Босхгдсн төрмүд эрк биш хаһлгдхмн.

Басң өдрлә Хальмг Таңһчин Толһач Хаска Бату Сарпан района Обильное селәнд йовад бәәрн улсла харһв (зургт).
«Балһсдт сән кец-таал тогталһн» төсвин йовудт тосхгдсн сойлын болн амрлһна паркд бәәдг Төрскән харсачнрин бумблвд Бату Сергеевич цецгүд тәвҗ санлынь тевчв.
Нидн бат ясвр күцәгдсн Обильное селәнә дунд сурһульд района нүүрләчнрлә харһлт болв. Түрүн сурвр эрүл-менд харлһна төрәр болв. Бат ясвр Сарпан района эмнлһнд керглгдҗәнә. Бүрдәциг һардҗадг ах эмч Җаман Олег бәәрин улднь оньган өгхиг сурв.
Эн сурврт таңһчин эрүл-менд харлһна министр Булат Сараев: «Ирлцңгү бүрдәцс региональн болн шаңһа төсвст орулгдад, хамгин түрүнд 2030 җил күртл утдулгдсн көтлврәр ясгдхмн», – гиҗ хәрү өгв.
Обильное селәнә бәәрн күн, ачта амрлһндан һарсн Юрий Воронцов усна болн хаалһ тосхлһна төрмүд босхв. Өдгә цагт федеральн хаалһас авн селән күртл 17 дууна һазр үүрмг чолуһар бүркгдсн бәәнә. Намрин-үвлин цагт эн хаалһар йовҗ болхш. Энүнә тускар таңһчин Толһач района болн селәнә һардврин, ирлцңгү министерствин цәәлһвриг соңсҗ, төр хаһллһнд дөңгән күргхиг үгән өгв.
Усна төрәр болхла, һазр дор бәәдг булгиг олзлҗ болна, түрүләд геологическ шинҗллт кех кергтә. Хамдан негдәд, ик үүлдвр бүрдәһәд, кергтә бәрмт цаас тогтаһад төриг хаһлҗ болхмн. Тер мет седвәргч халхар мөңг һарһҗ өглһнә көтлврин мөңгиг һурвн сай арслңд икдүлхәр зуралҗанавидн, – гиҗ Бату Сергеевич темдглв.
– Район болһнд хаһлгдх төрмүд нурһлҗдан әдл болна. Тегәд цугинь учртан авч, өөрхн иргчд хаһлх эв-арһинь олҗ чадхмн, – гиҗ Хаска Бату харһлтыг ашлв.
150 һар җил хооран Обильное селәнд Михаил Архангелын нертә чонҗ босхгдад эндр күртл дүңгәнә. Таңһчин Толһач нааран орҗ, соньн тууҗинь соңсҗ, ла шатаҗ тәвв. Шаҗна объектиг хәләҗ, эн һанцхн Обильное селәнә биш, Хальмг Таңһчин зөөр болҗахинь Бату Сергеевич онц темдглсн болдг.
Тер мет Элст-Аһш хаалһин хаҗуд бәәдг Александр Невскийин нертә бичкн чонҗд Хаска Бату бас орҗ хәләв. Энүг нег һазра арһлач Александр Бердунов бәәрн улсла хамдан босхв. Аһшас болн Элстәс дигтә 150 дууна өндр һазрт эн чонҗ дүңгәнә. Александр Невскийин бурхиг Бату Сергеевич белглв.

Тер өдрин үдин хөөн таңһчин Толһач Көтчнрә района Чкаловский селәнд ирв.
Һурвн җил хооран ясгдсн селәнә сойлын Герт бәәрн улсла харһв. Эрүл-менд харлһна, усар тетклһнә, бат ясврин, селәнә эдл-ахун болн талдан төрмүдәр көтчнрәхн сурврмудан өгч чадв.
Көтчнрә района эмнлһнә эмч Эрнҗәнә Надежда сән чинртә УЗИ кедг кергсл хулдҗ авлһнд нөкд болхиг сурв. Эндр эмнлһнд бәәдг кергсл хуучн, тегәд удл уга терүг олзлҗ болшго.
Усар тетклһнә төр бас босхгдв. Хаска Батун темдглсәр, Әрәсән Залврин даалһсар эн бачм төрәр шишлң зура тогтагдсн бәәнә. Терүнд таңһчин селән болһн орв гиҗ келв. Терүнәс нань Сарпа нууриг усар дүүрглһнә төрәр бас күүндвр һарв.
– Өдгә цагт техническ көдлмш давулгдҗана, цувгуднь бас цеврлгдҗәнә. Ирлцңгү көдлмш күцәгдәд, эн төр хаһлгдх, гиҗ Бату Сергеевич цәәлһҗ келв.
Селәнә эдл-ахун төрәр болхла, ирлцңгү министр Һаван Тимур үг авч, сүл цагт таңһчин малчнр малыг борддг талвңгуд тосхҗахинь темдглв. Үлгүрлхд, Көтчнрә районд баһ наста фермер Очр Черкасов нег миңһн багтамҗта бод мал бәрдг талвң тосхҗана. Энүнә көдлмшиг Тимур Сергеевич өөдәнәр үнлв.
Бичкдүдин садмуд болн сурһульмуд, хаалһс яслһна, спортивн талвңгуд болн талдан социальн объектс тосхлһна төрмүд Көтчнрә районд босхгдсн билә.
– Эндр нег һазра мана улст олн зүсн грантмудын төсвст орлцдг арһ бәәнә. Дөрвн җил хооран мана таңһчд грантмудын эв-арһар арвн сай арслң ордг билә. Өдгә цагт болхла, 200 сай арслң ордг болв. Эн мөңгн сойлын, спортын, арһлачнрин болн талдан халхар күцәдг төсвст йилһгднә, – гиҗ Хаска Бату харһлтын йовудт цәәлһҗ келв.
Харһлтын чилгчәр, цуг босхгдсн төрмүд онц оньгт авгдҗ, хаһлгдх арһ олгдхмн гиҗ темдглгдв.
КАРСАНА Евгения

Новости по теме

• 

  Бичкдүдиг байрлулхар
  Бичкдүдиг байрлулхар
• 

  Улсин Хуралд – 30 җилин өөн
  Улсин Хуралд – 30 җилин өөн
• 

  НА РАДОСТЬ ДЕТЯМ
  НА РАДОСТЬ ДЕТЯМ
• 

  Төрскнч седклтә баһчудыг сурһмҗлхин төлә
  Төрскнч седклтә баһчудыг сурһмҗлхин төлә