Шидр Октябрьск района Хошуд селәнд бәәдг медәт Саңһҗ-Һәрән Петр 95 насна өөнән темдглв. Насн-җирһлиннь туршарт төрскн һазр-уснаннь делгрлтин төлә үнн кевәр көдлҗ, зурһан үрндән чик сурһмҗ өгсн аавиг ончта өөнләнь йөрәхәр района толһач Увшан Басң, таңһчин йиртмҗин көрңгин министрин үүл дааҗадг Һооҗура Санл, нег һазра улс болн элгн-саднь ирв.

Хальмг Таңһчин «Бамб цецг» дууна болн бииһин академическ ансамбль Дхарамсала балһснд Дала Ламин Гегәнә өөнд нерәдсн байрин концертд орлцв. Энткгин һазрт Дхарамсала төвдин бурхн-шаҗна оюни төв болҗана.

[b]Өдгә цагт мана таңһчд намртан болх шар шаҗна хургт ик белдвр кегдҗәнә. Таңһчин хурлмудт ясврин көдлмш бүрдәгдснлә зерглҗ, мана хотл балһсн бас өдр ирвәс кеерәд-ясрад йовхнь буульмҗта юмн.Энүнлә ирлцҗ Көк теңгсин көвәд бәәршлҗәдг Лаганьд чигн «Балһснд сән кец-таал тогталһна туск» шаңһа төсвин йовудт Мәәдр Бурхна бумблвин шидрк һазр ясрулгдҗадг болна. [/b

Хальмгт бурхн-шаҗна төрт нерәдсн зургудын марһан болҗана. Зург цокдг әмтн бурхн-шаҗна әрүн һол тоотыг үзүлгч зургудыг тер марһанд орлцулҗ чадхмн.

Бурхн Багшин номд өрк-бүлин чинрин тускар, шагшавдын болн нань чигн сурһмҗиг бичкдүд өрк-бүләсн авдгин тускар келгддгинь әмтн меднә. Өрк-бүлин өдр темдглгдсн цагла Росгвардьд церглҗәдг әмтн Бурхн Багшин Алтн сүмин гелң Сананла харһҗ, күүндвртнь орлцв. Хальмг Таңһчд үүлдҗәдг Әрәсән Росгвардин Заллтын һардврин седвәрәр эн харһлт бүрдәгдв.

Москвад бәәдг Алексей Солдатов Бурхн Багшин Алтн сүмд шаҗна шүтә белглв. Бурхн Багшин номар болн сойлар соньмсдг, шаҗна туск тоотыг цуглулдг эн күн Хальмгт дару-дарунь ирсн саамдан Бурхн Багшин Алтн сүмд даңгин ирҗ зальврна.

Баһ Дөрвд селәнд әмтнә оюни җирһлд ик чинр зүүсн керг-үүлдвр болв. Бурхн Багшин номд шүтдг әмтн өдр болһн «Ом мани пад ме хум» гиҗ зальврна. Шаҗнд сүзглдг әмтнә һол эн тәрниг ик үзгүдәр бичҗ, олна оньгт тусхав. Олн җилдән әмтнд церглх эн әрүн зальврлһта тәрниг байрин бәәдлд секлһнә үүлдвр Баһ Дөрвдт болв.

Элстд Хальмг ик сурһулин «Җаңһр» лагерьт иргчдән дәәчнр болх уйн наста баһчуд амрч дамшчана.

Шидр Хальмг Таңһчин Толһач Хаска Бату «Әрәсә эндр» гидг нарт-делкән зәңгллһнә агентствин улд болсн пресс-конференцд намртан Элстд болх шар шаҗна нарт-делкән ик хургин тускар келҗ өгв. М.Ломоносовин нертә МГУ-н Азийин болн Африкин орн-нутгудын ик сурһулин һардач, бурхн-шаҗна сурһуль-эрдмд болн шинҗллтд дөң болдг саңгин президент Алексей Маслов, Росконгрессин саңгин һардачин негдгч дарук, Дорд үзгин экономическ хургин һардач Игорь Павлов болн Әрәсән бурхн-шаҗна үүлдәчнрин төв заллтын ахлач, гевш Йонтен Лодой эн керг-үүлдврт орлцв.

Шидр мана таңһчд бәәтхә талдан һазрт бәәдг хальмгуд таңһчин сән Өдриг болн Дала Ламин Гегәнә һарсн өдриг өргнәр темдглв. Нег үлү Москвад «Тубден Шедублинг» хурлын өөр нег һазра улс цуглрҗ байран давулснь ончта болв.