Җил болһн мөрн сарин 20-д мана орн-нутгт эврә сән дурар цусан өгдг улсин төлә Келн-улсин өдр болна. Цусан өгч әм аврдг улст, цус авдг бүрдәцсин көдләчнрт нерәдҗ эн өдр зарлсмн. Әрәсәд җил болһн ут тоодан күсдундур сай күн цус керглнә. Зеткртә йовдлд шав авсн, күнд гемәр гемтсн, цаһан төр болсн, бачм бәәдлд көдлсн улст цусн кергтә болна.

Элст балһснд бәәдг Цернә Михаил җил болһн хөн сарин 9-д Төрскән харсгч Алдр дәәнд орлцад, залу-зөрмг кевәр немшнрлә дәәлдҗ йовсн авһнриннь санл тевчнә. Хойр авһнь Бадмин Алексей Санҗ хойр дән эклсн цагт төрскн һазран хортнас сулдххар эврә сән дурар түрүн зергләнд фронтд йовсмн.

Калининградск мүҗин эрк биш медицинск даатхлһна саң Алдр Диилврин 80 җилин өөнд нерәдәд шишлң лит барт белдв. Терүнд сар болһна халх дәәнә цагт төрскн һазран сулдхлһнд залу-зөрмгән үзүлсн цергчнрт нерәдгдҗәнә. Дәәчнрин нерд зааһад, зургинь барлад, цергә хаалһинь бичәд, санлынь тевчҗ. Эн литин моһа сарин халх нег һазра мана күн, цергә эмч Үкрчин Пантелейд (зургт) нерәдгдснь ончта.

Алдр Диилврин 80 җилин өөнд нерәдәд, нарт-делкән кемҗәтә нег төсв эклсмн. Тернь машиһәр кесг һазр эргҗ йовад, олн харһлтс бүрдәх төсв болҗана. Агинск Бурятск һазрин зурачнр болн нань чигн эрдмтә улс ик эртәснь белдвр кесмн.

Эн җил бидн Төрскән харсгч Алдр дәәнд диилвр бәрснә 80 җилин болн Хальмг автономь бүрдәгдснә 105 җилин ончта өөн темдглҗәнәвидн. Дәкәд мана таңһчин хотл Элст балһсн 160 җилин өөнән темдглхәр белдҗәнә. Ончта өөн угтҗ төрскн һазран хортнас сулдхлһнд залу-зөрмгән үзүлсн, таңһчиннь болн хотл балһснаннь делгрлтд үнн-чик седклтәһәр көдләд, ик тәвцән орулсн улсин ач-тус хәрүлҗ, эднә нерд сергәх күслтәвидн. Тиим улсин негнь Төрскән харсгч Алдр дәәнд орлцач, таңһчин кесг бүрдәц һардҗ йовсн Эренжен Орханович Настынов болна.

Шидр Элстд көдлмшч ормсин Цугәрәсән яармин региона девсң болв. Һурвн җил дарандан болҗадг керг-үүлдврт 60 бүрдәц орлцад, көдлмш хәәҗәдг улст 500 шаху орм бәәхин тускар зәңглв. «Кадры» гидг келн-улсин төсвин медлд бүрдәгдсн керг-үүлдврин йовудт таңһчд көдлмш олҗ авсн деерән талдан регионмудт ямаран эрдмтә улс кергтә болҗахиг медҗ болхмн билә. Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина керг-үүлдвриг нүр үгәр секәд, сурһульчнрт иргчдән эрдм шүүҗ авхд, сурһулян төгсәҗәдг баһчудт болн көдлмш хәәҗәдг улст яарм тааста керг олҗ авхд дөң болхиг темдглв.

Шидр мана таңһчур Әрәсән Федерацин Хүүвин Ахлачин дарук Инна Святенко көдлмшин халхар ирәд, таңһчин эмнлһсин үүлдврлә таньлдад, тенд эрүл-мендән батрулҗадг цергә шишлң керг-үүлдврт орлцачнрла күүндсн билә. П.Жемчуевин нертә таңһчин эмнлһнә ах эмч Чумпинә Саглр реабилитацин әңгин үүлдврин тускар келв, ямаран кергсл бәәхиг үзүлв. Балһсна поликлиникин ах эмч Нәәмнә Бембән келсәр, энд реабилитацин кергсл углҗ тәвгдсн бәәнә, зәрмнь Троицкое селәнә әңгд бәәнә, тегәд цергә керг-үүлдврин ветеранмуд цогц-махмудан батрулхин төлә таал бәәнә.

Давсн амрлһна өдрмүдт Элстд бамб цецгин наадмин йовудт тогтсн авъясар МаханФест керг-үүлдвр болв. Җил болһн энүг Хальмг Таңһчин экономикин болн хулд-гүүлгәнә министерств, «Мини бизнес» төв бүрдәнә. Соньн керг-үүлдврин йовудт нег һазра арһлачнр кеҗ һарһсн эдл-уушар, махна зүүтә олн зүсн хотар олн-әмтиг тоов.

Мана таңһчд хаврин кемд давулгддг бамб цецгин наадм цаарандан давҗана. Мөрн сарин 19-д таңһчин кесг райодт бамб цецгин наадм болв. Сара хонгт давҗадг нәр-наадн Үстин района Цаһан Амнд күрч, керг-үүлдвр хальмг хувцта улсин йовлһнас эклв. Района болн селәнә бүрдәцсин көдләчнр терүнд орлцв. Керг-үүлдвриг Үстин района муниципальн бүрдәцин толһач Очра Геннадий секәд нег һазра улсан йөрәв.

Элст балһснд Әрәсән сурһуль-эрдмин көдләчнрин профсоюзин Хальмг Таңһчин бүрдәцин болн баахн багшнрин Хүүвин седвәрәр түрүн болҗ Өмн үзгин регионмудын баахн багшнрин ик хург болв. «Хамдан күцәмҗд күрий» гидг керг-үүлдврт Хальмг Таңһчин, Адыгейин, Краснодарск крайин, Аһшин, Ростовск болн Әәдрхнә мүҗсин болн ЛНР-ин Антрацитовск района баахн багшнр орлцв. Ик гиснь һурвн җилдән сурһуль-эрдмин халхар көдлҗәдг 70 күн баһчудын олна ниицән урмд өгч, эн эрдмәрн көдлхд дөң болдгин тускар күүндв.