Давсн сарң өдрлә Хальмг Таңһчд «Негдсн Әрәсә» партин тооцана-көтлврин ик хург болв. «Аш бәәнә» гисн дуудвртаһар цуг орн-нутгар эн болҗана. Ик хургт күцәгч болн зака үүдәгч, олна бүрдәцсин элчнр орлцв. «Негдсн Әрәсә» партин улсин көтлвриг тавн җилин эргцд тохралһна ашиг ик хургт орлцачнр диглв. Тер көтлврәр түшг кеһәд парть 2021 җилд Орн-нутгин Хүүвд болсн суңһврт диилвр бәрлә.

Одахн Элстд, Хальмг ик сурһульд Энткгин сурһуль-эрдмин нарт-делкән Төвлә нөкцлтиг өргҗүллһнә төрәр тодрха күүндвр болв. Ода хальмг вузин эмнлһнә дацңд Энткгәс ирсн оютнрин баг экләд сурчана. Эн төсв Энткгин Төвлә хамдан күцәгдҗәнә. Хальмг ик сурһулин һардач Салан Бадм, нарт -делкән үүлдврин төрәр бәәдг һардачин дарук Конин Оксана болн Энткгин Төвин толһач зерг Чоудхури Мизанур Рахман эн күүндврт орлцв.
Һазадын орн-нутгас ирсн оютнр сурһулян эклҗ сурсна түрүн сармуд яһҗ давсна тускар күүндвр болв. Теднә багшнрла бәрдг нөкцлтин, теднд өгчәх медрлин чинрин, иргчдән эмчин дамшлт авлһна, бәәцин таалын тускар орлцачнр тоолвран келв.

Одахн Элстд, бичкдүдин үүдәлтин бәәшңд «Навигаторы детства» гидг орн-нутгин төсвд орлцҗадг олна бүрдәцсин болн җисәдин таңһчин хург болв. Дунд сурһульмудын һардачнрин селвгчнр, багшнр болн «Орлята России», «Движение первых» җисәдин шунлтта элчнр – Элстин сурһульмудын эклц болн ах классин сурһульчнр, нам 27-ч тойгта «Теремок» садын бичкдүд, олна бүрдәцсин элчнр болн эк-эцкнр энүнд орлцв. Эдн цугтан тәәз деер һарад Әрәсән болн Хальмг Таңһчин частрмуд орс болн хальмг келәр дуулв. Әрәсән келн-улсин ниицлтин җилд хург нерәдгдв.

Давсн долан хонгин пүрвә өдрлә Элстд, олн салврта гимназин ул деер, «Хальмг Таңһчин дунд сурһулин 2026 җилин йилһән сән һардач» гидг марһан болв. Энүнд орлцсн 11 района болн Элстин элчнр марһлдв.

Одахн Элстд «Эрдмчнр» гидг Цугәрәсән марһана таңһчин девсң төгсв. Элстин колледжмүдин болн Хальмг ик сурһулин талвңд эдн олн зүсн эрдмәр мергҗлтән үзүлҗ дөрлдв. Эднә эв-довинь дааврта жюрин гешүд үнлҗ оютнр болн сурһульчнр дундас хамгин белдвртәһинь шүүҗ авв.

Эн җил Әрәсән келн-улсин ниицлтин җил гиҗ орн-нутгин Президент Владимир Путин зарлв. Түүнә йовудт мана эң-зах уга орн-нутгт бәәдг келн-улсин төлә төрскн келән хадһлхин, делгрүлхин болн өвк-эцкин авъясан сергәҗ тедниг өргҗүлхин төлә сән таал тогтагдҗана. Келн өвкнрин үлдәсн зөөр болсн деерән келн-улсин бахмҗ болҗасмн.

Одахн Элстд, таңһчин залврин сүүрин герт сурһулин өмнк эрдмин җил секлһнә байрин хург болв. Таңһчин сурһмҗлачнр, багшнр, салврин ветеранмуд болн баһ наста мергҗлтнр эн керг-үүлдврт орлцв. Әрәсән гегән –герлин министр Сергей Кравцов эн эрдмин көдләчнрт нерәдгдсн җил зарлсн болдг.

Ода мана орн-нутгт техникин делгрлтд болн инженермүдин кадрмуд белдлһнд һол оньг өггдҗәнә. Эн халхар Хальмг ик сурһулин номтнр болн багшнр, оютнр Татарстан Республикин Иннополисин, Өмн үзгин федеральн, Аһшин, Әәдрхнә техникин ик сурһульмудла өргн залһлда бәрҗ нөкцлтән өргҗүлҗәнә. Тернь Хальмг Таңһчин бәәтхә, цуг орн-нутгин төлә инженерин кадрмуд белдлһнд ик дөңгән күргнә.

Хальмг ном кезәңк ул-сүүртә, гүн учр-утхта болдг. Номин шинҗллтиг кесг зун жил хооран хальмг гелңгүд болн ламнр эклсмн, эдн арвад җилин туршарт Бурхн багшин ном дасч гүн медрл авч, зурхачнр, эмчнр болҗ үүлдҗ йовсмн. Мана өвкнр өөрд улсин орн-нутгин күчиг холвҗулҗ, әмтн дунд ховр медрл тархаҗ, теднә сурһуль-эрдмин кемҗәг өөдлүлҗ йовснь чигн мел үнн.

Эндрк номин делгрлт миңһәд дууна ууҗмд бәәдг Әрәсән келн-улсин вузмуд хоорнд бачм төрән күцәх, шуд залһлда бәрх арһ өгнә. Тиим кевәр одахн Хальмг ик сурһулин һардач Салан Бадм Бурятин болн Туван ик сурһульмудын һардачнр Алдар Дамдиновла болн Ольга Хомушкула һурвн вузин нөкцлтин тускар күүндвр кев. Тер тоод келн-улсин һурвн вуз Бурхн Багшин номар сурһуль-эрдм делгрүллһнә, шинҗллт келһнә халхар хамцу үүлдврин йовудын тускар вузмудын һардачнр болн мергҗлтнр бас тоолврарн хувалцв.