Хальмг Таңһчин эрүл-менд харлһна министерствин то-дигәр, пандемий эклсн цагас авн коронавирусар гемтсн улсин то 10758 болв. Сүл хонгт дәкәд 79 күн немгдв. Гемнь гиигнәр болн медмҗән угаһар давҗах 4258 күн гертән амбулаторн эмнлһнд бәәнә. Цаглань эмчнрин хәләврт тусад, эмнлһ авсн 8151 күн эн хальдврта гемәс эдгв. Сүл хонгт 120 күн эдгәд герүрн хәрв.

Хальмг Таңһчин Толһач Хаска Бату болн таңһчин эрүл-менд харлһна министерств орн-нутгин медицинск вузмудт сурчах баһчудт дуудвр кеҗ, эндрк амр биш цагла төрскн һазртан ирҗ көдлхиг сурсн билә. Таңһчин эрүл-менд харлһна министерствла бооца батлҗ Әрәсән медицинск ик сурһульмудт йилһгдсн ормд сурчах баһчуд дарунь эн дуудвриг дөңнснь темдгтә. Тиигәд одахн эмчин эрдм сурчах 11 күн таңһчин эмнлһст экләд көдлв. Эдн Элст балһсна поликлиникд, Манҗин Валентинан нертә бичкдүдин медицинск төвд, Приютна болн Баһ Дөрвдә райодын эмнлһст көдлҗәнә.

Эрднин экн цагас авн нарт-делкән күмн-әмтн үйәс үйд медрлән дамҗулад өгдг мөн. Көгшд дунд болн баһ наста улст әмдрлин ут хаалһдан үзсн-соңссн юман медүләд, үнлҗ болшго дамшлтарн хувалцна. Настнран күндлҗ эднә келсн юм соңсад, үгднь багтад йовхнь сән керг мөн. Энүгән мартл уга шидр мадн күч-көлснә ветеран Сергей Манджиевич Ивановла харһад, терүнә әмдрлин хаалһ болн көдлмшин тускар сурвидн.

Тыва республикин Камбы-лам Гелек Нацык-Доржу үүлдән орлһна барин ик цосрхл Кызылд үкр сарин 22-т улсин үүдәлтин Герт болхмн. Терүнд шаҗна элчнр, йосна үүлдәчнр, шаҗнд шүтдг олн улс орлцхмн. Бурхн Багшин номд шүтдг Әрәсәд бәәх цуг бүрдәцсин элчнр ирҗ орлцх гиҗ күләгдҗәнә.

Байрин өдрлә Улан Баатрт «Сокровенное сказание монголов. Комплексное исследование» гидг дегтрин презентац болв. Онлайн янзар болсн презентацд Моңһл орн-нутгин Ик Хуралын ахлач Г. Занданшатар, Хуралын депутатнр Ж. Мунхбат, Х. Болорчулуун, нань чигн улс, йосна, олна, сойлын үүлдәчнр орлцв. Ах редактор О. Содномпил дегтрин шинҗллтин тускар цәәлһв. Тәвн җилин туршарт кесн шинҗллтин көдлмшин тускар цуглрсн улст профессор, филолог номин доктор Б. Сумъяабаатар келҗ өгв.
Моңһлчудын хәәртә дегтрин номин ик шинҗллт күцәгдснь ик чинртә йовдл.

«Ты-супер» гидг телевизионн дууна марһаг НТВ канал дөрвдгч кемдән кеҗәнә. Буйнч седклин эн ик төсв әмтн дунд ик тааслт олв. Өнчн бичкдүдиг, интернатд бәәдг, теҗәл уга үлдсн күүкд-көвүдиг дөңндг төсв эн цагин дотр кесг баһчудт йоста дөң болв. Җирһлин хаалһан шүүҗ авхд, билг-эрдмән делгрүлхд тусан күргҗәх ик керг кеҗәх әмтнд ханлтан өргх кергтә.

Үкр сарин 18-ә өдрин темдглсәр Моңһл Улст короновирусар гемтсн 455 күн илдкгдв. Түрүн болҗ үкр сарин 10-д хамгин олн гемтсн күн Сэлэнгэ әәмгт олдгдв. Яһад гихлә эн әәмгт Әрәсән болн Моңһл Улсин хоорндк меҗән харул бәәнә. Тегәд Әрәсәһәс ирсн җолачнр эрк биш энд һаалин (таможенный) бүрткл кеһәд, удан зогсна. Тегәд моңһл улсин җолачнр Әрәсән Бурятьд гем хальдад, гиигн кевәр эс гиҗ медмҗән угаһар давҗах йосар гемтәд, нутгтан авч ирсн маһд гиҗ эмчнр келҗәнә.

Кезәнә цагас авн хальмгудт нег авъяс бәәнә. Зулын байр эклтл насан утдулдг авъяс мана җирһлд батрсмн. Җил болһн Зулын өмн Хальмгин төв хурлд нас утдуллһна мөргүлмүд кегднә. Эн җил тиим мөргүлмүд үкр сарин 20-д эклҗәнә. Сарин туршарт амрлһна өдрмүдлә тиим мөргүл кегддгинь цугтан меднә. Әмтн көдлмшәсн сул цагла хурлд ирҗ, өрк-бүлин, элгн-садна насинь утдулна. Эн җил пандемийәс иштә эн мөргүлмүд онлайн янзар кегдҗәнә.

Специалисты АО «Газпром газораспределение Элиста» ведут работы по переводу на автономное газовое отопление трёх многоквартирных пятиэтажных жилых домов в селе Малые Дербеты. Уже установлены котлы наружного размещения для одного из домов, под которые предварительно было залито бетонное основание, также установлен патрубок дымоходной трубы. В настоящее время на объекте проводится комплекс работ тепло-технической части, в частности, монтаж насосной группы. Затем будет установлен общедомовой счетчик.

«Негдсн Әрәсә» партин седвәрәр мана орн-нутгт «Эмчнрт – мана ханлт» гидг буйнч седклин керг-үүлдвр зарлгдсн бәәнә. Коронавирус гемәс хөрлһнә халхд көдлҗәх эмчнрт, дунд медицинск көдләчнрт болн санитармудт эн күнд цагла ханлтан өргҗ, эднә ач-тус хәрүлхин төлә эн керг бүтәгдв. Мана таңһчд эн керг-үүлдвр бас таңһчин райодар болн Элстд давулгдҗана. Шидр Приютна района эмнлһнә улд үүлдҗәдг госпитальд көдлҗәх эрүл-менд харлһна көдләчнрт болн энд эмнлһ авчах улст эн керг-үүлдврин йовудт буйнч седклин дөң күрггдв.