Седвәр бәәхлә, ямр чигн керг бүтх

06-06-2024, 14:46 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Мөчн сарин 2-т Хальмг Таңһчин Толһач Хаска Бату түрүләд Городовиковск районд одв. Энд Әрәсән эрүл-менд харлһна төсвин йовудт района шин поликлиникин гер тосхгдв.

- Поликлиник өдгә цагин эмнлһнә кергсләр теткгдсн бәәнә, тиим кевәр эмчнрин дөңгәр бәәрн улст сән туслмҗ күрггдхмн, – гиҗ района эмнлһнә ах эмч Босхмҗин Виктория келв.
– Эн тосхлтыг эдлврт орулхин төлә Әрәсән эрүл-менд харлһна министерств дөңгән күрглә, тиим кевәр поликлиник әмтиг орулҗ авхдан белн болв. Ода күртл месллһнә әңгин хуучн гер хадһлгдв, энүг хальмг нойн Һахан Михаил тосхла, эн гериг шинрүләд бас әмтнд тустаһар олзлҗ болҗана, – гиҗ Бату Сергеевич селвгән өгв.
Цааранднь таңһчин Толһач Розенталь селәнә сойлын Герт одад, тосхлтын көдлмш энд сән чинртәһәр күцәгдсинь үзв. Ода Розенталь селәнә әмтн сәәнәр амрад, энд үүлдҗәдг кесг ансамблин көдлмшт орлцҗ чадҗана. Түүнә хөөн энд таңһчин Толһач әмтнлә харһв.
– Бәәрн улс чидлән хамцулад, кесг седвәр татад бәәхлә мана бәәдл-җирһл чигн ясрад бәәх. Мана таңһчиг усар тетклһнә, әмтнә җирһлин таал ясруллһна, хаалһс тосхлһна, элсрлһнлә ноолдлһна, амр биш төрмүд хаһллһнд орн-нутгин толһач цуг дөңгән күргҗәнә, Әрәсән залврт болн нань чигн бүрдәцст даалһвр өггдсн бәәнә, бәәдл-җирһлиг ясруллһна төлә сән таал тогтахвидн, – гиҗ харһлтын эклцәр Бату Сергеевич келв.
Тер мет цуг райодыг болн таңһчиг делгрүллһнә төлә бат ул тогтагдҗана, гиҗ таңһчин Улсин Хуралын (Парламентин) депутат Елена Лотник келв. Городовиковск района наадк селәд бас делгртхә, баһчуд райондан көдлтхә гиҗ дурдв. Энүнә һардҗадг селәнә эдл-ахун бүрдәц бас күцәмҗтәһәр көдлҗәнә.
– Мана таңһч селәнә эдл-аху өргнәр делгрҗәдг регион болҗ орн-нутгт ик чинр зүүх зөвтә, тиигхлә бидн кесг зураһан күцәҗ чадхвидн, - гиҗ Бату Сергеевич заав. Мана таңһчд агропромпарк тосхгдҗана, тенд бас олн зүсн эд-тавр кеҗ һарһгдхмн.
Ода мах эд-бод кедг бүрдәц Китдин дөңгәр тосхгдҗана, тернь бас экономикин делгрлтд ик нилчән күргх.
Городовиковск района кесг селәдт усна сурвлҗн чигн бәәнә, болв усна чинрнь му, терүг хот-хол кехин төлә олзлҗ болшго. «Цевр усн» гидг Әрәсән төсвин йовудт тер төриг хаһлҗ болхмн гиҗ хургт орлцачнр келв. «Таңһчд усна кесг сурвлҗиг шинрүллһнә көтлвр күцәгдх, түүнә тускар би орн-нутгин залврт болн тосхлтын министерствд келләв. 2027 җил күртл Городовиковск районд болн бүклдән таңһчд эн көдлмш күцәгдх», -гиҗ Бату Сергеевич темдглв.
Тер мет Чапаевск дунд сурһулин һардач сән бат ясвр кеснд ханлтан өргв, Лазаревск селәнд сойлын Герин ясвр кех кергтә гиҗ әмтн сурв. Цуг тер төрмүд эрк биш күцәгдх болв.
Таңһчин Толһачин үгәр, өөрхн иргчд таңһчин нефтин халх таңһчин олз-орун төлә көдлх, алван таңһчин хазнд орулҗ, мек-тах һарһдг улсас сулдхх зөвтәвидн, тиим үүлдвр ода Әрәсән Президентин орлцлһтаһар күцәгдҗәдг болв.
Тер өдр Хаска Бату Яшалтан районд бас одв. Таңһчин Толһач энд района дегтрин саңгин тосхлтын йовудыг шинҗлҗ хәләв. Тер мет Яшалтан Петровскийин нертә уульнцд 2,5 дуунад хаалһ тосхгдв, көдлмшин өрәлинь тосхачнр дуусв. Энүнә үннь 21 сай арслң тогтаҗана, эн тосхлтыг таңһчин Толһач бас бүрткв.
Тер мет Городовиковин нертә уульнцд усна тогталын көвәд әмтн амрдг 10 сай арслңга талвң тосхгдв.
Эндәс хол биш сурһулин парк бәәнә, энүнә таалыг бас үзмҗтәһәр оңдарулв. Таңһчин Толһач энд цуглрсн СВО-д орлцачнрин күүкдт белгән бәрүләд, теднд хөв-кишг дурдв.
Энүнә дару таңһчин Толһач Яшалтан района Манычский селәнә дунд сурһульд күцәгдсн бат ясвриг хәләв. Сурһулин һардач болн таңһчин сурһуль-эрдмин министр Әңгрә Булһн цәәлһвр өгв.
– Социальн кесг төр онц зураһар Әрәсән залврин йилһгдсн мөңгәр күцәҗәнә, тер зура ода шинәс 2032 җил күртл батлгдв, тиим кевәр кесг төр цуг райодар хаһлгдхмн, гиҗ Бату Сергеевич келв.
Тер мет района эмлнлһнә котельниг, поштын гер шинрүллһнә, селәдиг, усар тетклһнә, эмчин кадрмудын, «Красный партизан» селәнд сурһулин гер тосхлһна болн нань чигн төрмүд Яшалтан района иргнмүдлә болсн күүндврт босхгдв. Цуг тер төрмүд таңһчин Толһачин дөңгәр болн района, таңһчин талдан һардачнрин орлцлһтаһар күцәгдх, гиҗ Бату Сергеевич ашлвр кев.

ТҮРВӘН Һуна
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх
Седвәр бәәхлә, ямр чигн керг бүтх

Видео