин болн райодын цуг сурһульмудар болсн байрин керг-үүлдврт таңһчин болн райодын йосна элчнр орлцҗ йөрәв.

ТҮРВӘН Һуна

Новости по теме

• 

  Һазадын орн-нутгудла нөкцлтән делгрүлҗәнә
  Һазадын орн-нутгудла нөкцлтән делгрүлҗәнә
• 

  Бадма Башанкаев вошел в Генсовет «Единой России»
  Бадма Башанкаев вошел в Генсовет «Единой России»
• 

  Дааврта үүлд батлгдхиг дөңнв
  Дааврта үүлд батлгдхиг дөңнв
• 

  Путь рисоводческого хозяйства к успеху
  Путь рисоводческого хозяйства к успеху