Һартан бәрсән кедг һавшун бер

20-06-2024, 12:57 | Общество, Таңһчин зәңгс, Зіњг, Күн болн җирһл

Валентина Дрижеева насарн баахн болв чигн арһта, һартан бәрсән кедг, өөрхн элгн-садндан түшг болдг күүкд күн мөн. Йисн җил хооран өркән өндәлһәд, Виктор авальтаһан хойр үртә болв. Герин эзн хойр җилдән цергә шишлң керг-үүлдврт орлцҗ йовна, тегәд өрк-бүлин керг-төриг эн бийнь хаһлҗ, күүкдтән килмҗ тусхадг деерән гемтә эцкән хәләҗ цугинь дааҗана.

Долан җил хооран эгчнь зеткртә йовдлла харһад, күүкән өнчрәв, тегәд Валентина зе күүкән асрдг болв. Эдн Дана күүкиг эврәннь ууһн үрнд тоолҗ, һарлдсн эк-эцклә әдл болв. Ода күүкн Элстин политехническ колледжд сурчана, олна бәәдл-җирһлд шунмһаһар орлцҗ, оютнрин хүүвин гешүн болна, эн седвәртә болн нүүрт йовдг оютн гиҗ тоолгдна. Дана наһц эгчдән дөң болҗ, герин көдлмш кенә, дүүнрән арднь орҗ хәләнә. Дима эн җил 1-ч класст орх, отхн Вероника ода чигн бичкн, җил күрәд уга. Аавнь гемин уршгар күүнә хәләвр угаһар бәәҗ чадхш, тегәд күүкн наһц эгчиннь ицлтә түшг болна. Сул цаг учрхла, Дана Дима хойр спортар соньмсч, таңһчд болдг марһаст орлцна. Эдн мотоцикл болн квадроцикл унҗ, теегин хаалһсар гүүлгхдән дурта.
- Мана өрк-бүл ниитә, бидн байр-зовлңган әдл хувалцҗ, нег-негән дөңнҗ, хамдан ямр нег төриг хаһлхар шуннавидн. Нег үлү ода, герин эзн маднас хол йовх цагла, бидн нег-негән дөңннәвидн. Авальм мобилизацин медлд цергә даалһвр күцәҗ йовна. Цергә коммисариатас цаасн ирхд саата биләв, тегәд эн хойр җил мадна төлә зөвәр күнд болв. Арһ учрхла, авальм мадна төлә җиңнүләд, әмд-менд йовнав, гиҗ зәңгән өгнә. Бичкдүд эцкән санад, арднь зовна, амрлһнд ирхләнь, мел ардаснь дахад бийәсн тәвхш. Хәрҗ ирхләнь, бидн сенр хот-хол болһад, һуйрин зүүтә кегдлмүд кеһәд, шимтә хотар тоонавидн. Цергә керг-үүлдврт одхаснь урд бидн гертән ясврин көдлмш эклсн биләвидн, ода терүг арһарн төгсәҗ, сән таал тогтаҗанавидн, – гиҗ Валентина бер келнә.
Цергә даалһвр күцәҗ йовдг авальдан зовад, әмд-менд хәрҗ иртхә, гиҗ дотран зальврҗ, хәәртә иньгән тесвртәһәр күләнә. Эн күнд цагла цергә керг-үүлдврт орлцҗ йовдг залу улсиг дөңнхин төлә Валентина Дрижеева СВО-д орлцачнрин авальмудла хамдан бат залһлда бәрҗ, буйнч седклин кергт орлцна. Тиигәд талдан күүкд улсла эн цергчнрт хот-хол, эм, дулан хувц цуглулна. Экнриннь үлгүрәр бичкдүд цергчнрт бичг бичнә, олн зүсн кегдлмүд кеһәд, эцкнртән илгәнә. Күүкд улс хоорндан зәңгәрн хувалцҗ, кенд ямаран дөң кергтә болҗахин тускар медүлнә. «Төрскән харсачнр» гидг шаңһа саңгин Хальмг Таңһчд үүлддг әңгин дөңгәр эдн «Тоһрун» гидг ду бичәд, цергә даалһвр күцәҗ йовдг залу улстан нерәдв.
Сул цаг учрхла, Валентина бер үүл бәрҗ, олн зүсн кегдл кехдән дурта. Зәрм улс бичкдүдтән Шин җилин байрла эс гиҗ һарсн өдрләнь өвәрц белг кехиг сурна. Дима көвүтәһән эдн ке-сәәхн кегдлмүд кеһәд, дотрнь шикр-балта дүрәд бичкдүдт тааста наадһас белднә. Эднә өрк-бүл хамдан зуульчлад, заһс бәрҗ чигн усна көвәд амрна. Авальнь болн эцкнь цергә керг-үүлдвр төгсәд хәрҗ ирхлә, эдн эрк биш хамдан амрхар йовх.
- Одахн бидн «Җилин сән гисн өрк-бүл» гидг марһанд орлцад, баахн өрк-бүлмүд дунд диилвр бәрвидн. Авальм марһанд орлцҗ чадсн уга, болв бидн күүкдтәһән күцәмҗ бәрвидн, 50 миңһн арслңга мөрә авснаннь тускар келвидн. Сүл хойр җил мана өрк-бүлд ик дааврта болн күнд болв, зуг эннь улм ниитә болхд туслв. Өрк-бүлин Җиллә иим чинртә марһанд диилвр бәрснь маднд ик байр-бахмҗ үүдәв.

ДООҖАН Наталья
ЗУРГУДТ: ниитә Дрижеевихнә өрк-бүл; Валентина берин кесн кегдлмүд

Видео