Деед Яшкуль болн Элст хоорнд тосхгдҗадг усна сурвлҗн болн 1-ч тойгта сурвлҗна ясвр төгсхдән өөрдҗ йовна. Батлгдсн диг-дараһар тосхлтын көдлмш хөн сард төгсх зөвтә, болв терүг цаг-болзгаснь урд дуусх чигн гиҗ Элст балһсна һардврин толһач Лиҗикә Алдр олн зәңгллһнә эв-арһсин көдләчнрлә болсн харһлтд зәңглв. Усар тетклһнә төр эркн чинртә болҗана, тегәд Элст балһсна һардвр болн ЭГС-ин депутатнр тосхлтын көдлмшиг бүрткҗ һол оньгтан бәрнә.

Шидр Хальмг Таңһчин социальн делгрлтин, күч-көлснә болн көдлмшәр тетклһнә министерств 2024 җилд кеҗ-күцәсн көдлмшин аш дигләд, эн җилин зуран һоллгч зөрүллтс темдглҗ авв. Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина сүүриг һардҗ давулв. Коллегийин сүүрт СФР-ин таңһчд үүлддг региональн әңгин һардачин дарук Евгений Алексеев, күч-көлснә инспекцин һардач Орһдан Вера, социальн бүрдәцсин һардачнр орлцв.

Эн өдрмүдт «Һардачнрин төлә шаңһа залврин халхар медрл өглһн» гидг көтлврт орлцачнрин баг мана таңһчур ирсн бәәнә. РАНХиГС эн көтлврин медлд доладгч селгә давулҗ, орн-нутгин долан регионд, тер тоод мана таңһчд мергҗлт өөдлүллһнә болн дамшлт хоршалһна керг-үүлдвр давулҗана. Эн көтлвр 2018 җиләс авн күцәгдҗәнә, терүнд күцәгч йосна, шаңһа болн муниципальн бүрдәцсин, ик компаньсин элчнр, арһлачнр, «Әрәсән нүүрләчнр»болн «Босхмҗин нүүрләчнр» гидг марһаст диилвр бәрсн улс орлцна. Мана таңһчур арвн хойр күн ирв, тедн дунд шаңһа залврин ик сурһулин (ВШГУ), Москва, Нижний Новгород, Санкт-Петербург балһсдын, Белгородск мүҗин , ДНР-ин элчнр бәәнә. Эдн таңһчин социальн-экономическ бәәдл шинҗләд, хальмг улсин сойлла болн тууҗла таньлдад, хөөннь Хальмг Таңһчин инвестиционн делгрлтин шин зөрүллтсин туск төсв белдх зөвтә.

Шидр «Калмыкия» РИА-н барин төвд болсн брифингин йовудт таңһчин Росгвардин заллтын лицензь өгдг төвин һардач, полковник Санл Чурюмов 2024 җилин көдлмшин аш дигләд, седкүлчнрин сурврмудт хәрү өгв.

Өдгә цагт балһснд чигн, селәнд чигн әмтнә төлә сән таал тогтахар цуһар шунна. 2024 җилин чилгчәр Хальмг Таңһчин Толһачин «Шуд залһлдана» йовудт ирлцңгү сурврмуд бас орҗ ирв. Элстихн негдгч микрорайона ца бәәдг Колонск боодгин эргндк һазрт сән таал тогтахиг сурсн билә.

Хальмг Таңһчин Толһач Хаска Бату Кичгә Төлән нертә Хальмг келн-улсин гимназьд одв. Удл уга тенд бат ясвр эклхмн.

Шидр Хальмг Таңһчин селәнә эдл-ахун министерствд хаврин тәрә тәрлһнә төрәр селвлцән болв. Россельхозцентр, Агрохимическ цергллт, Калммелиоводхоз, Россельхознадзор бүрдәцсин болн номин элчнр, арһлачнр терүнд орлцв. Хальмгин селәнә эдл-ахун министрин үүл дааҗадг Гаван Тимур энүг давулв. Селвлцәнә йовудт царцаха уга келһнә көдлмшт онц оньг өггдв.

Лу сарин 7-д таңһчин экономикин болн хулд-гүүлгәнә министерствд Хол Дорд үзгәс ирсн номтнрла харһлт болв. Эдн көлгн-күчнә өдгә цагин эв-арһс улм өргнәр олзллһна кергиг цааранднь бүрдәцд тохрахар бәәнә. Ховр дамшлт тархаҗадг мергҗлтнр ода Хол Дорд үзгин авиа- болн экраноплан тосхлһна номин-үүлдврин бүрдәцд көдлҗәнә. Эднлә таңһчин йосна органмудын элчнр харһад, сурвран өгв.

Күүкд улс һуйр искәһәд, боорцг кеҗ белддг. Цаһана боорцг йирин боорцгас йилһрнә. Зүсн болһн эврә чинртә. Цуг Цаһана боорцг дееҗин, белгин, эдлврин гиҗ хувагдна. Дееҗин боорцг кех һуйрт өндг, һахан хорһ оруллго кенә. Дееҗд целвг, 5 тоһш, 3 шор белг, мошкмр, хуц, кит орулдг бәәсмн. Белгин боорцг ик герин болн бичкн герин белг гиһәд хувагдна. Ик герин белгин тоод нег хавтха, нег хуц, нег кит, нег җола, нег мошкмр, һурвн шор белг, зурһан тоһш орна. Боорцгиг эн тооһарнь цаһан утцнд келкәд, цаһалҗ одх герин тооһар дигләд авчкдмн. Мел иим дүрстәһәр, тооһар, зуг кемҗәһәрн хойр холванд бичкнәр кесн боорцгиг «бичкн герин белг» гиҗ келдг. Ик герин белг кен ахдан, бичкн герин белг кен бичкндән нерәдҗ өгдг бәәсмн. Эдлврин боорцгт: темән, һалун, хорха болн нань чигн олн зүсн дүрстә боорцг орна.

Цаһан Сар – хальмг улсин байр мөн. Цаһан Сар – хаврин байр. Ик кезәнәс нааран эн байриг сарин нег шинд темдглдг бәәсмн. Цаһан Сарин байран темдглснә хөөн хальмгуд малдан шин идг хәәһәд һардг бәәҗ. Нүүһәд йовдг хальмг улст эннь бас тааста йовдл мөн. Хаврин түрүн сарин нег шинд ичәндән бәәсн зурмн, нүкнәсн һарна гиҗ мана аавнр-ээҗнр келцхәнә! Тер мет күн бас эврә седкл-ухаһан медүләд, олн зүсн керг-үүл күцәҗ, Цаһан Саран байртаһар темдглдг йоста.